გორის "დილა": პლუს გიორგი პაპავა, გიორგი ნავალოვსკი, შევჩენკო...

ფოტოზე: გიორგი პაპავა
გორის "დილამ" თურქული შეკრება დაიწყო. მთავარი სიახლე ისაა, რომ გუნდის შემადგენლობაში ითამაშებს გიორგი პაპავა.

ბევრს გაუკვირდა, თბილისის "დინამოს" ერთ-ერთი ლიდერი ცოტა ხნის წინათ კვიპროსულ "ნეა სალამინაში" რომ გადავიდა. ახლა ის ამბიციურ "დილაში" ბრუნდება, რომლის შემადგენლობაშიც ის ჩემპიონთა ლიგის საკვალიფიკაციო ეტაპზე ითამაშებს.

აქვე ვთქვათ, რომ გადაწყვეტილია - მომავალ სეზონში "დილას" ღირსებას დაიცავს საქართველოს ნაკრების მარცხენა მცველი გიორგი ნავალოვსკი (გუშინ 29 წელი შეუსრულდა). ის გუნდს უკვე შეუერთდა.

გამართლდა ცოტა ხნის წინათ "ლელოს" მიერ მოპოვებული ინფორმაციაც - "დილაში" ითამაშებს უკრაინის ახალგაზრდული ნაკრების ყოფილი მეკარე ოლეკსეი შევჩენკო, ვისი კონტრაქტიც ამჟამად კიევის "დინამოს" ეკუთვნის. 23 წლის შევჩენკომ სეზონი ქუთაისის "ტორპედოში" ჩაამთავრა. ისიც გორელებთან ერთად ემზადება.

ჩემპიონი გუნდის შემადგენლობაში გამოჩნდა ტანმაღალი ცენტრალური მცველი, 22 წლის ალბერტ ცხოვრებოვი. გორელთა პოტენციური ახალწვეული რუსეთის მოქალაქეა. მან კარიერა ვლადიკავკაზის "ალანიაში" დაიწყო. გასულ სეზონში ცხოვრებოვი რუსეთის პირველი ლიგის ბინადარ "ტოსნოში" თამაშობდა.

უჩა სოსიაშვილის სამწყსო თურქული შეკრებიდან გაემგზავრება ბელგრადში, სადაც ადგილობრივი "პარტიზანი" ელოდება. ცნობილია, რომ თურქეთში "დილა" ადგილობრივ "ქაისერისფორსა" და უკრაინულ "ვოლინთან" ითამაშებს.

და კიდევ: არის საკმაოდ დიდი შანსი, რომ "დილამ" სერბებს მშობლიურ კედლებში უმასპინძლოს. გორელებმა უეფას რეკომენდაციები მიიღეს და ახლა მათ შესრულებაზე მუშაობენ.

(იბეჭდება მცირე ცვლილებით)
ყოველდღიური სპორტული გაზეთი "ლელო"