ფრანგულ და უკრაინულ საინფორმაციო საშუალებებს თუ ვენდობით, საქართველოს ეროვნული ნაკრების კაპიტან ჯაბა კანკავას ტრანსფერი ფრანგულ "რეიმსში" უკვე გადაწყვეტილი ამბავია. ის კი არა, როგორც უკრაინულმა, ისე ფრანგულმა მედიამ უკვე ის თანხაც კი დაასახელა, რომელსაც ქართველი ფეხბურთელის სანაცვლოდ მიიღებს "დნიპრო". ზოგიერთი 1 100 000 ევროს ასახელებს, ზოგიც 1 200 000-ს...
რა ხდება რეალურად? "ლელო" კანკავას დნეპროპეტროვსკში შეეხმიანა...
- საფრანგეთში გვგონიხართ და გაგვიკვირდა, უკრაინულ ნომერზე რომ გვიპასუხეთ...
- არა, უკრაინაში ვარ, დნეპროპეტროვსკში.
- რა არის ახალი თქვენს ტრანსფერთან დაკავშირებით?
- რეალურად რაც არის,
მოკლედ, გარკვევის პროცესშია ყველაფერი. შეიძლება ახლა ჩვენ საუბარს მოვრჩეთ და მაშინვე გადაწყდეს ეს ტრანსფერი, წამი-წამზეა საქმე... ისიც შეიძლება, პროცესი კიდევ გაიწელოს. მოკლედ, ასეთი სიტუაციაა ახლა.
არადა, ბევრმა საინფორმაციო საშუალებამ უკვე გადაწყვეტილად გამოაცხადა ტრანსფერი. ჩემზე უკეთ ვინ იცის, რომ ასე არ არის. კი, "რეიმსში" გადასვლა უფრო სავარაუდოა, მაგრამ მე ჯერ ხელი არაფერზე მომიწერია და მოლაპარაკების პროცესიც გრძელდება.
- ესე იგი, ისევ "დნიპროში" ხართ და მომდევნო მატჩისთვის ემზადებით...
- კი, ასეა.
- არ გიჭირთ სავარჯიშოდ და სათამაშოდ განწყობა?
- რა თქმა უნდა, მიჭირს. ამის თაობაზე ვუთხარი კიდეც კლუბის ხელმძღვანელობას. თავს ისე ვგრძნობ, თითქოს ჰაერში ვარ გამოკიდებული.
- ამბობენ, "დნიპროში" დიდი ფინანსური კრიზისია და ფეხბურთელებს გუნდიდან წასვლაზე უჭირავთ თვალიო. მართალია?
- არა, ხელფასებს დროულად ვიღებთ, ამის თქმა ნამდვილად შემიძლია.
- ჯაბა, ისევ ტრანსფერის თემას მივუბრუნდეთ. მაინც, რატომ ჭიანურდება საქმე?
- სხვათა შორის, რამდენჯერმე შეთანხმებასაც მიაღწიეს კლუბებმა და თითქოს ყველაფერი გადაწყვეტილი ჩანდა, მაგრამ ისევ ახალი მოთხოვნები გაჩნდა და ასე შემდეგ.
- თქვენს პირად კონტრაქტთან დაკავშირებით პრობლემა არ არის?
- არა, "რეიმსში" იციან ჩემი პირობები. როცა მოლაპარაკება დაიწყო, მე მათ შევატყობინე ამის თაობაზე.
- "დნიპროდან" მართლაც მიდიან კალინიჩი და დუგლასი?
- ისინი გუნდში არიან და ჩვეულებრივ ვარჯიშობენ...
ყოველდღიური სპორტული გაზეთი "ლელო"
