რუსული მედიის ცნობით, საქართველოს ეროვნული ნაკრების 24 წლის ცენტრალური მცველი საბა კვირკველია "კრასნოდარში" გადასვლასთან ერთ ნაბიჯშია. უკვე ვიცით, რომ რაც ყაზანის "რუბინში" ესპანელი მწვრთნელი ხავი გრასია მივიდა, საბას სათამაშო პრაქტიკა აღარ აქვს. მეტიც, ის განაცხადშიც კი ვეღარ ხვდება.
"კრასნოდარს" ოლეგ კონონოვი წვრთნის. რუსეთის წინა ჩემპიონატში ამ გუნდმა მეოთხე ადგილი დაიკავა და ევროპალიგის ჯგუფურ ეტაპზე ითამაშებს. თუ კვირკველია "კრასნოდარში" გადავა, ასრულდება მისი სიტყვები და ის "რუბინზე" უფრო ამბიციური კლუბის მაისურას მოირგებს.
- საბა კვირკველია: გპირდებით, თუ წავედი, "რუბინზე" ბევრად მაგარ გუნდში
გუშინ, შუადღისას, სანამ რუსული მედია ამ ინფორმაციას გაავრცელებდა, "ლელო" კვირკველიას შეეხმიანა. მან კი გვითხრა, ყველაფერი ძველებურადააო, მაგრამ სატრანსფერო პერიოდი დასასრულს უახლოვდება და გასაკვირი არ არის, რომ მოვლენები კალეიდოსკოპური სისწრაფით იცვლება.
(იბეჭდება მცირე ცვლილებით)
ყოველდღიური სპორტული გაზეთი "ლელო"
