დღეს ქართული საზოგადოება უკანასკნელ გზაზე ვაცილებთ დავით პეტრიაშვილს, ადამიანს, რომელმაც თავისი უანგარო შრომით შეძლო ფასდაუდებელი სამსახური გაეწია ქართული ფეხბურთისთვის. დავით პეტრიაშვილი ერთ-ერთი იშვიათი ქართველი იყო, დამოუკიდებლად რომ გაიკვალა გზა და ევროპული ფეხბურთის მმართველ სახლში ავტორიტეტი გახდა. ის იყო ქართული ფეხბურთის ელჩიც, მფარველიც და იმედიც შუაგულ ევროპაში.დარწმუნებულნი ვართ, ქართული ფეხბურთის ნებისმიერი გულშემატკივარი დაუფიქრებლად წაშლიდა 20 დეკემბრის ავადმოსაგონარ ღამეს. ამ დღეს ჩვენ დავით პეტრიაშვილი დავკარგეთ - ჩვენი პეტრო, ალალი, პროფესიონალი, პატრიოტი კაცი, ჩუმი, სიკეთით სავსე, მუდამ თვალებგაბრწყინებული, უეფაში დასაქმების დღიდანვე რომ
დღეს 24 დეკემბერია... თითქოს მაინცდამაინც არაფრით გამორჩეული დღე, მაგრამ... დღეს პეტროს უკანასკნელ გზაზე გავაცილებთ. დაუჯერებელია, თუმცა ვინ თქვა, რომ გვჯერა?!
დღეს 24 დეკემბერია და ჩვენ ისევ შევხვდებით პეტროს. გამოვემშვიდობებით, მასთან გატარებულ ყოველ წამს გავიხსენებთ, მის გაკეთებულს დავაფასებთ და გასაკეთებელს გადმოვიბარებთ. მას ხომ ყველაზე მეტად სწყუროდა ქართული ფეხბურთის წარმატება და სწორედ ჩვენ ვართ ვალდებულები, ეს წყურვილი დავუამოთ.
დღეს 24 დეკემბერია და საქართველოს უამრავი სტუმარი ეწვევა უცხოეთიდან. სამწუხარო ისაა, რომ საქართველოს ფეხბურთის ფედერაციას არა რაიმე წარმატების აღსანიშნავად, არამედ ჩვენი პეტროს დაკრძალვაზე დასასწრებად ჩამოსული დელეგაციების მასპინძლობა უწევს.
დღეიდან დავით პეტრიაშვილის სახელი ქართული ფეხბურთის ისტორიას ეკუთვნის. ჩვენს განუზომელ ტკივილს კი, ალბათ, ცოტა უცნაურად ჟღერს, მაგრამ უდიდესი სიამაყეც ახლავს - ჩვენ ხომ დავით პეტრიაშვილის მეგობრები ვართ. დიახ, ჩვენ ვამაყობთ, რომ პეტროსთან წლები გვაკავშირებდა და გვქონდა მასთან ურთიერთობის დიდი ბედნიერება! მართალია, ის სულ რაღაც 46 წლის ასაკში წავიდა ამ ქვეყნიდან, მაგრამ ამ მცირე დროშიც მოასწრო დიდი საქმეების გაკეთება და ღირსეული კაცის სახელის დატოვება. ასეთი რამ კი ერთეულთა ხვედრია...
დღეს, 12 საათიდან, ვაჟა-ფშაველას 33-ში, ღვთისმშობლის ტაძრად მიყვანების სახელობის ეკლესიაში (სამედიცინო უნივერსიტეტთან) გაიმართება სამოქალაქო პანაშვიდი, გაიხსნება სამძიმრის წიგნიც და ნებისმიერ მოქალაქეს შეეძლება მასთან გამოთხოვება. 15 საათზე კი, დავით პეტრიაშვილს ვაკე-საბურთალოს სასაფლაოზე მივაბარებთ მშობლიურ მიწას...
მოგვენატრები, პეტრო!
საქართველოს ფეხბურთის ფედერაცია
![[ერთი თავი დაუწერელი წიგნიდან] რამდენიმე სურათი ანუ ეპიზოდი ჩემი ცხოვრებიდან](/pictures/image7/1a0312d7feb2dc4a160236850a979e2c.jpg "[ერთი თავი დაუწერელი წიგნიდან] რამდენიმე სურათი ანუ ეპიზოდი ჩემი ცხოვრებიდან")
![[ოთხშაბათის საკითხავი] რატომ (არ) უნდა შევიყვანოთ ბავშვი ფეხბურთზე?](/pictures/image7/a3a23e67b804bde751a3173471cba73b.jpg "[ოთხშაბათის საკითხავი] რატომ (არ) უნდა შევიყვანოთ ბავშვი ფეხბურთზე?")
