უკვე ორი ტურია, რაც საქართველოს ჩემპიონატის პირველი ლიგა განახლდა. თბილისის "ლოკომოტივი" ამ ლიგაში ერთ-ერთი ყველაზე საინტერესო გუნდია, რადგან ძირითად ბირთვს ის ფეხბურთელები წარმოადგენენ, ვასილ მაისურაძის ხელმძღვანელობით 17-წლამდელთა ევროპის ჩემპიონატის ფინალურ ეტაპზე რომ ითამაშეს.რამდენიმე წლის წინ "ლოკომოტივი" ერთ-ერთი მოწინავე გუნდი იყო ეროვნულ ჩემპიონატში. მაშინ ამ გუნდში სახელიანი ფეხბურთელები თამაშობდნენ: რატი ალექსიძე, ვიტალი დარასელია, ლევან ცქიტიშვილი...
ცხოვრებამ ისე მოიტანა, რომ "ლოკომოტივმა" მაღალბიუჯეტიანი პროექტების განხორციელება ვეღარ გააგრძელა, გუნდის შემადგენლობა ლამის მთლიანად შეიცვალა და პირველ ლიგაში ჩაქვეითდა.
"ლოკომოტივმა" ახალი პოლიტიკის გატარება დაიწყო. 5
მატჩის დასრულების შემდეგ კი "ლოკომოტივის" პრეზიდენტს ლექსო თოფურიას ვესაუბრეთ.
- თქვენი კლუბის სტრატეგია შეიცვალა და როგორ ფიქრობთ, ამით საქმე უკეთესობისკენ წავა?
- ყველაფერ ცუდს აქვს რაღაც დადებითი. "ლოკომოტივი" ახლა შანსს აძლევს ახალგაზრდა ფეხბურთელებს.
ჩვენს გუნდში მეტწილად 1995 წელს დაბადებულები თამაშობენ და თანდათან ისეთ გუნდად ყალიბდებიან, პირველ ლიგაში ასაკოვანი ფეხბურთელებით დაკომპლექტებულ მეტოქეებთან თანაბრად რომ შეუძლიათ თამაში.
- "ლოკომოტივს" საკუთარი საფეხბურთო სკოლა აქვს. ორიოდე სიტყვით გვითხარით, როგორ არის საქმე აწყობილი ამ მხრივ?
- ჩვენს სკოლას ხუთი ასაკობრივი გუნდი ჰყავს. მოზარდები ავტობუსით დაგვყავს დიღმის მასივიდან საგურამოში.
რა თქმა უნდა, ეს მაინც უძნელებს გადაადგილებას ბავშვებსა და მშობლებს. ამიტომ ვცდილობთ, რომ საგურამოდან და მისი შემოგარენიდანაც ავიყვანოთ ბავშვები ჩვენს სკოლაში, თუნდაც მცხეთიდან და ახალსოფლიდან - სელექცია ამ მიმართულებითაც უნდა ვაწარმოოთ.
- ზოგს მიაჩნია, რომ "ლოკომოტივი" ახალგაზრდა ფეხბურთელებს უცხოურ კლუბებში გასაშვებად ამზადებს და არ აინტერესებს მათი გასხვისება წამყვან ქართულ გუნდებში - მართლა ასეთი გეზი გაქვთ არჩეული?
- ჩვენ კონკრეტული მიზანი გვაქვს - პირველ ლიგაში სერიოზული გუნდის შექმნა. რა თქმა უნდა, ძნელია, რომ ამ გუნდით უცბად იბრძოლო უმაღლეს ლიგაში გადასასვლელად, მაგრამ ამ კონტინგენტის "ლოკომოტივში" და ნაკრებში ერთად თამაშით ის ძალა იქმნება, რომელსაც პერსპექტივა გაუჩნდება.
ეს ფეხბურთელები ჯერ არ არიან მზად უმაღლესი ლიგის მოწინავე გუნდებში ძირითად შემადგენლობაში დასამკვიდრებლად, თორემ შემოთავაზებები იყო. ყველაფერს დრო გვიჩვენებს.
არ არის ისე, თითქოს წინააღმდეგი ვიყოთ ამ ბიჭების საქართველოში დარჩენისა, თუმცა ისიც ფაქტია, რომ არის ინტერესი უცხოეთიდან - ჭანტურია და ჯიქია "ფრაიბურგში" იყვნენ გასინჯვაზე, ჭანტურია ლონდონის "არსენალშიც" იყო.
- როცა "ლოკომოტივი" უმაღლეს ლიგაში თამაშობდა, იყო მცდელობა, რომ საქართველოს ეროვნულ ჩემპიონატში კომერციალიზაცია რეალურად დაწყებულიყო. მედიაკომპანია "კოლხიდას" პროექტიც გვახსოვს. თითქოს ყველაფერი კარგად დაიქოქა, მაგრამ საბოლოოდ პროექტი წარმატებული არ აღმოჩნდა. რა იყო ამის მიზეზი?
- ამის სუბიექტური და ობიექტური მიზეზები არსებობს. მთავარი მიზეზი ის არის, რომ ფეხბურთი დღეს საქართველოში ბიზნესი არ არის და არც მაშინ იყო, როცა მედიაკომპანია "კოლხიდას" პროექტი დავიწყეთ.
ვფიქრობ, 5-10 წელი მაინც დასჭირდება იმას, რომ ფეხბურთი საქართველოში მარკეტინგულად განვითარდეს და გაჩნდეს ის შემოსავლები, რაც არის ძირითადი ფინანსური წყარო ევროპული ფეხბურთისთვის.
ფეხბურთში ფულს ჩვენთან იმიტომ ხარჯავენ, რომ ფეხბურთზე გული შესტკივათ. ამიტომაც "კოლხიდას" პროექტი ნაადრევი გამოდგა. ამას დაერთო მსოფლიო ფინანსური კრიზისი.
სხვათა შორის, აგვისტოს ომის შემდეგ "კოლხიდამ" კიდევ ერთი წელი გააგრძელა ფუნქციონირება.
ხელი შეგვიშალა იმანაც, რომ მაშინ უფრო ბევრს საუბრობდნენ საეჭვო თამაშებზე და გულშემატკივრების მხრიდანაც უნდობლობა იყო ჩვენი ეროვნული ჩემპიონატის მიმართ. ახლა ამ მხრივ ვითარება კარდინალურად შეიცვალა...
სად არის ბიზნესი? (იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
"ფრაიბურგი" ქართველ ფეხბურთელებს ისევ იწვევს
გელა სანაია: ამ ბიჭებით უმაღლესში დავბრუნდებით
თბილისის "ლოკომოტივი" - ბარსელონადან საგურამომდე
