ქართული გუნდები ევროთასებზე: რომელი არხები აჩვენებს და ვინ გვიმსაჯებს

მოახლოვდა 9 ივლისი - დღე, როცა ევროპალიგაზე მოთამაშე სამი ქართული გუნდი საპასუხო მატჩებს გამართავს.

სხვადასხვა ტელეარხით სამივე მატჩის პირდაპირი რეპორტაჟია დაგეგმილი. "გაბალა"-"დინამოს" "საზოგადოებრივი მაუწყებელი" გადასცემს, "მეორე არხი" "ცხინვალი"-"ბოტოშანის" თბილისურ შეხვედრას შემოგვთავაზებს, ხოლო აჭარის ტელევიზია პირდაპირ რეპორტაჟს მოაწყობს კვიპროსიდან.

ალბათ, საინტერესოა, ვინ იმსაჯებს ამ შეხვედრებზე.

თბილისში, "მიხეილ მესხზე", ერთმანეთს "ცხინვალი" და "ბოტოშანი" დაუპირისპირდებიან. მატჩი 20 საათზე დაიწყება. როგორც გახსოვთ, ამ გუნდების პირველი მატჩი 1:1 მორჩა. საპასუხო შეხვედრას ბულგარელ მსაჯთა ბრიგადა განსჯის. მთავარი არბიტრი ნიკოლაი იორდანოვი იქნება. მას ივან ვალჩევი და გეორგი

ტოდოროვი დაეხმარებიან.

პარალელურად, გაბალაში თბილისის "დინამო" მასპინძელ "გაბალას" დაუპირისპირდება. ამ შეხვედრას ფრანგ მსაჯთა ბრიგადა მოემსახურება. მთავარი არბიტრი იქნება ამორი დელერუ, რომელსაც ლორან სტინი და მიშელ ანო დაეხმარებიან. თბილისური მატჩი "დინამომ" 2:1 მოიგო.

ასევე ჩვენი დროით 20 საათიდან ნიქოზიაში ბათუმის "დინამო" ადგილობრივ "ომონიას" გაუწევს მეტოქეობას. პირველი მატჩი ბათუმელებმა (ზესტაფონში) 1:0 მოიგეს.

შეხვედრის მთავარი მსაჯი პორტუგალიელი ფაბიო ვერსიმო იქნება. მას თანამემამულეები - პაოლო სუარეში და ანტონიო გოდინიო გაუწევენ ასისტენტობას.

ყოველდღიური სპორტული გაზეთი "ლელო"