გორის "დილა" ახლოს არის მიზანთან და დარჩა შანსი, თბილისის "დინამოს" რვა წლის წინანდელი შედეგი გაიმეოროს და ევროპის ლიგის ჯგუფურ ეტაპზე მოხვდეს. რა თქმა უნდა, ეს ისე იოლი ამოცანა არ არის, მაგრამ პორტუგალიურ "მარიტიმუსთან" პლეი ოფის პირველმა შეხვედრამ გამოაჩინა, რომ მისია შეუსრულებელი ნამდვილად არ არის.
შეხვედრას ორივე გუნდი პრობლემებით შეხვდა: "მარიტიმუს" პორტუგალიელთა მთავარმა მწვრთნელმა პედრუ მარტინშმა ვერ დაიხმარა მცველი რუბენ ფერეირა, ნახევარმცველები ოლბერდამი და სემედუ. "დილას" კი დისკვალიფიცირებული მათე ვაწაძე და ტრავმირებულები, კახა ალადაშვილი, გულვერდ თომაშვილი, ზურაბ არზიანი და ირაკლი მოდებაძე
ორივე ცენტრალური თავდამსხმელის არყოფნაში გორელთა მთავარ მწვრთნელს, თემურ შალამბერიძეს სერიოზული სატკივარი გაუჩნდა - ვინ დაეყენებინა მათე-გოლის პოზიციაზე?
საბოლოოდ ფლანგიდან სანდრო გურული წასწია, მის პოზიციაზე კი ახალწვეული ირაკლი კლიმიაშვილი დააყენა.თამაში ფუნშალის "დოს ბარეიროშზე" მასპინძელთა შეტევებით დაიწყო, რაც მოსალოდნელიც იყო: მასპინძლებს საქართველოში მშვიდად ჩამოსასვლელად სახლში სასურველი ანგარიშით მოგება და გოლის არგაშვება სურდათ.
გორელებს შეტევების განვითარება უჭირდათ, მაგრამ მასპინძლებმა დიდი უპირატესობაც ვერ მოიპოვეს.
მე-17 წუთზე, ფლანგური გადაცემის შემდეგ, მეკარესთან პირისპირ სამი გადიოდა, მაგრამ გიორგი შაშიაშვილი დროულად ჩაუწვა და და ვითარება განმუხტა. მალე კი ადილსონის სახიფათო დარტყმა გორელთა მეკარე მარინ სკენდერმა მოიგერია.
პირველი სერიოზული შეტევა "დილამ" მე-20 წუთზე კუთხურის მოწოდების შემდეგ შეძლო. შეტევა წუთი გრძელდებოდა, მაგრამ სახიფათო დარტყმამდე საქმე ვერა და ვერ მიიყვანეს - დასკვნით ფაზაში სტუმრები ძალიან უგერგილოდ გამოიყურებოდნენ, რადგან მცირე ძალებით უტევდნენ.
სახიფათო კონტრშეტევა მხოლოდ 29-ე წუთზე წამოიწყეს, მაგრამ მარჯვენა ფლანგიდან გურულმა გადაცემა ვერ მოზომა და მეტოქის მოშიშვლებულ საჯარიმოში სანამ ბურთი შოთა გრიგალაშვილმა მოათვინიერა, პორტუგალიელებმა უკან დახევა და ვითარების განმუხტვა მოახერხეს.
მეორე ტაიმში მასპინძლები გააქტიურდნენ და გორელებს მეტოქის საჯარიმოში გადასვლაც გაუჭირდათ. 52-ე წუთზე რაფაელ მირანდამ სცადა მარჯვენა ფლანგიდან შეტევის წამოწყება, მახვილი კუთხიდან კარში დაარტყა თუ ჩააწოდა, მაგრამ უშედეგოდ. კუთხურიდან მოწოდებული ბურთი კარში ზუსტად ვერც სამმა გააგზავნა.
პორტუგალიელთა უპირატესობამ შედეგი მაინც გამოიღო: 64-ე წუთზე მარცხენა ფლანგიდან საჯარიმოში იოლად შევიდა რობერჟი, საჯარიმოში ფიდელისი მოძებნა, რომელიც შემოტრიალდა და ზუსტად დაარტყა - 1:0.
"დილა" მხოლოდ ამის შემდეგ გამოცოცხლდა და მწვავედაც შეუტია. მეკარე რომენ სალენი თამაშში პირველად 67-ე წუთზე გოგიტა გოგუას მოწოდებული კუთხურის შემდეგ ჩაერთო.
76-ე წუთი, ისევ კუთხური: დავით კვირკველიას ჩაწოდებული ბურთი საჯარიმოში გოგუამ მიიღო და შემოტრიალდა, ბურთი კი რობერჟს მხარზე მოხვდა. გორელები პენალტის დანიშვნას ითხოვდნენ, მაგრამ ჩეხმა არბიტრმა ლიბორ კოვარჟიკმა წესის დარღვევა ვერ შენიშნა.
ბოლოს "დილამ" შტურმის მოწყობა სცადა: 85-ე წუთზე გიორგი კახელიშვილის გადაცემას კარის წინ მყოფი გიორგი ილურიძე ვერ გამოეხმაურა; მალე რომან ახალკაცის დარტყმა მეკარე რომენ სალენმა ფეხით მოიგერია, რამდენიმე წამში კი კვირკველიას დარტყმა კარს მცირე მანძილით ასცდა.შეტევებში წასულმა "დილამ" დაცვა მოაშიშვლა და 90-ე წუთზე სწრაფი შეტევის დაგვირგვინება დანილო დიასს შეეძლო. მალე კი ფიდელისის ძლიერი დარტყმის შემდეგ "დილა" სკენდერმა გადაარჩინა.
გორის "დილას" ევროპის ლიგის ჯგუფურ ეტაპზე მოხვედრის არც ისე ცუდი შანსი დარჩა. გორელები დამარცხდნენ, მაგრამ მეტოქის ძალა და შედეგიც გვაიმედებს, რომ ამ ბარიერის დაძლევა შეუძლებელი არ არის, მით უფრო, რომ განმეორებით შეხვედრაში "დილას" წამყვანი მოთამაშეების ნაწილი მაინც დაუბრუნდება.
ევროპის ლიგა. ფლეი ოფი. პირველი მატჩი
23. 08. 2012. ფუნშალი. სტადიონი "ბარეირუში".
მარიტიმუ-დილა 1:0 (იხილეთ ვიდეო)
გოლები: 1:0 ფიდელისი (64. რობერჟის პასით).
მარიტიმუ დილა
4-3-3 4-2-3-1
სალენი სკენდერი
21 ბრიგელი შაშიაშვილი
44 ჟოაო გილერმე სალუქვაძე
16 რობერჟი გ. ონიანი
18 ოლიმი კვირკველია
26 ადილსონი გვალია
5 მირანდა ბეჭვაია
20 ჟოაო ლუიში გოგუა
90. სიმაუ გრიგალაშვილი
17 სამი კლიმიაშვილი
10 ელდონი გურული
მწვრთნელები:
პ. მარტინში თ. შალამბერიძე
მარიტიმუ
54. ადილსონი - ფიდელისი
55. ელდონი - დანილო დიასი
80. ჟოაო ლუიში - როდრიგო ანტონიო
სათადარიგოები: რიკარდო, ჟოაუ დიოგუ, იგორ როსი, იბრაჰომი.
დილა
56. კლიმიაშვილი - კახელიშვილი
63. გურული - ილურიძე
70. გრიგალაშვილი - ახალკაცი
სათადარიგოები: შეყრილაძე, ჯიშკარიანი, კაშია, კაციტაძე.
გაფრთხილება: ჟოაო ლუიში (50), შაშიაშვილი (60), გოგუა (71), სიმაუ (73), ახალკაცი (78).
არბიტრი: ლ. კოვარჟიკი (ჩეხეთი)
(იბეჭდება მცირე ცვლილებით)
ყოველდღიური სპორტული გაზეთი "ლელო"
