ცხადია, საქართველოს ევრო 2020-ის მასპინძლობის დიდი შანსი არ აქვს. აზერბაიჯანის მილი-მეჯლისში ევროპის ჩემპიონატის სამასპინძლოდ საქართველო-აზერბაიჯანის ერთობლივი განაცხადის ინიციატივის გაჟღერებისთანავე გაჩნდა არაერთი კითხვა. თურქეთში გამართულ კონგრესზე უეფას პრეზიდენტის, მიშელ პლატინის სიტყვებმა კი, მე თურქეთის კანდიდატურას დავუჭერ მხარსო, ყველა დანარჩენს გარკვევით მიანიშნა, რომ ჩვენი მეზობლები ევრო 2020-ის ყველაზე რეალური პრეტენდენტები არიან.
დღევანდელი გადასახედიდან, ჩვენი განაცხადის ქვეტექსტი ასე ჩანს - საქართველო ცდილობს, მსოფლიოს აჩვენოს, ჩვენთან დიდი ძვრებია და სხვა ვართ, ვიდრე გვიცნობდითო.
და კიდევ - ამ განაცხადის შემდეგ საფეხბურთო და მთლიანად ქვეყანაში დიდი
15 მაისი უეფაში განაცხადის შეტანის ბოლო დღე იყო. სპორტისა და ახალგაზრდობის საქმეთა სამინისტროში მინისტრმა ლადო ვარძელაშვილმა და ფეხბურთის ფედერაციის პრეზიდენტმა ზვიად სიჭინავამ ერთობლივი საგანგებო ბრიფინგი გამართეს და დაგვრჩა შთაბეჭდილება, რომ ქართული სპორტის და ფეხბურთის მმართველი ორგანიზაციები ოცნებიდან პრაგმატულ ქმედებაზე გადადიან.
ლადო ვარძელაშვილი: "საქართველო და აზერბაიჯანი, აზერბაიჯანის მხარის ინიციატივით... დიახ, ხაზს ვუსვამ, მათი ინიციატივით, ევროპის 2020 წლის ჩემპიონატის ერთობლივად მასპინძლობის შესახებ უეფაში განაცხადის შეტანაზე შევთანხმდით.
ამ ინიციატივასა და საორგანიზაციო დეტალებზე ბოლო პერიოდში მიმდინარეობდა მოლაპარაკებები საქართველოსა და აზერბაიჯანის ფეხბურთის ფედერაციებსა და ჩვენი ქვეყნების სახელმწიფო სტრუქტურებს შორის.
მაგრამ აზერბაიჯანს 2020 წლის ზაფხულის ოლიმპიადის მასპინძლობა სურს და საამისოდ სერიოზული კამპანია აქვს დაგეგმილი. ამიტომ საერთო შეთანხმებით გადაწყდა, რომ აზერბაიჯანის მხარე ბრძოლას ოლიმპიადის ჩატარების უფლების მიღებისთვის გააგრძელებს, საქართველო კი - ევრო 2020-ის მასპინძლობისთვის და უეფაში განაცხადს დამოუკიდებლად შეიტანს.
საქართველო მზარდი ტურისტული შესაძლებლობების ქვეყანაა და მომავალ წელს 5 მილიონამდე ტურისტს ველით. ასეთი მასშტაბური ტურნირის ორგანიზება დადებითად იმოქმედებს ქვეყნის სამომავლო განვითარებაზე.
საქართველოში ფეხბურთის სამომავლო განვითარების კუთხით დაიწყება ახალი პერიოდი და ქვეყანა სწრაფი ტემპებით პირდაპირ ჩაერთვება ევროპის 2020 წლის ჩემპიონატის მზადების ძალზე მასშტაბურ კამპანიაში. ეს იმ შემთხვევაში, უეფას სტანდარტებით გათვალისწინებულ საპროცედურო ეტაპებს თუ გადავლახავთ.
შედეგს რომ ვერც მივაღწიოთ, ეს განაცხადი მოგვცემს საშუალებას, რომ განვახორციელოთ მსხვილი პროექტები და განვაახლოთ ცენტრალური სტადიონები, ბაზები, მთლიანად ქვეყნისა და საფეხბურთო ინფრასტრუქტურა.
ცნობილია, რომ სახელმწიფოს დახმარებით ბათუმში ახალი ულტრათანამედროვე სტადიონის მშენებლობა იწყება. ევროპულ სტანდარტებთან შესაბამისობაში მოვა რეგიონებსა და თბილისში მდებარე ყველა სტადიონის ინფრასტრუქტურა, ქუთაისის, ზესტაფონის, ზუგდიდის, ლანჩხუთის, გორის, ქობულეთის, თელავის..."
ზვიად სიჭინავა: - ევრო 2020-ის მასპინძლობაზე უეფაში განაცხადების შეტანის ვადა დღეს იწურებოდა. სფფ-მ უეფას გენერალურ სამდივნოში 14 მაისს გენერალური მდივნის, ჯანი ინფანტინოს სახელზე გაგზავნილ საგანგებო წერილში ოფიციალურად დაადასტურა საქართველოს სურვილი - უმასპინძლოს ევროპის 2020 წლის ჩემპიონატს.
წინ დიდი და რთული გზაა. ახლა უნდა დაველოდოთ, როდის განიხილავს უეფას გენერალური სამდივნო ჩვენს განაცხადს. ესაა ჩვენი სურვილის დამადასტურებელი ოფიციალური წერილი და თუ ამ მოთხოვნას დააკმაყოფილებენ, შემდეგ უკვე ეტაპობრივად მოგვიწევს ზრუნვა ჩემპიონატის ლოგოს, სლოგანისა და სხვა მნიშვნელოვანი დეტალების შექმნასა და მოფიქრებაზე.
- ამხელა ხარჯს საკუთარ თავზე ვინ აიღებს?
- ეს წერილი არის სურვილის დაფიქსირება და მხოლოდ პირველი ეტაპია. თუ მეორე ეტაპზე გავედით, ვალდებულება უნდა ავიღოთ, რომ უეფას მკაცრ მოთხოვნებს დავაკმაყოფილებთ და ეს ვალდებულებები აუცილებლად უნდა შევასრულოთ. მერე კი ხარჯები განაწილდება - ნაწილს თავის თავზე სახელმწიფო აიღებს, ნაწილსაც - კერძო სექტორი.
ლადო ვარძელაშვილი: - შესაძლოა, ბევრმა თქვას, რომ გაუაზრებელი ნაბიჯია, რადგან ევროპის ჩემპიონატის მასპინძლობის არანაირი შანსი არ გვაქვს.
ჩვენთვის მთავარია, რომ ამ პროცესის მონაწილენი გავხდეთ, მეორე-მესამე ეტაპამდე გავაღწიოთ და საქართველოს ახალი თანამედროვე სტადიონები შეემატოს. თუნდაც მხოლოდ ამიტომ ღირს მონაწილეობა.
უეფა საბოლოო არჩევანს 2014 წელს გამოაცხადებს და მანამდე დიდი დრო გვაქვს.
- იდეაში, ევროჩემპიონატის მასპინძლად საქართველოს რომელ ქალაქებს მოიაზრებთ?
- თბილისს, ბათუმს, ქუთაისს, გორსა და ზუგდიდს.
"საქართველომ ევრო 2020-ის მასპინძლობაზე განაცხადი შეიტანა" (იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ
UEFA: ევროპის ჩემპიონატის ჩასატარებელი მოთხოვნები
