დვალის ბენეფისი: დუბლი და საგოლე პასი

მოყვარულებით დაკომპლექტებულ „ფაეტანოსთან" „მოთელვის" შემდეგ ევროპის ლიგის მეორე საკვალიფიკაციო ეტაპზე „ზესტაფონს" სლოვაკური „დუკლას" სახით გაცილებით ძლიერი მეტოქე ჰყავდა. ზესტაფონელებს თავიანთი ძალა და საევროპო ამბიციები სწორედ „დუკლასთან" პაექრობაში უნდა დაემტკიცებინათ. თუ როგორ მოახერხეს ეს იმერლებმა ანგარიშიდანაც კარგად ჩანს. გეგუჩაძის საოცრად მოტივირებულმა ბიჭებმა ბანსკა- ბისტრიცელები  სწრაფი, კომბინაციური და ტექნიკური ფეხბურთით ყველა კომპონენტში დაჯაბნეს და ფაქტობრივად ცალი ფეხით ევროპის ლიგის შემდეგ ეტაპზე გადააბიჯეს.

ზესტაფონში მატჩისთვის ტრადიციულად კარგი საფეხბურთო გარემო იყო შექმნილი. გულშემატკივრებმა ნახევარი საათით ადრე გაავსეს ტრიბუნები და საყვარელ კლუბს მხურვალედ უქომაგეს. შეხვედრა

საკმაოდ მარალ ტემპში, დინამიურად დაიწყო და ასეც გაგრძელდა. ორივე გუნდის მწვრთნელმა 4-4-2 სათამაშო სქემა აირჩია. პირველი სახიფათო მომენტი მასპინძლების კართან შეიქმნა, ზესტაფონელებმა მოედნის ცენტრში დაკარგეს ბურთი, რასაც მათ კარში დანიშნული სახიფათო ჯარიმა მოჰყვა, თუმცა გაიდოშის ძლიერი დარტყმა კვასხვაძემ მოიგერია. ეს იყო და ეს. ამის შემდეგ ზესტაფონელები მთლიანად დაეუფლნენ უპირატესობას და მატჩის დებიუტშივე შეეძლოთ ეხეირათ. ბაბუნაშვილის კუთხურის შემდეგ მცველთაგან უყურადღებოდ მიტოვებული დვალი ურტყამდა სახიფათოდ, მაგრამ ხელსაყრელი პოზიციიდან ოდნავ ააცილა, მეორე ეპიზოდში კი გელაშვილის დარტმის შემდეგ სლოვაკები მეკარე ბოროშმა იხსნა გოლისგან. ამას ისევ დვალის დარტყმა მოჰყვა და კვლავ მეკარემ ივაჟკაცა. სლოვაკებმა დვალის გაჩერება ვერაფრით მოახერხეს, ჯაბას მოედნის ყველა კუთხეში ნახავდით, როცა საჭირო იყო მცელებსაც ეხმარებოდა, შეტევაში კი შეუჩერებელი იყო. 13 წუთზე მისი აქტიურობის შემდეგ ბენაშვილი ურტყამდა ძლიერად და მეკარე ბოროშმა ისევ მოახერხა ბურთის მოგერიება. მომწიფებული გოლი 24-წუტზე გავიდა, ბაბუნაშვილის ფლანგური ჩაწოდების შემდეგ გელაშვილმა ბურთს თავით შეუცვალა მიმართულება, რის შემდეგაც დვალმა თავური დარტყმით ზესტაფონელები დააწინაურა 1:0 მასპინძლებმა გოლის შემდეგ მეტოქეზე დაწოლა კიდევ უფრო გაამწვავეს და გრიგალაშვილს საჯარიმო დარტყმით შეეძლო თავის გამოჩენა, თუმცა ისევ მეკარე ბოროში იყო მოწოდების სიმაღლეზე. ზესტაფონი უპირატესობას ფლობდა თუმცა, „ბრჭყალები" სლოვაკებმაც გამოაჩინეს. 31-წუტზე მათ კონტრშეტევას ხუჩკოს ძლიერი დარტყმა მოჰყვა, ბურთი მცველს მოხვდა და კარისკენ უხერხული ტრაექტორიით წავიდა, თუმცა მასპინძელთა საბედნიეროდ მიზანს მცირედით ასცდა. სავიჩის კუთხურს ადამიკის სახიფათო თავური მოჰყვა თუმცა, კვლავ უზუსტო. ტაიმის ბოლოს ზესტაფონელებმა ბანსკა-ბისტრიცელებს შტურმი მოუწყვეს და რომ გამართლებოდათ შესვენებაზე უფრო სოლიდური სხვაობით გავიდოდნენ, მაგრამ კვლავ ითამაშა თამაშობდა პიტერ ბოროშმა, რომელმაც დვალის ურთულესი დარტყმა მოიგერია. კარგად ჩაერთო თამაშში ბაბუნაშვილის ნაცვლად შემოსული თორნიკე აფციაური, რომლის გადაცემის შემდეგ გელაშვილი ურტყამდა თავით და  ბურთი ხარიხას მცირედით გადასცდა. 

თამაშის იშტაზე მოსულ მასპინძლებს უპირატესობა შესვენების შემდეგაც არ გაუშვიათ ხელიდან და თითქმის მატჩის განახლებისთანავე გაზარდეს სხვაობა. 48-წუთზე დვალმა ძარია გაიყვანა მეკარესთან პირისპირ და ამანაც სლოვაკთა მრავალჯერ გადამრჩენელ ბოროშს შანსი აღარ დაუტოვა - 2:0 65-წუთზე გეგუჩაძის ბიჭებმა ანგარიშს კიდევ უფრო სოლიდური სახე მისცეს-გრიგალაშვილის ჯარიმა მეკარემ მოიგერია, მცველებმა ბურთი ვერ გამოიტანეს, ყველას ჯაბა დვალმა დაასწრო და ნახევარბრუნში ბოროშს აუღებელი დაურტყა-3:0 ბოლოს, შეცვლაზე შემოსულ კახა ალადაშვილს შეეძლო „ზესტაფონში" თავისი სადებიუტო შეხვედრა გოლით აღენიშნა, თუმცა მისი უძლიერესი საჯარიმო დარტყმა სლოვაკთა მეკარემ რის ვაივაგლახით მოიგერია. სტუმრები ბოლოს კი გააქტიურდნენ, მაგრამ კვასხვაძის კართან რაიმე სახიფათო მომენტი არ შექმნილა. „ზესტაფონმა" დამაჯერებელი გამარჯვება მოიპოვა და განმეორებითი შეხვედრისთვის სოლიდურ ფორას დაეუფლა. შეგახსენებთ, რომ საპასუხო შეხვედრა ბანკა-ბისტრიცაში 22 ივლისს გაიმართება.

მატჩის შემდეგ
კაროლ მარკო: „ჩვენმა მეტოქემ ძალზედ ტექნიკური ფეხბურთი ითამაშა და სამი უპასუხო გოლი გაგვიტანა. შედეგით იმედგაცრუებული ვარ, თუმცა უკვე ვიცი თუ როგორ უნდა ვითამაშოთ საპასუხო მატჩში „ზესტაფონის" წინააღმდეგ. ძალიან დიდი ფორაა, მაგრამ დასაკარგი არაფერი გვაქვს და საკუთარ არენაზე ბოლომდე ვიბრძოლებთ."

გია გეგუჩაძე: „მიუხედავად იმისა, რომ დიდი ანგარიშით გავიმარჯვეთ რთული თამაში იყო. ძალიან გაგვიჭირდა, საშინელი სიცხე იყო, თანაც მეტოქეც ძლიერი გვყავდა. „დუკლა" დისციპლინებული და მებრძოლი გუნდია, რომელმაც კონტრშეტევებზე ააგო თამაში. ბიჭებმა მოინდომეს და მაქსიმუმი გაიღეს. მათ შრომას ძალიან ვაფასებ, მაგრამ შეიძლებოდა უფრო სოლიდური ანგარიშითაც მოგვეგო, მაგრამ სამწუხაროდ უამრავი საგოლე მომენტი ვერ გამოვიყენეთ. ყველას გთხოვთ, რომ ნუ ჩათვლით თითქოს ჩვენი გუნდი უკვე შემდეგ ეტაპზეა. სლოვაკეთში ურთულესი თამაში გველის და წინასწარ გამარჯვებას ვერ ვიზეიმებთ."

ჯაბა დვალი: „ძალიან გახარებული ვარ. მეტოქე ყველა კომპონენტში დავჯაბნეთ, 3:0 მოვიგეთ და რაც მთავარია გოლი არ გაგვიშვია. თუმცა, შემდეგ ეტაპზე ჯერ არ გავსულვართ, სლოვაკეთში დიდი ბრძოლა გველის და ყველაფერს გავაკეთებთ, რომ იქაც გავიმარჯვოთ."

ზესტაფონი-დუკლა 3:0
ზესტაფონი. სტადიონი დავით აბაშიძე" 4000 მაყურებელი
გოლები: 1:0 დვალი (24. გელაშვილის პასით), 2:0 ძარია (48. დვალის პასით), 3:0 დვალი (65)
ზესტაფონი: რ.კვასხვაძე - ბენაშვილი, ონიანი, ხიდეშელი, ელიავა - ძარია, დაუშვილი, ბაბუნაშვილი (30.აფციაური), გრიგალაშვილი - გელაშვილი (79.ფიფია), დვალი (79.ალადაშვილი)
სათადარიგოები: მამალაძე, კობახიძე, ლომია, გორგიაშვილი.
დუკლა: ბოროში - ბრაშენი, ადამიკი, პოლიოვკა, სავიჩი - პანჩიკი, პლევა, პოვაჟანეცი, ხუჩკო (66.პიხი) - გაიდოში (77.დურიცა), დურიში
სათადარიგოები: დურჩო, გონოსი, უშკოვიჩი, ვაიდა, ჰლინკა.
გაფრთხილება: სავიჩი(8), ბრაშენი(37), დურიში (60), გელაშვილი (60), დაუშვილი (90)
არბიტრი: ვიაჩესლავ ბანარი (მოლდოვა)