თედორე გრიგალაშვილი: კმაყოფილი ვერაფრით ვიქნები, თუმცა...

22 წლის თედორე გრიგალაშვილი გროზნოს "ტერეკში" სეზონის დასაწყისში მივიდა. საქართველოს ჩემპიონატიდან რუსეთში წასული ფეხბურთელისთვის იქაურ პირველობასთან ადაპტაცია მთლად იოლი არ არის.

გრიგალაშვილი, ვისიც ქართულ საფეხბურთო თემს ერთობ ეიმედება, ჯერაც ვერ იქცა "ტერეკის" ძირითადი შემადგენლობის ფეხბურთელად.

ის ახლა თბილისშია. "ლელომ" ისარგებლა შემთხვევით და თედორე გრიგალაშვილთან მცირე ინტერვიუ ჩაწერა...

- თბილისში სავიზო ამბების მოსაგვარებლად ვარ. სამთვიანი ვიზა მქონდა და მას ვადა გაუვიდა. უკვე ორი კვირაა, აქეთ ვარ.

- მოდი, შეაფასეთ სეზონის პირველი ნახევარი. როგორი იყო ის თქვენთვის?
- ერთი მხრივ, კმაყოფილი ვერაფრით ვიქნები. პირველი წრე დასასრულს უახლოვდება და მხოლოდ ერთი თამაში ჩავატარე. მეორე მხრივ, სადებიუტო სეზონია და მაშინვე ძირითადში დამკვიდრება რთულია. თან, გასათვალისწინებელია ისიც, რომ, საქართველოს ჩემპიონატთან შედარებით, აქ სხვა მოთხოვნებია.

კმაყოფილი იმით ვარ, რომ ასეთი დონის ჩემპიონატში მოვხვდი.

- საინტერესოა, როგორია სიტუაცია "ტერეკში"? მწვრთნელისგან მხარდაჭერას თუ გრძნობთ? ან ვის დაუმეგობრდით?
- ერთი თამაში ვითამაშე რუსეთის თასზე. იმ მატჩის შემდეგ მწვრთნელი მელაპარაკა. მითხრა, შენით კმაყოფილი ვარო... "ტერეკი" ძალიან მეგობრული გუნდია. პირადად მე განსაკუთრებით ახლოს ბრაზილიელებთან ვარ.

- გროზნოში ხალხს უყვარს ფეხბურთი?
- ძალიან. თამამად ვიტყვი - როცა "ტერეკი" თამაშობს, იმ დღეს გროზნოში ნამდვილი ზეიმია!..

- თუ გიფიქრიათ იმაზე, რომ თუნდაც 6 თვით რომელიმე სხვა გუნდში განათხოვრება შეიძლება უკეთესი იყოს თქვენთვის? მიიღებდით სათამაშო პრაქტიკას და მერე ისევ "ტერეკს" დაუბრუნდებოდით...
- კი, მიფიქრია ამ თემაზე, მაგრამ რაკი გუნდში ხარ, ესე იგი, მას სჭირდები. გამორიცხვით ვერაფერს გამორიცხავ. ყველაფერი ხელმძღვანელობის გადასაწყვეტია...

- როგორ ფიქრობთ, რა შეუძლია "ტერეკს" ამ სეზონში?
- ვფიქრობ, "ტერეკს" შეუძლია, რუსეთის საუკეთესო ხუთ გუნდს შორის მოხვდეს. ძალიან კვალიფიციური მწვრთნელი და ფეხბურთელები გვყვანან.

ყოველდღიური სპორტული გაზეთი "ლელო"