საქართველოს ფეხბურთის ფედერაციის პრეზიდენტი ლევან კობიაშვილი გერმანიაში "შალკესა" და ყველა ვარსკვლავის მატჩზე იყო მიწვეული. ეს საფეხბურთო შოუ შაბათს გაიმართა - ასე გააცილეს ფეხბურთიდან ჯერალდ ასამოა.განელმა ფეხბურთელმა, რომელმაც გერმანიის ნაკრებში ითამაშა, სახელი სწორედ "შალკეში" გაითქვა და კარიერის დიდი ნაწილიც (1999-2010) ამ გელზერკირხენულ კლუბში გაატარა. ის ბუნდესნაკრების პირველი აფრიკელი ფეხბურთელი გახლდათ (43 მატჩი, 6 გოლი). ბუცები კი ასამოამ "შალკე 2"-ში გატარებული შარშანდელი სეზონის შემდეგ ჩამოჰკიდა და კლუბის 15-წლამდელთა გუნდი ჩაიბარა.
ასამოამ და კობიაშვილმა "შალკეში" გვერდიგვერდ მთელი 7 წელიწადი (2003-10) ითამაშეს.
პარიზში
ლევან კობიაშვილმა საგანგებო განცხადება გააკეთა პარიზის ტერაქტებთან დაკავშირებით:
"პარიზის ტრაგედია სამყაროს წინააღმდეგ მიმართული საზარელი აქტია. ეს არ იყო შეტევა მხოლოდ საფრანგეთის დედაქალაქზე. ამ მოვლენამ შეძრა მთელი მსოფლიო.
გვჯერა, რომ სლოგანი - "ფეხბურთი აერთიანებს" - მნიშვნელოვან წვლილს შეიტანს მშვიდობიანი, სოლიდარული მსოფლიოს ჩამოყალიბებაში. საფრანგეთის მოქალაქეებს, ფეხბურთის გულშემატკივრებს, რომლებიც სტადიონზე იმყოფებოდნენ, სრულ თანადგომას ვუცხადებთ.
გარდაცვლილთა ოჯახის წევრებს გთხოვთ, მიიღოთ ჩვენი სამძიმარი", - ნათქვამია ფეხბურთის ფედერაციის პრეზიდენტის განცხადებაში.
(იბეჭდება მცირე ცვლილებით)
ყოველდღიური სპორტული გაზეთი "ლელო"
