ირლანდიის ნაკრების მთავარი მწვრთნელი ჯოვანი ტრაპატონი რომ ყველასგან განსხვავებული და გამორჩეული სპეციალისტია, ეს ისედაც ვიცოდით, მაგრამ მრავლისმნახველმა იტალიელმა ამაში კიდევ ერთხელ დაგვარწმუნა. იმ დროს, როცა ევროპის ჩემპიონატის მონაწილე გუნდების სხვა დამრიგებლები გაფართოებულ შემადგენლობებს ასახელებენ და მოსამზადებელ პერიოდში რამდენიმე ფეხბურთელს თავის გამოჩენის შანსს უტოვებენ, ტრაპმა პირდაპირ ის 23 მოთამაშე დაასახელა, რომლებსაც, თუ რაიმე გაუთვალისწინებელი არ მოხდა, პოლონეთსა და უკრაინაში წაიყვანს.
შეგახსენებთ, რომ უეფა გუნდებს საბოლოო განაცხადის წარდგენას 29 მაისს, 12 საათზე ავალდებულებს, ტრაპატონიმ კი საბოლოო განაცხადი ყველაზე ადრე გამოაქვეყნა.
ამრიგად, თუ
"23 ფეხბურთელის შერჩევა ადვილი არ იყო, რადგან ევროპის ჩემპიონატზე თამაში გაცილებით მეტმა დაიმსახურა, - განაცხადა ტრაპმა პრესკონფერენციაზე, - ევროპის ჩემპიონატის დაწყებას მოუთმენლად ველოდებით და კონტინენტის პირველობას სრულ მზადყოფნაში შევხვდებით. ურთულეს ჯგუფში ვართ, მაგრამ ირლანდია ისე იბრძოლებს, როგორც ამ ქვეყანას ეკადრება".
სიაში არ არის "უიგანის" ნახევარმცველი ჯეიმს მაკარტი, რომელმაც ტრაპატონის თვითონ სთხოვა, განაცხადში ნუ შემიყვანო - საქმე იმაშია, რომ ჯეიმსის მამას კიბოს დიაგნოზი დაუსვეს და დიდხანს ვეღარ იცოცხლებს, რის გამოც მაკარტი ევროპის ჩემპიონატზე თამაშზე უარს ამბობს და ოჯახთან ერთად იქნება.
"ჯეიმსმა წინა კვირაში დამირეკა და მომხდარის შესახებ მიამბო. მე მისი ძალიან კარგად მესმის და დარწმუნებული ვარ, ამ საკითხს მთელი ირლანდია გაგებით მოეკიდება," - აღნიშნა ტრაპმა.
სანამ ირლანდიის ნაკრების შემადგენლობას გაგაცნობთ, იმასაც შეგახსენებთ, რომ ირლანდიას ჯგუფურ ეტაპზე ურთულესი მეტოქეები ჰყავს: მსოფლიოსა და ევროპის ჩემპიონი ესპანეთი, მსოფლიოს ოთხგზის ჩემპიონი იტალია და ამბიციური ხორვატია.
მეკარეები: შეი გივენი (ასტონ ვილა), კეირენ ვესტვუდი (სანდერლენდი), დევიდ ფორდე (მილუოლი).
მცველები: ჯონ ო’ში (სანდერლენდი), რიჩარდ დანი (ასტონ ვილა), შონ სეინტ ლეჯერი (ლესტერი), სტეფან უორდი (ვულვერჰემპტონი), სტეფან კელი (ფულჰემი), დარენ ო’დი (სელტიკი), კევინ ფოლი (ვულვერჰემპტონი).
ნახევარმცველები: კეით ენდრიუსი (ვესტ ბრომვიჩი), გლენ უელანი (სტოკი), დარონ გიბსონი (ევერტონი), დამიენ დაფი (ფულჰემი), აიდენ მაკგიდი (სპარტაკი), სტეფან ჰანტი (ვულვერჰემპტონი), კეით ფაჰი (ბირმინგემი), ჯეიმს მაკლინი (სანდერლენდი).
თავდამსხმელები: რობი კინი (გალაქსი), კევინ დოილი (ვულვერჰემპტონი), საიმონ კოქსი (ვესტ ბრომვიჩი), ჯონათან უოლტერსი (სტოკი), შეინ ლონგი (ვესტ ბრომვიჩი).
ყოველდღიური სპორტული გაზეთი "ლელო"
