"ორმხრივი კონსულტაციების შემდეგ, კლუბის პრეზიდენტ გურამ რუხაძესთან შეთანხმების საფუძველზე, "ვიტ ჯორჯიას" მთავარმა მწვრთნელმა ზურაბ ბერიძემ მიიღო გადაწყვეტილება თანამდებობიდან გადადგომის შესახებ.კლუბის ხელმძღვანელობა მადლობას უხდის ზურაბ ბერიძეს გაწეული მუშაობისათვის და იმედს გამოთქვამს, რომ იგი კვლავაც ერთგულად გააგრძელებს მოღვაწეობას "ვიტ ჯორჯიას" საკლუბო სტრუქტურაში.
ზურაბ ბერიძე 1999 წლიდან მუშაობს ვიტ ჯორჯიაში და სხვადასხვა დროს წვრთნიდა, როგორც "ვიტ ჯორჯიას" პირველ გუნდს, ასევე დუბლშემადგენლობისა და ჭაბუკთა გუნდებს".
"კლუბის პრეზიდენტმა გურამ რუხაძემ მიიღო გადაწყვეტილება მერაბ კოჭლაშვილის გუნდის მთავარ მწვრთნელად დანიშვნის შესახებ. მერაბ კოჭლაშვილმა უკვე ჩაატარა პირველი
მერაბ კოჭლაშვილის ხელმძღვანელობით "ვიტ ჯორჯიამ" 2004 წელს პირველად მოიპოვა საქართველოს ჩემპიონის ტიტული, ბოლოს ის 2010-2011 წლების სეზონში წვრთნიდა "ვიტ ჯორჯიას" მთავარ გუნდს.
მიმდინარე სეზონში ის წარმატებით ხელმძღვანელობდა "ვიტ ჯორჯიას" 1994/95 წლებში დაბადებულ ჭაბუკთა გუნდს, რომელმაც არაერთი გამოსარჩევი თამაში ჩაატარა და ჯერჯერობით მეორე ადგილს იკავებს".
(სტილი დაცულია, რედ.)
* * *
გადავწყვიტეთ, "ვიტ ჯორჯიას" ოფიციალურ ვებგვერდზე გამოქვეყნებული ეს ორი ინფორმაცია ჩვენეული შეფასების გარეშე გაგაცნოთ. სამაგიეროდ, შემოგთავაზებთ კლუბის პრეზიდენტის, გურამ რუხაძესთან მცირე ინტერვიუს.
- ამ გადაწყვეტილებამდე ორმხრივი კონსულტაციების შედეგად მივედით. ჩვენი და ზურაბ ბერიძის აზრები ერთმანეთს დაემთხვა - "ვიტ ჯორჯიას" ახალი მთავარი მწვრთნელი სჭირდებოდა.
- უნდა ვივარაუდოთ, რომ ეს გადაწყვეტილება რვა საუკეთესო გუნდში ვერმოხვედრის გამოა მიღებული.
- რა თქმა უნდა. "ვიტ ჯორჯია" ყოველთვის ამბიციური კლუბი იყო და მაღალი მიზნებისთვის იბრძოდა. ზედა რვა გუნდში ვერმოხვედრა კი ჩვენთვის ცუდი შედეგია.
მე, როგორც პრეზიდენტი, დღევანდელი სატურნირო მდგომარეობით უკმაყოფილო ვარ. თან ისიც უნდა გავითვალისწინოთ, რომ კლუბის ხელმძღვანელობას გუნდისთვის არაფერი დაუკლია - მოვაწყვეთ ორი უცხოური შეკრება, წამყვან ფეხბურთელებს ხელფასები გავუზარდეთ, ხელფასები გაიცემა წინსწრებით, დროულად რიგდება პრემიები, გვაქვს ახალი ეკიპირება.
იმასაც შეგახსენებთ, რომ ბოლო ორი სატრანსფერო სეზონია, "ვიტ ჯორჯია" არც ერთ წამყვან ფეხბურთელს არ დაუტოვებია.
- სეზონის წინ გუნდს რა ამოცანა დაუსახეთ?
- ევროთასებზე გასვლა დღის წესრიგში კატეგორიულად არ იდგა, ჩვენი მიზანი უმაღლესი ლიგის რვა საუკეთესო გუნდში მოხვედრა იყო.
- რატომ შეაჩერეთ არჩევანი კვლავ მერაბ კოჭლაშვილზე?
- იმიტომ, რომ გამოცდილი და კვალიფიციური სპეციალისტია, კარგად იცნობს კლუბის მუშაობის სპეციფიკას და ჩახედულია ქართული ფეხბურთის ნიუანსებში. როცა შარშან მან თანამდებობა დატოვა, მაშინ ჩვენი აზრები გაიყო, მაგრამ მერაბმა გადაწყვიტა, "გაგრასთან" თასის ნახევარფინალში განცდილი მარცხის გამო მუშაობა აღარ გაეგრძელებინა.
საერთოდ, მინდა ვთქვა, რომ ჩვენ მწვრთნელებს დროში არ ვზღუდავთ. რამაზ მუმლაძემ "ვიტ ჯორჯიაში" ოთხი სეზონი გაატარა, მერაბ კოჭლაშვილი მთავარი მწვრთნელი არაერთხელ ყოფილა, მშვიდად მუშაობის საშუალება ჰქონდა ზურაბ ბერიძესაც. ამ დრომდე საკუთარ თანამდებობაზე მხოლოდ იგი და მარტვილის "მერანის" მთავარი მწვრთნელი მალხაზ ჟვანია მუშაობდნენ სეზონის სტარტიდან მოყოლებული. ბუნებრივია, კოჭლაშვილი ჩვენი ნდობით ახლაც ისარგებლებს.
- როგორც "ვიტ ჯორჯიას" საიტიდან შევიტყვეთ, კლუბში რჩება ზურაბ ბერიძეც.
- ზურაბი "ვიტ ჯორჯიას" მკვიდრი და სტაჟიანი წევრია. კლუბი 1997 წელს ჩამოვაყალიბეთ და ბერიძე მას შემდეგ ჩვენთანაა. გვინდა, რომ დარჩეს. მისი ცოდნა და გამოცდილება მომავალშიც გამოგვადგება.
ყოველდღიური სპორტული გაზეთი "ლელო"
