ნიკა კვეკვესკირი: ყოჩაღ გია ცეცაძეს და ბიჭებს!

ევროპალიგაზე საქართველოს ვიცე-ჩემპიონ "სამტრედიისა" და აზერბაიჯანული "გაბალას" მოახლოებული დაპირისპირება დიდ ინტერესს იწვევს. ცხადია, მეზობლებს ჩვენზე ბევრად მეტი ფინანსები აქვთ, ძლიერი ლეგიონერების მიწვევის საშუალება გააჩნიათ და შემთხვევითი არ იყო, რომან გრიგორჩუკის გუნდი შარშან ევროპალიგის ჯგუფურ ეტაპზე რომ გავიდა.

ახლახან "გაბალაში" საქართველოს ნაკრების ნახევარმცველი ნიკა კვეკვესკირი გადავიდა. 23 წლის ნახევარმცველი არ მალავს, რომ "სამტრედიასთან" დაწყვილებამ არ გაახარა:

- სიმართლე გითხრათ, წინათგრძნობა მქონდა, რომ რომელიმე ქართულ გუნდს შევხვდებოდით.

- რატომ?
- თუ აკვირდებით, ბოლო წლებში უეფა გუნდებს წილისყრაზე რეგიონული პრინციპით აწყვილებს. ამის გამო ვფიქრობდი, რომ ეს შესაძლებელი იყო. სამწუხაროდ, ასეც მოხდა.

- რატომ "სამწუხაროდ"?
- ქართული გუნდების წინააღმდეგ თამაში ძალიან არ მინდოდა. ჩემი ოცნება ჩემპიონთა და ევროპალიგის ჯგუფურ ეტაპზე მოხვედრაა. ასეთ შემთხვევაში ჩემიანების გუნდთან თამაში სასიამოვნო იქნებოდა. ახლა კი ერთ-ერთი ჩვენგანი უნდა გავარდეს.

- საერთოდ, აზერბაიჯანული მედიის აზრს თუ დავეყრდნობით, მათ "სამტრედია" უკვე გავლილი ჰგონიათ...
- აზერბაიჯანში საქართველოს ჩემპიონატს თვალს არ ადევნებენ და "სამტრედიას" და მის თამაშს არ იცნობენ. ისინი იმ ფაქტით მსჯელობენ, რომ გუნდი ევროგათამაშებაში 21 წელია არ ყოფილა. აქედან გამომდინარე, უბრალო გულშემატკივრებს ჰგონიათ, რომ "გაბალა" შემდეგ ეტაპზე იოლად გავა.

მაგრამ გულწრფელად ვამბობ, რომ ჩვენი გუნდის მწვრთნელები და ფეხბურთელები ასე ნამდვილად არ ფიქრობენ და მეტოქეს პატივისცემითა და სიფრთხილით ეკიდებიან.

- პირადად რას ფიქრობთ?
- "სამტრედიაში" ბევრი ნიჭიერი ფეხბურთელი თამაშობს და ძალიან კარგი მწვრთნელიც ჰყავს. ვიცი, რომ გუნდმა სლოვენიაში, მოსამზადებელ ეტაპზე ალბანურ "კუკეშსა" და ბუქარესტის "დინამოს" დიდი ანგარიშებით მოუგო. მართალია, პირადად ამ ალბანური და რუმინული გუნდების წინააღმდეგ არ მითამაშია და მათ შესახებ მხოლოდ ზოგადი ინფორმაცია მაქვს, მაგრამ ის კი ვიცი, რომ ორივე საკმაოდ ძლიერი გუნდია და მათ 4:0-ს და 5:1-ს რომ მოუგებ, ეს ბევრ რამეზე მეტყველებს.

ყოჩაღ გია ცეცაძეს და მისი გუნდს! ეტყობა, ეს კაცი ძალიან კარგად მუშაობს და ამ ეტაპის დასაძლევად ძალიან დიდი მობილიზება და სიფრთხილე დაგვჭირდება. თანაც, "სამტრედიას" ძალიან კარგი გულშემატკივარი ჰყავს. ეს კი გუნდისთვის დამატებითი სტიმული იქნება.