სამტრედია VS გაბალა - უპირველეს ყოვლისა, უკეთესი თამაში

მატჩის წინა დღეს ზესტაფონის მთავარ არენაზე პირველად აზერბაიჯანელმა ფეხბურთელებმა ივარჯიშეს. მეზობლების დელეგაცია საკმაოდ მრავალრიცხოვანია - "გაბალას" ოცამდე აზერბაიჯანელი სპორტული ჟურნალისტიც ახლავს...


ფოტოზე: ნიკა კვეკვესკირი ზესტაფონში, თანამემამულეებთან მატჩისთვის ემზადება

რაც შეეხება მოედანს, მართალია, ის მთლად იდეალურ მდგომარეობაში ვერ არის "ჩიხურა"-"ზიმბრუს" მატჩის შემდეგ, მაგრამ შექმნილ სიტუაციაში ვერავინ ვერაფერს დაუწუნებს. მან გაუძლო სტიქიას და დღეს კიდევ ერთი გამოცდის ჩაბარება მოუწევს, როცა ერთმანეთის პირისპირ "სამტრედია" და "გაბალა" დადგებიან...

"გაბალას" ვარჯიშის დაწყებამდე ჟურნალისტთა ცნობისმოყვარეობა გუნდის უკრაინელმა მთავარმა მწვრთნელმა რომან გრიგორჩუკმა დააკმაყოფილა:

- მიუხედავად პირველი თამაშის შედეგისა, ჩვენ სულაც არ მიგვაჩნია, რომ მომდევნო ეტაპის საგზური ჯიბეში გვიდევს. დარწმუნებული ვარ, ხუთშაბათს რთული თამაში გველის...

- "გაბალას" პრეზიდენტმა ცოტა ხნის წინ კმაყოფილება გამოთქვა გუნდის ახალწვეულებით. თქვენც კმაყოფილი ხართ?
- დიახ, მოხარული ვარ, რომ გუნდში კარგი ფეხბურთელები მოვიდნენ.

- რას იტყვით მინდვრის საფარის მდგომარეობაზე?
- ვიცი, რომ აქ დიდი წვიმა იყო და ისიც ვიცი, რომ ზესტაფონში ორი დღის წინ ევროპალიგის მატჩი გაიმართა. ვფიქრობ, რომ არა ეს ამბები, მინდორი უკეთეს მდგომარეობაში იქნებოდა. ნებისმიერ შემთხვევაში, აქ კატასტროფული არაფერი ხდება - ფეხბურთის თამაში შეიძლება!

- მომდევნო ეტაპზე მეტოქედ უნგრული გუნდი გირჩევნიათ თუ ყაზახური?
- დღეს მომდევნო ეტაპზე ნამდვილად არ ვფიქრობთ. ჩვენ ვფიქრობთ მხოლოდ "სამტრედიასთან" საპასუხო მატჩზე. ისე კი, ჩვენს ორივე პოტენციურ მოწინააღმდეგეს ძალიან დიდ პატივს ვცემთ.

- ლიბერიელი ვიკსი გუნდში ბრაზილიელი დოდოს შემცვლელად მოიყვანეთ?
- არა, ისინი სხვადასხვა ამპლუის ფეხბურთელები არიან.

- როგორ ფიქრობთ, ეს "გაბალა" უფრო ძლიერია თუ ის, რომელიც ერთი წლის წინ თბილისის "დინამოს" დაუპირისპირდა?
- ორივე გუნდს უდიდეს პატივს ვცემ. ორივეში ძლიერი ფეხბურთელები თამაშობდნენ და თამაშობენ.

- ცალკე უნდა გკითხოთ ნიკა კვეკვესკირზე...
- მიხარია, რომ ის დღეს ჩვენი გუნდის წევრია. ამ ფეხბურთელზე გვქონდა ინფორმაცია, სანამ "გაბალაში" მოვიწვევდით. ახლა კი შემიძლია ვთქვა, რომ ბოლომდე გაამართლა ჩვენი იმედები. ნიკას ძალიან დიდი პოტენციალი აქვს. კიდევ შეუძლია, მოუმატოს.

- და ბოლო კითხვა: კლუბის ხელმძღვანელობა შარშანდელი შედეგის გამეორებას, ანუ ევროპალიგის ჯგუფში მოხვედრას ითხოვს?
- ჩვენი პირველი რიგის ამოცანა ის არის, რომ მეორე საკვალიფიკაციო ეტაპზე გავიდეთ. დანარჩენზე მერე ვილაპარაკოთ.

სამტრედიელთა ვარჯიშის დაწყებამდე "ლელომ" გუნდის მთავარ მწვრთნელ გია ცეცაძეს რამდენიმე კითხვა დაუსვა:



- რას ელით საპასუხო მატჩისგან?
- უპირველეს ყოვლისა, უკეთეს თამაშს ველი ჩემი გუნდისგან, ვიდრე პირველ შეხვედრაში ვაჩვენეთ.

- მეტოქეს როგორ აფასებთ?
- "გაბალა" კარგად დაკომპლექტებული გუნდია. ბაქოში არ მოგვცა შესაძლებლობების გამოვლენის საშუალება. ისიც ფაქტია, რომ გრანდიც არ არის.

- პირველი მატჩის შედეგიდან გამომდინარე, ძირითად შემადგენლობაში ცვლილებები იქნება?
- ახლა ამ კითხვას ვერ ვუპასუხებ.

- ის მაინც გვითხარით, ყველა ფეხბურთელი ჯანმრთელადაა?
- კი, დანაკლისი არ გვაქვს.

- მაინც გჯერათ საფეხბურთო სასწაულის?
- ერთი შემიძლია ვთქვა, რომ ბიჭები ყველაფერს გააკეთებენ, რაც შეუძლიათ.

(იბეჭდება მცირე ცვლილებით)
ყოველდღიური სპორტული გაზეთი "ლელო"