ქუთაისის "ტორპედო" სეზონისთვის სლოვენიაში ემზადება და უკვე ორი საკონტროლო შეხვედრა ჩაატარა. ქუთაისელები პირველი შეხვედრაში ალბანეთის ჩემპიონ "შკენდერბეუსთან" 0:2 დამარცხდნენ, ხოლო ბუქარესტის "სტიაუასთან" ფრედ, 1:1 ითამაშეს. მოსამზადებელ ეტაპზე გუნდის მთავარმა მწვრთნელმა გია გეგუჩაძემ "ტორპედოს" პრეს-სამსახურთან კომენტარი გააკეთა:
"თავისთავად ცხადია, ალბანურ და რუმინულ კლუბებთან შეხვედრებში ჩვენი დადებითი მხარეებიც გამოჩნდა და უარყოფითიც.
ჯერ უარყოფითს ვიტყვი: მიმაჩნია, რომ პირველ მატჩში სუსტ მოწინააღმდეგესთან დავმარცხდით. ალბანელებთან გამოჩნდა, რომ საგოლე მომენტების შექმნა გვეხერხება, თუმცა, რეალიზაცია გვიჭირს.
"სტიაუასთან" თამაში გამოვასწორეთ, უფრო უკეთ მოვახერხეთ ლამაზი და კომბინაციური ფეხბურთის ჩვენება.
მეორე ტაიმში ჩვენი მოთამაშე ორჯერ დარჩა მეკარესთან პირისპირ და ვერც ერთ ამ შემთხვევაში გოლი ვერ გავიტანეთ. თუმცა, მახარებს ის ფაქტი, რომ ამჯერად დაცვაში უფრო საიმედოდ ვითამაშეთ.
შეკრებაზე სპარინგებს სხვა დატვირთვა აქვს და ფეხბურთელებს სრულად დახარჯვას ვერ მოვთხოვთ - ისინი დატვირთვების ფონზე თამაშობენ და ბოლომდე გახსნილები არ არიან. თუმცა, მიმაჩნია, რომ 5 ივლისისთვის, როდესაც ევროპის ლიგის პირველი მატჩი უნდა ჩავატაროთ, გამოიკვეთება ძირითადი შემადგენლობის კონტურები, ვინ უკეთ არის მომზადებული და ვინ არა. ახლა კი გეგმის მიხედვით მივდივართ.
შემდეგ შეხვედრას "ტორპედო" უკრაინის ჩემპიონ დონეცკის "შახტართან" ჩაატარებს. რა თქმა უნდა, ძლიერ გუნდებთან თამაშისას გამოჩნდება ჩვენი მომზადების დონე, სუსტი მხარეები და რა მიმართულებით უნდა ვიმუშავოთ.
შემდეგ ვარჯიშები ამ ნაკლის აღმოფხვრას დაეთმობა. ახლა კი საგანგაშო არაფერი არ ხდება. პირიქით, ამ ეტაპზე "ტორპედოს" მომზადების დონით კმაყოფილი ვარ".
ყოველდღიური სპორტული გაზეთი "ლელო"
ასევე იხილეთ
ავსტრიულ შეკრებაზე მყოფი ქუთაისის "ტორპედო" რუმინულ "სტიაუას" დაუზავდა
ქუთაისის "ტორპედომ" ავსტრიული შეკრება წაგებით დაიწყო
გია გეგუჩაძე: ყოველ წელს უკეთესი შედეგის მიღწევის პრეტენზია გამაჩნია
