ბოლნისის "სიონის" მენეჯმენტი რეგიონში საუკეთესოდ აღიარეს

ნაციონალური ბიზნესრეიტინგების კავშირმა ბოლნისის "სიონი", სახელმწიფო რეიტინგების შემუშავების დასრულების შემდეგ, საქართველოს მასშტაბით, ტოპ-10 საწარმოს შორის მესამე ადგილზე დაასახელა და "ოქროს" კატეგორიაში გაატარა.

ქვემო ქართლის რეგიონში კი, გუნდი ამ მაჩვენებლით პირველ ადგილს იკავებს, რომელიც ასევე "ოქროს" კატეგორიაში გადის.

უწყებიდან ამ წარმატების შესახებ ოფიციალური წერილი კლუბის გენერალურ დირექტორს, ვლადიმერ ბურდულს დღეს გამოუგზავნეს.

"ოფიციალურად გატყობინებთ საქართველოს საწარმოების საყოველთაო სახელმწიფო რეიტინგების შემუშავების დასრულების შესახებ, 2013/14 წლების შედეგების მიხედვით.

სტატისტიკური რანჟირების შედეგებით თქვენი საწარმო იმყოფება:

"მე-3" ადგილი (ოქრო) საქართველოს ტოპ-10 საწარმოს კრიტერიუმის - "ჯამური ადგილი" - მიხედვით;

"1-ლი" ადგილი (ოქრო) ქვემო ქართლის ტოპ-3 საწარმოს შორის კრიტერიუმის - "მოგება/ზარალი" - მიხედვით.

მოცემული მაჩვენებელი ერთ-ერთი საუკეთესოა თქვენი საქმიანობის სფეროში და უნდა იქნას დადასტურებული შესაბამისი ღირსების ნიშნებით, რომელსაც მიიღებს დაჯილდოების ოფიციალურ პროგრამებში მონაწილეობის შემთხვევაში.

წერილის მიღებიდან 7 დღის განმავლობაში, გთხოვთ, მიმართოთ ნაციონალური ბიზნესრეიტინგების საორგანიზაციო კომიტეტს და მიიღოთ სათანადო ჯილდოები, თქვენთვის და თქვენი საუკეთესო თანამშრომლებისთვის; აგრეთვე, თქვენი საწარმოს მარკეტინგულ-ეკონომიკური სტრატეგიის ლიდერის სიმბოლიკისა და სტატუსის გამოყენების უფლება", - ნათქვამია წერილში.

აღნიშნული წარმატება შეაფასა კლუბის გენერალურმა დირექტორმა ლადო ბურდულმა:

"მინდა, მადლობა გადავუხადო ჩვენს გუნდს და აღვნიშნო, რომ ქვემო ქართლში ჩვენი გუნდით დავიკავეთ პირველი ადგილი, საქართველოს მასშტაბით კი - მესამე. ორივე ეს ადგილი ოქროს კატეგორიაშია. ეს ყველაფერი იმაზე მიანიშნებს, რომ ჩვენი გუნდი ერთ-ერთი საუკეთესოა მენეჯმენტში. თან ეს ყველაფერი რომ საფეხბურთო კლუბში მოხდა, ორმაგად სასიხარულოა".

წყარო: fcsionibolnisi.com