დნიპრო-ზესტაფონი 8:2
ვიდეო გოლები: 1:0 ზოზულია (10), 2:0 ოლეინიკი (20), 3:0 კონოპლიანკა (23), 4:0 კონოპლიანკა (34), 5:0 კალინიჩი (37), 5:1 წინამძღვრიშვილი (40), 5:2 მაზუხი (57 ს.კ.), 6:2 მატეუსი (66), 7:2 ბოხაშვილი (89), 8:2 შახოვი (90)
დნიპრო: ლაშტუვკა - პაშაევი, მაზუხი, ოლეინიკი (46. კულაკოვი), მანძიუკი - კონოპლიანკა (62. ოლეინიკი), როტანი (77. ბოხაშვილი), კრავჩენკო (69. შახოვი), შახოვი (46. ჟულიანო) - ზოზულია (46. მატეუსი) - კალინიჩი (69. ზოზულია)
მწვრთნელი: ხ. რამოსი
ზესტაფონი: მამალაძე (83. მეშველიანი) - ბენაშვილი (46. თ. ღონღაძე), გ. ონიანი (75. ხიდეშელი), გაგოშიძე
მწვრთნელი: გ. ჭიაბრიშვილი
გაფრთხილება: როტანი (29), კალინიჩი (54), ღონღაძე (61), კულაკოვი (85)
გაძევება: როტანი (72)
ესპანურ შეკრებაზე მყოფმა "ზესტაფონმა" პირველი საკონტროლო მატჩი ჩაატარა, რომლისგანაც საქართველოს ჩემპიონებმა დიდი რაოდენობით უარყოფითი ემოციები მიიღეს. გასაგებია, რომ ამხანაგური შეხვედრის ანგარიშს არასდროს აქვს გადამწყვეტი მნიშვნელობა, მაგრამ 2:8 მაინც ნამეტანია.
"დნიპროს" უპირატესობა განსაკუთრებით თვალსაჩინო პირველ ტაიმში იყო, როცა "ზესტაფონის" ძირითად შემადგენლობაში გამწესებულ ახალწვეულთა უმრავლესობამ დაკისრებულ მოვალეობებს თავი ვერ გაართვა და უკრაინის ჩემპიონატის მეოთხეადგილოსანს ფეროელთა კარში გოლი გოლზე დაუბრკოლებლად გაჰქონდა.
შესვენების შემდეგ მოედანზე "ზესტაფონის" ოპტიმალურთან მიახლოებული შემადგენლობა გამოჩნდა, რომელმაც "დნიპროს" გარკვეული ხიფათი შეუქმნა და გოლის გარდა, რამდენიმე სახიფათო მომენტიც გვიჩვენა.
სამწუხაროდ, ბოლო წუთებში ხუანდე რამოსის გუნდმა კიდევ ორი ბურთი გაიტანა და ანგარიში კატასტროფული გახადეს. არადა, 72-ე წუთიდან მოყოლებული, დნეპროპეტროვსკელები 10 ფეხბურთელით თამაშობდნენ. ყველაზე მეტად თვალშისაცემი ის იყო, რომ "დნიპრო" "ზესტაფონს" ფიზიკურ მომზადებაში საგრძნობლად აღემატებოდა.
როგორც ოქმიდან ხედავთ, ერთი გოლი "ზესტაფონის" კარში ქართული წარმოშობის ევგენი ბოხაშვილმა გაიტანა.
ვფიქრობთ, ასეთი ანგარიშის შემდეგ ყოველგვარ აზრს მოკლებულია შეხვედრის საინტერესო ეპიზოდების გახსენება და გოლების აღწერა. ვიმედოვნებთ, ამ მარცხიდან "ზესტაფონის" სამწვრთნელო შტაბი სათანადო დასკვნებს გამოიტანს, ნაკლოვანებების გამოსწორებაზე ეფექტურად იმუშავებს და ესპანეთში დარჩენილ სამ მატჩს გუნდი გუშინდელზე გაცილებით ხარისხიან და შედეგიან ფეხბურთს ითამაშებს.
რაც შეეხება პოზიტივს, ნახევარწლიანი იძულებითი შესვენების შემდეგ ფეხბურთს გუშინ დაუბრუნდა გიორგი ხიდეშელი.
"ზესტაფონის" შემადგენლობაში გუშინ ვერ ითამაშეს მეკარე როინ კვასხვაძემ, რომელმაც ხელი იტკინა, მამუკა კობახიძემ, რომელსაც სახეზე დამცავი ნიღაბი უკეთია და მწვრთნელებმა მისი მოედანზე გაყვანა ვერ გარისკეს, და ზურაბ მენთეშაშვილმა, რომელსაც ბრონქები აწუხებდა.
3 თებერვალს "ზესტაფონი" "მარბელას თასს" ყაზანის "რუბინთან" დაპირისპირებით იწყებს და დიდი შანსია, ფეროელებს ზემოთ ნახსენები სამი ფეხბურთელი ამ მატჩშივე დაუბრუნდეთ. რაც შეეხება ესპანეთში წაყვანილ აბაიომი ოვონიკოკოს, ახლად გამოჯანმრთელებულ ნიგერიელს იქ თამაში, ალბათ, არ მოუწევს.
ყოველდღიური სპორტული გაზეთი "ლელო"
