17 ნოემბერს სახელოვანი ქართველი მსახიობისა და კომენტატორის, კოტე მახარაძის დაბადებიდან 85 წელი შესრულდება და ამ თარიღის აღსანიშნავად არაერთი კულტურული და სპორტული ღონისძიებაა დაგეგმილი. ერთ-ერთია კოტე მახარაძის სახელობის ტრადიციული ტურნირი, რომელიც 11-16 ნოემბერს "ქარიშხალასა" და სკა-ს სპორტულ კომპლექსებში გაიმართება.
ამ შეჯიბრებასთან დაკავშირებით გუშინ თბილისის ფეხბურთის ფედერაციაში გაიმართა პრესკონფერენცია, სადაც მედიის წინაშე წარდგნენ ტურნირის ორგანიზატორები. პრესკონფერენციას კოტე მახარაძის მეგობარი და კოლეგა ჯამლეთ ხუხაშვილი უძღვებოდა.
ჯამლეთ ხუხაშვილი:
- ბრწყინვალე კომენტატორს, მსახიობსა და პიროვნებას, კოტე მახარაძეს, 17 ნოემბერს 85 წელი შეუსრულდებოდა. ამ შესანიშნავი თარიღის
მოხარული ვარ, რომ მისი სახელობის ტურნირი საერთაშორისო გახდა. დარწმუნებული ვარ, შეჯიბრება უმაღლეს დონეზე ჩაივლის და იქ მისული მაყურებელი არ ინანებს.
მადლობა ყველას, ვისაც ტურნირის ორგანიზებაში მიუძღვის წვლილი - თბილისის ფეხბურთის ფედერაციას, საქართველოს ფეხბურთის ფედერაციას, თბილისის მერიას, რადიო "ჯაკოს", საფეხბურთო კლუბ "ალგეთს" და, რასაკვირველია, კოტე მახარაძის ოჯახსა და მეგობრებს.
გრიგოლ ცაავა, თბილისის ფეხბურთის ფედერაციის პრეზიდენტი:
- ამ ტურნირს საფუძველი ჯერ კიდევ მაშინ ჩაეყარა, როცა ბატონი კოტე ცოცხალი იყო და მოხარული ვარ, ეს შესანიშნავი ტრადიცია რომ გრძელდება. კარგია, რომ ტურნირზე საქართველოს არაერთი რეგიონის გუნდი იქნება წარმოდგენილი და აზერბაიჯანიდანაც გვესტუმრებიან.
ტურნირი 1999 წელს დაბადებულ ბავშვთა შორის გაიმართება და მასში 16 გუნდი იასპარეზებს.
A ჯგუფი: 35-ე საფეხბურთო სკოლა-99, ჩემპიონი, ნორჩი დინამო-1, ნორჩი დინამო-99;
B ჯგუფი: ჩემპიონი-2000, ადელი (ბათუმი), ალგეთი, გორი;
C ჯგუფი: 35-ე საფეხბურთო სკოლა-1, ალჯანა (ბაქო, აზერბაიჯანი), მერანი-1, თენგიზ სულაქველიძის აკადემია-2;
D ჯგუფი: თენგიზ სულაქველიძის აკადემია-1, მერანი-2, ნორჩი დინამო-2, 35-ე საფეხბურთო სკოლა-2.
11, 12 და 13 ნოემბერს ჯგუფური ეტაპის შეხვედრებია, 14 ნოემბერს - მეოთხედფინალი, 15 ნოემბერს - ნახევარფინალი, 16 ნოემბერს კი - მატჩი მესამე ადგილისთვის და ფინალი.
დაჯილდოების საზეიმო ცერემონიალი კი 17 ნოემბერს მერაბ ბერძენიშვილის კულტურულ ცენტრ "მუზაში" გაიმართება, სადაც 19 საათიდან სხვა არაერთი საინტერესო ღონისძიებაცაა დაგეგმილი.
სტუმრები იხილავენ კლიპს კოტე მახარაძის ყველა როლით, უჩვენებენ უკრაინელთა მიერ რუსულ ენაზე გადაღებული დოკუმენტური ფილმს "კოტე მახარაძის ეპოქა" და მოეწყობა კოტე მახარაძის წიგნის, "ორი ბატონის მსახურის" განახლებული ვერსიის პრეზენტაცია.
საიუბილეო ღონისძიებების ორგანიზატორები საპატიო სტუმრებს, ცნობილ სპორტსმენებსა და მსახიობებს რუსეთიდან, უკრაინიდან, სომხეთიდან და აზერბაიჯანიდან ელიან.
ყოველდღიური სპორტული გაზეთი "ლელო"
