ჩვენი ინფორმაციით, ოზურგეთში გაიმართა გურიის რეგიონული ფეხბურთის ფედერაციის აღმასკომის სხდომა, რომელმაც 10 მარტისთვის გრფფ-ის ვადამდელი საპრეზიდენტო არჩევნები დანიშნა. ამის აუცილებლობა მას შემდეგ შეიქმნა, რაც მოქმედმა პრეზიდენტმა კახა ებრალიძემ პოსტის დატოვების შესახებ ფეხბურთის ფედერაციას მიმართა. როგორც ცნობილია, ის 2015 წლის ოქტომბრის არჩევნებში რევაზ არველაძეს უჭერდა მხარს, ვადის გასვლამდე კი 3 წელიწადი ჰქონდა დარჩენილი.
"მე არაფერი მაქვს საწინააღმდეგო ფეხბურთის ფედერაციის ახალ ხელმძღვანელობასთან, პირიქით, მათ დიდ პატივს ვცემ და წარმატებებს ვუსურვებ. უბრალოდ, გარემოებებმა მოიტანა, რომ მე სხვა მხარეს ვიდექი და მოღალატე ვერ გავხდებოდი.
ახლა ისმის კითხვა - ვინ შეცვლის მას? დადასტურებული ინფორმაციით, ეს იქნება დავით მუჯირი-უფროსი, ლეგენდარული თბილისის "დინამოს" ღირსეული წევრი და საქართველოს ფეხბურთის ფედერაციის გენერალური მდივნის მამა. მას სამივე მუნიციპალიტეტის საფეხბურთო საზოგადოება დაუჭერს მხარს, შესაბამისად, ექნება ხმის მიმცემი სუბიექტების მხარდაჭერაც.
სახელოვანი ფეხბურთელი წარმოშობით ოზურგეთიდანაა და, სავარაუდოდ, ამიტომაც გავრცელდა ხმები, რომ რეგიონული ფედერაცია გურიის მთავარ ქალაქში გადააქვთ. ამ ხმების გავრცელება "გაამყარა" აღმასკომის სხდომის ოზურგეთში ჩატარებამ. თუმცა, ჩვენი ინფორმაციით, სხდომა ლანჩხუთში იმიტომ არ ჩატარდა, რომ პრეზიდენტის მოვალეობის შემსრულებელი ბენია თავბერიძე იქ ჩასვლაზე უარს აცხადებს (ასე ამბობენ) და ოფისის გადატანაზე საუბარი არ არის.
გურიის ფედერაცია 2000 წელს დაფუძნდა. სფფ-ის მაშინდელი თავკაცის, მერაბ ჟორდანიას გადაწყვეტილებით, გრფფ-ის ოფისი ლანჩხუთში უნდა ყოფილიყო.
"მე არ მაინტერესებს სახელმწიფო დაყოფა, გურიის საფეხბურთო ცენტრი ლანჩხუთია", - აცხადებდა ჟორდანია.
ამ ორგანიზაციის პირველი პრეზიდენტი იმედო დუნდუა გახლდათ. მისი გარდაცვალების შემდეგ, რამდენიმე დღის განმავლობაში (თან არაოფიციალურად), რეგიონულ ფედერაციას ალბერტ ლომაძე ხელმძღვანელობდა, რის შემდეგაც პრეზიდენტი დურმიშხან ჩხაიძე გახდა, ეს უკანასკნელი კი ზემოთ ნახსენებმა ებრალიძემ შეცვალა.
გურული ფეხბურთის ირგვლივ სულ ხმაური იყო და მას სფფ-ის საპრეზიდენტო არჩევნებში ხმა ორჯერ ჩამოართვეს. პირველად ამით გიორგი ნემსაძემ იზარალა, მეორედ - რევაზ არველაძემ. ხმაურიანი იყო ებრალიძის ორივე არჩევნები - პირველად კონკურენტმა დურმიშხან ჩხაიძემ არჩევნებში მონაწილეობაზე პროტესტის ნიშნად თქვა უარი, მეორედ კი გრფფ-ის სათავეში მის მოსვლას ორი არჩევნები დასჭირდა - პირველი ჩაიშალა, რის გამოც არჩევნები თბილისში (პირველად) ჩატარდა!
რაც შეეხება 2017 წლის 10 მარტის არჩევნებს, მასალა მზად გვქონდა დასაბეჭდად, როცა "ლელოსთვის" ცნობილი გახდა, რომ გასულ უქმეებზე ლანჩხუთში იმყოფებოდნენ საქართველოს ფეხბურთის ფედერაციის მაღალჩინოსნები - ვიცე-პრეზიდენტი კახა ჭუმბურიძე, სპორტული დირექტორი ზაზა ზამთარაძე და რეგიონების კურატორი გოჩა თამაზაშვილი.
ისინი რეგიონული ფედერაციის ოფისში ებრალიძეს შეხვდნენ. შეიძლება, ეს იმის დასტურიც იყოს, რომ ფედერაციის დღევანდელი ხელმძღვანელობა არ აქცევს ყურადღებას, ვინ სად იდგა სფფ-ის ბოლო არჩევნებზე და ეს ძალიან კარგია.
"დიახ, ბატონი კახა ჭუმბურიძე დამიკავშირდა და მე, თემურ ლორიასა და თენგიზ პატარაიას ერთად შეგვხვდა. ჩვენ ერთმანეთს დიდ პატივს ვცემთ და არჩევნებში სხვადასხვა მხარეს ყოფნა არ ცვლის ამ ურთიერთობას.
ამ ეტაპზე, მე ფეხბურთისგან გვერდით ვარ გაწეული და ამ მოცემულობაში პოსტზე დაბრუნებას გამოვრიცხავ, მერე კი ვნახოთ...
რა თქმა უნდა, სამომავლოდ მექნება სურვილიც და პრეტენზიაც, ისევ ფეხბურთში ვიყო და ცოდნა ამ საქმეს მოვახმარო. სწორედ ეს სურვილი იყო ბატონი კახას მხრიდანაც და დამიდასტურა, რომ ასეთია ლევან კობიაშვილის პოზიციაც. ჩემი მხრიდან კი დაგიდასტურებთ, რომ გურიის ფედერაციას ეყოლება ძალიან კარგი ხელმძღვანელი დავით მუჯირი-უფროსის სახით.
ჩვენ სტუმრებსა და გრფფ-ის მომავალ თავკაცს აღვუთქვით გვერდში დგომა გურული ფეხბურთის საკეთილდღეოდ", - გვითხრა კახა ებრალიძემ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
