ბათუმის "დინამო" ორი უკრაინელი ფეხბურთელის დამატებას აპირებს: ლვოვის "კარპატიდან" უკვე ჩამოვიდნენ ივან პიცანი და ალექსანდრ ტიმშიშინი და მათ მალე განაცხადში შეიყვანენ. 21 წლის მეკარე პიცანს საკმაოდ საინტერესო ისტორია აქვს.
ივან პიცანი
დაიბადა 1990 წლის 19 იანვარს.
სიმაღლე 191 სმ, წონა - 79 კგ.
5 შეხვედრა ჩაატარა უკრაინის ასაკობრივ ნაკრებებში (U-18 და U-19).
პიცანს თავიდან კარიერა იდეალურად აეწყო: ლვოვის ფეხბურთის აღზრდილი "კარპატიში" 2007 წელს ჩაირიცხა და თავიდან "კარპატი-2"-ში თამაშობდა, მერე კი ლვოველთა ახალგაზრდულ გუნდში დააწინაურეს.
ლვოვში მასზე დიდ იმედებს ამყარებდნენ და
ევროპის 2013 წლის ჩემპიონატის შესარჩევი ციკლის დაწყებამდე პაველ იაკოვენკომ უკრაინის ახალგაზრდული ნაკრების სიაში დაასახელა.
მაგრამ ტრავმამ კარიერა აურია: 2010 წლის 23 აპრილს კიევის "დინამოს" ახალგაზრდულ გუნდთან შეხვედრაში მძიმედ დაშავდა და მას შემდეგ აღარც "კარპატიში" უთამაშია და აღარც უკრაინის ნაკრებში.
პიცანს შარშან თებერვალში "კარპატიმ" კონტრაქტი გაუწყვიტა და თავისუფალი აგენტი გახდა - ეს კლუბის გენერალურმა დირეტორმა იგორ დიდიშინმა გუნდის ოფიციალურ ვებგვერდზე განაცხადა.
ამის შემდეგ პიცანი ლუგანსკის "ზარიაში" ცდილობდა დამკვიდრებას, მაგრამ არაფერი გამოუვიდა. ეს ის პერიოდია, როდესაც ლუგანსკელებმა გასასინჯად ჯაბა ლიპარტია მიიწვიეს.
ლვოველ ახალგაზრდას ტრავმის შემდეგ ფორმის აღდგენა გაუჭირდა, რისი მიზეზიც, შესაძლოა, "კარპატის" ახალგაზრდული გუნდის მწვრთნელის, რომან ტოლოჩკოს სიტყვებმა ახსნას:
"ივანი კარგად თამაშობს კარის ხაზზეც და გამოსვლაზეც. საერთოდ, მშვენიერი რეაქცია აქვს. მისი ნაკლი კი ფსიქოლოგიაში უნდა ვეძებოთ: შესაძლოა, "აიჭრას", როდესაც ბურთს გაუშვებს".
აშკარაა, ტრავმა პიცანისთვის ის გაშვებული ბურთი აღმოჩნდა, რომლის შემდეგაც "აიჭრა", მაგრამ ბათუმში ჩასულმა კარგი შთაბეჭდილება დატოვა და იმედია, საქართველოში "მეორე სუნთქვა" გაეხსნება.
(იბეჭდება მცირე ცვლილებით)
ყოველდღიური სპორტული გაზეთი "ლელო"
