გიორგი ნარიმანიძე: აქ, ყაზახეთში, მხოლოდ ფეხბურთზე ვფიქრობთ

ყაზახეთის ჩემპიონატის პირველი ლიგის ბინადარ "ეკიბასტუზეცში" სამი ქართველია. ვეტერანი ფეხბურთელი ზურაბ არჩვაძე მთავარი მწვრთნელის ასისტენტად მუშაობს, ხოლო იმავე გუნდში თამაშობენ გიორგი ნარიმანიძე და გიორგი აბელაშვილი.

გიორგი ნარიმანიძე 21 წლისაა. ის ქართველ ქომაგს ცხინვალის "სპარტაკიდან" და რუსთავის "მეტალურგიდან" ემახსოვრება...

- გიორგი, საინტერესოა, როგორ მოხვდით ყაზახეთში?
- გუნდის მთავარი მწვრთნელის ასისტენტი ზურაბ არჩვაძეა, ვინც ჩემი მწვრთნელი იყო რუსთავის "მეტალურგში". სწორედ მან ჩამომიყვანა აქ. "ეკიბასტუზეცი" ყაზახეთის ჩემპიონატის პირველ ლიგაში თამაშობს. კიდევ ორი თვე დარჩა სეზონის ბოლომდე. წლეულს უმაღლეს ლიგაში თამაშის ამბიცია არ გვაქვს, მომავალი სეზონისთვის კი ძლიერი გუნდის გაკეთებას აპირებენ.

- როგორი მდგომარეობაა დღეს გუნდში? მთავარი მწვრთნელი ვინ არის?
- მთავარი მწვრთნელია ადგილობრივი სპეციალისტი ვლადიმირ ლინჩევსკი. როგორც გითხარით, მას ზურაბ არჩვაძე ეხმარება. ზურაბს აქ დიდი ავტორიტეტი აქვს. ის კარგა ხნის განმავლობაში თამაშობდა ამ კლუბში და ყველას ძალიან უყვარს.

- მიზნებზე ცალკე გკითხავთ...
- წლეულს ვეღარ მოხერხდება უმაღლესში გადასვლისთვის ბრძოლა. მომავალი სეზონიდან კი სულ სხვა გუნდი იქნება. "ეკიბასტუზეცი" ყაზახეთის ჩემპიონატის უმაღლეს ლიგაში თამაშობდა და იქ დაბრუნებაზე სერიოზულად ფიქრობენ.

- პირობები როგორია?
- მხოლოდ ფეხბურთზე ვფიქრობთ. ვცხოვრობთ კლუბის ბაზაზე, კომფორტულ პირობებში. კვება, აღდგენა, ხელფასი - ეს პრობლემა არ არის.

- გუნდში ბევრი ლეგიონერია?
- არა, მხოლოდ ორი ქართველი ვართ - მე და გიორგი აბელაშვილი.

- აბელაშვილზე უფრო დაწვრილებით გვიამბეთ...
- 18 წლისაა. ისიც რუსთავის "მეტალურგში" თამაშობდა. გავლილი აქვს "საბურთალოს" სკოლა და უთამაშია საქართველოს სხვადასხვა ასაკობრივ ნაკრებებში. თუ თანაგუნდელის ქებაში არ ჩამომართმევთ, მაგარი ბიჭია.

- თქვენ რომელ პოზიციაზე თამაშობთ?
- პრაქტიკულად ყველა მატჩი ცენტრალური მცველის პოზიციაზე ვითამაშე.

- რას იტყვით ყაზახეთის ჩემპიონატის პირველ ლიგაზე? როგორი დონეა?
- აქ გუნდები ორ ეშელონად იყოფიან. არიან კლუბები, რომლებიც უმაღლესში გადასასვლელად იბრძვიან და - დანარჩენები. დონე საშუალოა. მთელი აქცენტი ფიზიკურ მომზადებაზეა გადატანილი. თამაშების უმრავლესობა ძალიან ხისტია, უხეშობის ზღვარზე.

- ყაზახეთი დიდი ქვეყანაა. მგზავრობა არ გღლით?
- ეს მართლაც პრობლემა იყო თავიდან, მაგრამ ახლა შევეჩვიე. ჩემთვის უკვე არაფერია 10-12-საათიანი მგზავრობა. საქართველოში რომ ჩამოვდივარ, ერთი ქალაქიდან მეორეში ისე გადავდივარ, ვერც კი ვგრძნობ.

- სეზონის ბოლოს, ალბათ, უკეთეს გუნდში გადასვლაზე იფიქრებთ...
- რომ არ დავმალო, უკვე არის შემოთავაზებები. ლაპარაკი მაქვს როგორც ყაზახეთის, ისე საქართველოს ჩემპიონატის უმაღლესი ლიგის კლუბებზე. ჯერ ნუ დავაკონკრეტებთ, სეზონი რომ მორჩება, მერე გადავწყვეტ ყველაფერს. თან აქაც კარგი გუნდი კეთდება... მოკლედ, ვნახოთ...

- ქალაქ ეკიბასტუზზე რაღას იტყვით?
- მეშახტეთა ქალაქია. ფეხბურთი უზომოდ უყვართ. სტადიონი ათიათასიანია. ბოლო 5 თამაში არ წაგვიგია. გუნდი აღმავლობის გზაზეა და სტადიონზეც ხალხი მატულობს.

- ყაზახური "ასტანა" ჩემპიონთა ლიგის ჯგუფში რომ გავიდა, ამას როგორ შეხვდნენ მანდ?
- ყაზახეთი საფეხბურთო ქვეყანა ხდება. ამ ამბის მერე ქუჩაში მთავარი სალაპარაკო თემა ფეხბურთია. გაჩერებენ და გეკითხებიან - ხომ კარგია, "ასტანამ" ამდენს რომ მიაღწიაო?

მოკლედ რომ ვთქვათ, სისტემა არის და ყაზახური კლუბები ისე ვითარდებიან, რომ მომავალში მათი წარმატებები უკვე აღარ უნდა გაგვიკვირდეს.

(იბეჭდება მცირე ცვლილებით)
ყოველდღიური სპორტული გაზეთი "ლელო"