დინამო VS კლუჟი - მესამე სპარინგი ჩემპიონთა ლიგის საზომებით

ავსტრიული მოსამზადებელი ეტაპის მორიგ, რიგით მესამე სპარინგს თბილისის "დინამო" 27 ივნისს, რუმინულ "კლუჟთან" გამართავს.

შეხვედრა კირხდორფის საფეხბურთო მოედანზე თბილისის დროით 17:00 საათზე დაიწყება და გულშემატკივარს დაპირისპირების ტექსტური რეპორტაჟის ხილვა კლუბის ოფიციალურ ვებ-გვერდზე შეეძლება.

შეგახსენებთ, რომ ავსტრიულ შეკრებაზე დუშან უჰრინის გუნდმა კიევის "დინამოსთან" და დონეცკის "შახტართან" მოსინჯა ძალები. "დინამო" კიეველებთან 0:1 დამარცხდა, შემდეგ კი ამავე ანგარიშით დონეცკურ გრანდს აჯობა.

1907 წელს დაარსებულმა კლუბმა სახელწოდება 13-ჯერ შეიცვალა. 2006 წლის შემდეგ გუნდს CFR Cluj ეწოდება. "კლუჟი" საშინაო შეხვედრებს 1973 წელს აგებულ სტადიონზე ატარებს, რომელიც რუმინელი ლეგენდარული მწვრთნელის, კონსტანტინ რედელსკუს სახელობისაა და 23 500 მაყურებელს იტევს.

2013 წლიდან გუნდის მთავარი მწვრთნელის თანამდებობას მირჩა რედნიკი იკავებს, რომელმაც თავის სამწვრთნელო კარიერაში ორ-ორჯერ მოიგო რუმინეთის ჩემპიონატი და თასი, 3-ჯერ კი ქვეყნის სუპერთასი.

კლუჟი პირველი არადედაქალაქური გუნდი იყო, რომელმაც რუმინეთის ჩემპიონატი მოიგო და ჩემპიონთა ლიგის ჯგუფურ ეტაპზე თამაში მოახერხა.

დინამოელთა სპარინგ-მეტოქემ რუმინეთის ჩემპიონატი 3-ჯერ (2007/08, 2009/10, 2011/12) მოიგო, ასევე 3-ჯერ (2007/08, 2008/09, 2009/10) აქვს მოგებული რუმინეთის თასი, 2-ჯერ (2009 და 2010 წელს) მოიგო ქვეყნის სუპერთასი.



რუმინული კლუბი გასულ სეზონში ჩემპიონთა ლიგის გათამაშების ჯგუფურ ეტაპზე მონაწილეობდა, სადაც მესამე ადგილი დაიკავა და ევროპის ლიგის 1/16-ფინალურ ეტაპზე ორმატჩიან დაპირისპირებაში მილანის "ინტერთან" დამარცხდა.

ავსტრიულ შეკრებაზე მყოფმა რუმინელებმა ბოლო ამხანაგური შეხვედრა გერმანიის მესამე ბუნდესლიგის წარმომადგენელთან, "ვაკერ ბურგჰაუზაენთან" გამართეს და მეტოქეს ორბურთიანი სხვაობით - 3:1 სძლიეს.

მომზადებულია www.fcdinamo.ge-ის მიხედვით

ასევე იხილეთ:
წილისყრა. თბილისის "დინამო": ხანდახან ჩვენც ხომ უნდა გაგვიმართლოს!
დინამო-შახტარი 1:0 - კარგი განწყობა ჩემპიონთა ლიგის წინ [VIDEO]
დინამო (თბილისი)-დინამო (კიევი) 0:1 - პირველი სპარინგი ავსტრიაში [VIDEO]
დინამო-შირაქი 1:1 - ახა­ლი გუნ­დის კონ­ტუ­რე­ბი [VIDEO]