ვითომ მუნდიალი აფხაზეთში, რომელსაც მაყურებელი არ ჰყავს

AutoSharing Option
ფოტოზე: ტურნირის ერთ-ერთი მატჩი სოხუმის სტადიონზე (sputnik-abkhazia.ru)
როცა CONIFA-მ (არაღიარებული ქვეყნების საფეხბურთო ასოციაციების კონფედერაცია) აფხაზეთში დაწყებულ ტურნირს "მსოფლიოს ჩემპიონატი" უწოდა, რუსულმა მედიასაშუალებებმა ეს მთელი სერიოზულობით აიტაცეს.

არაღიარებული ქვეყნების ეგრეთ წოდებული მუნდიალი 29 მაისს რუსებისგან ოკუპირებულ საქართველოს ტერიტორიაზე, აფხაზეთში, კერძოდ - სოხუმსა და გაგრაში დაიწყო და 5 ივნისს დასრულდება.

მის "გაპიარებას" რუსებმა და მათდამი დაქვემდებარებულმა სეპარატისტებმა დიდი ძალა და ფინანსები შეალიეს. ამის მიუხედავად, ტურნირის მიმდინარეობის ამსახველი ფოტოებიდანაც ჩანს, რომ საქართველოს საფეხბურთო ჩემპიონატსაც კი უფრო მეტი მაყურებელი ჰყავს, ვიდრე ამ "მუნდიალს" (იხილეთ
sputnik-abkhazia.ru-ს ფოტო).

საინტერესოა, რომ ტურნირში მონაწილეობს ჩაგოსი, რომელმაც აფხაზებთან 0:9 წააგო, შემდეგ კი, ეგრეთ წოდებულ დასავლეთ სომხეთთან - 0:12.

რუსული სააგენტო "სპუტნიკ-აფხაზია" ამტკიცებდა, თითქოს, არაღიარებული ქვეყნების ტურნირს ფიფას წარმომადგენელი დაესწრებოდა. ეს სოხუმში, CONIFA-ს მიერ გამართულ პრესკონფერენციაზე, ამ ორგანიზაციის ვიცე-პრეზიდენტმა დიმიტრი ფაღავამ განაცხადა. თუმცა ეს შეგნებულად გავრცელებული ჭორი რომ იყო, ფაქტებით დადასტურდა.

"გავარკვიე, ვინც იმყოფება სოხუმში. ესენი არიან ფიფას აგენტები - შვედი დაგ ლარსენი და რუსი სერგეი აზიზოვი. ასე რომ, არანაირი ფიფას ჩინოვნიკი აფხაზეთში არ იმყოფება.

საინტერესოა, რომ აფხაზეთის ნაკრებში სათამაშოდ ტულის "არსენალიდან" ანრი ხაგუში ჩავიდა. მან 2008 წლის ჩემპიონთა ლიგაზე, ბატე-სთან ერთად, მადრიდის "რეალის" წინააღმდეგ ითამაშა და მაშინ ბელორუსის ნაკრებში თამაშის სურვილიც გამოთქვა", - ასეთი სტატუსი გამოაქვეყნა საფეხბურთო წრეებში ცნობილმა ბექა კვიციანმა.

სხვათა შორის, ამ აზიზოვმა სოხუმში პრესკონფერენცია გამართა და ამტკიცებდა, რომ აფხაზეთი ფიფაში გაწევრიანებას იმსახურებს:

"აფხაზეთი ღირსია, რომ ფიფაში მიიღონ. მას ჰყავს საკუთარი მთავრობა, აქვს ენა და, რაც მთავარია, ფეხბურთსაც ხარისხიანად თამაშობენ. აფხაზეთში ხალხს ფეხბურთი უყვარს. აქ ლეგენდარული ფეხბურთელები გაიზარდნენ".

მას სიტყვა არ დასცდენია, რომ ამ ლეგენდარული მოთამაშეების უმრავლესობა ქართველი იყო.

ისე, ცნობისთვის, ამ ლეგენდებში რუსები, უპირველეს ყოვლისა, ნიკიტა სიმონიანსა და ვიტალი დარასელიას ახსენებენ. დარასელია ქართული ფეხბურთის სახე იყო და ეს ცალსახაა. ბასა ღოღობერიძე, ვლადიმერ მარღანია, ვალტერ სანაია, გიორგი სიჭინავა, სიომა ბარქაია, გოჩა გავაშელი, თემურ ქეცბაია - მაგრამ ამ ფეხბურთელებს ხომ არ ახსენებდა?

სხვათა შორის, ესეც ხაზგასასმელია - რუსული მედიისა და ვიღაც აგენტებისგან განსხვავებით, აფხაზები ამ ფაქტებს არ ივიწყებენ...

ჩვენი ქვეყნის ოკუპირებულ ტერიტორიაზე მიმდინარე ტურნირთან დაკავშირებით, ქართული სახელმწიფოს ოფიციალური პოზიციის შესაჯერებლად, წინა კვირას საგარეო საქმეთა სამინისტრომ შეხვედრა გამართა და მას საქართველოს ფეხბურთის ფედერაციისა და სპორტისა და ახალგაზრდობის საქმეთა სამინისტროს ხელმძღვანელები დაესწრნენ. გარდა ამისა, შევიტყვეთ, რომ სფფ-მ შესაბამისი წერილი ფიფაშიც გაგზავნა.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 10 /
ისე ამ მუნდიალზე სპეციალური სტატუსით ჩვენი ნაკრები რომ მიეწვიათ კარგი იქნებოდა ერთმანეთს დაუახლოვდებოდით და გამარჯვებების გემოსაც გავიხსენებდით.
kaxa
02 ივნისი 2016 10:23
0
ეგ მუნდიალი ტაკი მასხარაობაა რუსები და სეპარატისტები გულს იფხანენ ამდენი ფხანისგან ქეცი დაემართებათ
zvi
01 ივნისი 2016 16:27
0
და საერთოდ ბათუმის სტადიონის თემა ისევ დაიხურა თუ არჩევნების წინა დღეს იწყებენ მშენებლობას?!
batumi
01 ივნისი 2016 15:56
0
ის ფაქტი, რომ ვიტალი დარასელია წარმოშობით აფხაზი იყო, ვერც მის ქართველობას, ვერც კაცობას და მთლიანობაში ხსოვნას ვერანაირ ჩრდილს მიაყენებს....
მსქროლავი ტროლი
01 ივნისი 2016 15:54
0
თბილისის დინამოს ხელმძღვანელობა თამაშებზე მაყურებლების მოზიდვაზე მეტად, სტადიონის მიმდებარედ ბაზრობის მოწყობაზე ზრუნავს, სამწუხაროდ.
გუადუას
01 ივნისი 2016 14:17
0
Guadua -ჯიგარი ხარ,მწარე სიმართლეა სამწუხაროდ
hj
01 ივნისი 2016 13:28
0
ვინც ენები იცით {მთავრობას ამისთვის არ ცალია)სხვადასხვა ენბზე სასწრაფოდ გაავრცელეთ თუ როგორ თამაშობდნენ ფეხბურთს აფხაზეთში ქართველების თავებით სომხური და ქურთული ენები არ გამოგრჩეთ
მურთაზი
01 ივნისი 2016 13:14
0
პატივცემულო ჟურნალისტო, ეს ვითომ მუნდიალი უფრო საგარეო უწყების საქმეა და მიხედონ, თქვენ კიდევ საერთოდ ნუ განიხილავთ სპორტულ მხარეს და ნურც ანგარიშებს გვაწოდებთ, სრული იგნორი
llcl
01 ივნისი 2016 13:10
0
guadua - 100% -ნი ხარ
fanat
01 ივნისი 2016 13:03
0
მის "გაპიარებას" რუსებმა და მათდამი დაქვემდებარებულმა სეპარატისტებმა დიდი ძალა და ფინანსები შეალიეს. ამის მიუხედავად, ტურნირის მიმდინარეობის ამსახველი ფოტოებიდანაც ჩანს, რომ საქართველოს საფეხბურთო ჩემპიონატსაც კი უფრო მეტი მაყურებელი ჰყავს, ვიდრე ამ "მუნდიალს"


სინამდვილეში კი ასე უნდა დაგეწერათ :
მიუხედავად დიდ რეკლამისა, მაყურბელთა ოდენობა არის მცირე, მაგრამ,ფაქტი ფაქტად რჩება რომ თბილისის დინამოდ მატჩებს ამაზე რამდენიმეჯერ მცირე მაყურებელი ესწრება და ალბათ დროა დინამოს ხელმძღვანელობამ დაფიქრდეს თუ როგორ "შეიტყუოს" მაყურებელი სტადიონზე,რათამ მათი მატჩები აფხაზურ მუნდიალს არ ჰგავდეს მომავალშიც
Guadua
01 ივნისი 2016 11:31
0

ასევე დაგაინტერესებთ
სიახლეები პოპულარული