რუსეთის ნაკრებს მარტივი ამოცანა ჰქონდა გადასაჭრელი - კინკილა ქულა მას 1/4-ფინალის საგზურს და სავარაუდოდ გერმანიის ნაკრებთან დაპირისპირებას გაუნაღდებდა, მაგრამ დიკ ადვოკაატის გუნდი მზად არ აღმოჩნდა. სიმართლე გითხრათ, ასეთ შედეგს ნამდვილად არ ველოდით და მთლად სენსაციას თუ არ დავარქმევთ, მოულოდნელობა ნამდვილად იყო. 
ვიდეო ბერძნებმა მაქსიმუმი გაიღეს და დამსახურებულად მოიპოვეს პლეი ოფში თამაშის უფლება. ალალი იყოს თქვენზე და თქვენს შეგირდებზე, სეუ ფერნანდო!
რეაქციები
ანდრეი არშავინმა საკუთარ ოფიციალურ ვებგვერდზე მოკლე კომენტარი გააკეთა: "ჯერჯერობით სათქმელი არაფერი მაქვს".
რომან შიროკოვი: "მწვრთნელმა მადლობა გადაგვიხადა და დაგვემშვიდობა. ძალიან
პლეი ოფის მატჩებამდე უნდა მიგვეღწია და თუნდაც ერთი მატჩი გვეთამაშა. კარგი, თუნდაც გამოვვარდნილიყავით, მაგრამ B ჯგუფის დონის მეტოქეები მაინც გვყოლოდა..."
გიორგოს სამარასი: "ეს ყველასთვის განუზომელი ბედნიერებაა, ყველასთვის ვინც გუნდშია, იქნებიან ეს ფეხბურთელები, მწვრთნელები თუ ექიმები. მთავარია, რომ საბერძნეთის მოსახლეობას ბედნიერი დღე ვაჩუქეთ.
ამ გამარჯვების წყალობით მათ ალბათ რამდენიმე საათით მაინც დაივიწყეს თავიანთი პრობლემები და გაიღიმეს. სწორედ ამით ვამაყობთ ყველაზე მეტად".
ტაქტიკა/სტრატეგია
ვერ გეტყვით, რომ რომელიმე მწვრთნელმა რამე განსაკუთრებული შემოგვთავაზა, თუმცა ფერნანდუ სანტუშის ბიჭების თავდადება მაინც გასაოცარი იყო. ბერძენი მცველები ისეთივე თავდავიწყებით ებრძოდნენ მეტოქეს, როგორც მათი წინაპრები კონსტანტინოპოლის ასაღებად გამზადებულ მუჰამედ II-ის ლაშქარს. კარგია, რომ ამჯერად რუსებს შეტევებისთვის მხოლოდ 90 წუთი ჰქონდათ.
მართალია, სანტუშმა იდეალურად გაშიფრა რუსების ტაქტიკა, მაგრამ ისინი ცოტა მეტად კონცენტრირებულნი რომ ყოფილიყვნენ, მაინც შეძლებდნენ სიფაკისის ზურგს უკან ბადის შერხევას.
თუმცა არშავინის გარდა არც ერთ რუს თავდამსხმელს გუშინ მონდომება არ ეტყობოდა. ამას გარდა, ბერძენთა დამრიგებელმა შეცვლებიც გამოიცნო, რასაც ადვოკაატზე ნამდვილად ვიტყვით.
საუკეთესო ფეხბურთელი
გიორგოს კარაგუნისი (საბერძნეთი)
გიორგოს კარაგუნისმა საბერძნეთის ნაკრებში შაბათს თავისი 120-ე მატჩი გამართა და კარიერის განმავლობაში ალბათ ერთ-ერთი ყველაზე მნიშვნელოვანი გოლი გაიტანა.
გოლამდეც და მას შემდეგაც 35 წლის ვეტერანი გუნდის ლამის ყველა შეტევის სულის ჩამდგმელი გახლდათ. რომ არა შვედი იონას ერიკსონის შეცდომა, კარაგუნისი საბერძნეთს პენალტსაც მოუპოვებდა. სამწუხაროა, რომ გეორგიოსს დისკვალიფიკაციის გამო ახლა პლეი ოფის მატჩის გამოტოვება მოუწევს.
ფეხბურთელი იმედგაცრუება
ალან ძაგოევი (რუსეთი)
90 წუთის განმავლობაში ალან ძაგოევთან დაკავშირებული მხოლოდ ორი მომენტი გვახსენდება: პირველი მეტოქის კართან (მატჩის მიწურულს) და მეორე, როცა მან უადგილო ადგილას იუხეშა და ყვითელი ბარათი დაიმსახურა.
არადა, მისგან, როგორც არავისგან, ისე ელოდნენ თამაშის თავის თავზე აღებას, მაგრამ 22 წლის ბიჭისთვის ეს ტვირთი მეტისმეტი აღმოჩნდა.
მსაჯი
38 წლის შვედმა არბიტრმა იონას ერიკსონმა მატჩი ზოგადად კარგად განსაჯა, თუმვა ზემოთაც მოგახსენეთ, რომ მან ერთი ეპიზოდი რუსების სასარგებლოდ განსაჯა, როცა კარაგუნისის წაქცევაზე პენალტი არ დანიშნა და ვეტერანს სიმულაციისთვის ყვითელი უჩვენა. დანარჩენ ეპიზოდებში სერიოზული შეკითხვები მასთან ნამდვილად არ გაგვჩენია.
მწვრთნელების დუელი
დიკ ადვოკაატმა ჩვეულებრივ ტაქტიკას მიმართა და გუნდი სამი გამოკვეთილი თავდამსხმელით გამოიყვანა მინდორზე, თუმცა სამიდან მხოლოდ ერთმა არშავინმა გაუმართლა. ნახევარდაცვა ჩვეულებრივად ძალიან ბევრს მუშაობდა, აი დაცვას კი სერიოზული პრობლემები ჰქონდა.
ფიზიკურად ბევრად პატარა ბერძენი შემტევები მთასავით მეტოქეებს ხშირად აგდებდნენ გამოუვალ სიტუაციაში. სამარასთან ბრძოლაში განსაკუთრებით დაიჩაგრა ჟირკოვი.
ანდრე სანტუშის გუნდიც ჩვეული განლაგებით გამოცხადდა მინდორზე. პორტუგალიელ თავკაცს მეტოქეებისთვის არანაირი მოულოდნელი გადაწყვეტილება არ შეუთავაზებია. მან მხოლოდ შემადგენლობა დაალაგა: კაცურანისი ნახევარდაცვაში დააბრუნა, უკანა ხაზი კი პაპასტატოპულოსს ჩააბარა.
ანალიზი
მატჩის პირველი სახიფათო მომენტი ბერძნებმა შექმნეს. კარაგუნისის ჩაწოდებას კაცურანისი გამოეხმაურა, თუმცა ფანტასტიკურად ითამაშა ვიაჩესლავ მალაფეევმა, ვინც ბურთს თითების წვერებიღა წაატანა.
რუსების პასუხმა არ დაახანა - არშავინი ვარდნაში ცდილობდა დარტყმას, თუმცა ძლივს მისწვდა და სახიფათო დარტყმა აღარ გამოუვიდა.
მერე კერჟაკოვმა დაარტყა მაღალ "ცხრიანში", მაგრამ კარებს სანტიმეტრებით ააცილა. მე-15 წუთზე მალაფეევი შეცდა, როცა დაუფიქრებლად გამოვიდა წინ, თუმცა გეკასის თავური აკრობატულ ნახტომში მაინც მოიგერია. ტაიმის ბოლოს გლუშაკოვის დარტყმას პაპასტატოპულოსი გადაუდგა წინ, მერე კი ჟირკოვის შორეული დარტყმა ასცდა მცირედით.
ის იყო, მსაჯს ტაიმი უნდა დაესრულებინა, რომ კარაგუნისმა აუტიდან მოწოდებული ბურთის შემდეგ ჟირკოვი ადვილად ჩამოიშორა, მეკარესთან პირისპირ დარჩა და შორეულ, დაბალ კუთხეში დაურტყა - 1:0.
მეორე ტაიმში გათანაბრება პირველად ანიუკოვს შეეძლო, მაგრამ სიზუსტე არ ეყო. კარის ჩარჩოში ვერ ვერც დენისოვმა დაუმიზნა, არადა, სიფაკისი ამ დარტყმისთვის აშკარად მოუმზადებელი იყო. მე-60 წუთზე ანიუკოვმა გეკასს წამით დაასწრო ბურთისთვის ბრძოლაში და ხიფათი განმუხტა. იმავე გეკასს ზუსტად ერთ წუთში შეეძლო გატანა, მაგრამ თავური კარს ააცილა.
10 წუთში უკვე ცაველასს არ გაუმართლა, როცა ჯარიმა ზუსტად ძელისა და ხარისხის შეერთებას დაუმიზნა. მალე სალპინგიდისმა გააფუჭა კიდევ ერთი მომენტი. სულ ბოლოს რუსებმა გამოიღეს ხელი, როცა არშავინის პასით ძაგოევი ურტყამდა, მაგრამ არაზუსტად. აი, ასე დასრულდა მორიგი რუსული ზღაპარი.
დასკვნა
საბერძნეთმა პლეი ოფში გააღწია და ახლა მას B ჯგუფის გამარჯვებულთან მოუწევს დაპირისპირება. ვინც არ უნდა იყოს ეს, სანტუშსა და კომპანიას გაუჭირდება მასთან გამკლავება. სხვა თუ არაფერი, გუნდს კაპიტანი და ლიდერი კარაგუნისი არ ეყოლება.
ევრო 2012. A ჯგუფი. III ტური
მატჩი №18. ვარშავა. ნაციონალური სტადიონი
საბერძნეთი-რუსეთი 1:0 (იხილეთ ვიდეო)
გოლი: 1:0 კარაგუნისი (45)
გაფრთხილება: კარაგუნისი, ოლებასი - ანიუკოვი, ჟირკოვი, ძაგოევი, პოგრებნიაკი
კარში დარტყმა: 5(3)-18(4); კუთხური: 5-12; ჯარიმა: 8-13; თამაშგარე: 1-0; ბურთის ფლობა: 38%-62%
მაყურებელი: 55 614
საბერძნეთი (4-2-3-1): სიფაკისი - ტოროსიდისი, პაპადოპულოსი, პაპასტატოპულოსი, ცაველასი - კაცურანისი, მანიატისი - კარაგუნისი (მაკოსი 66), სალპინგიდისი (ნინისი 82), სამარასი - გეკასი (ოლებასი 63).
რუსეთი (4-3-3): მალაფეევი - ანიუკოვი (იზმაილოვი 81), ბერეზუცკი, იგნაშევიჩი, ჟირკოვი - შიროკოვი, დენისოვი, გლუშაკოვი (პოგრებნიაკი 71) - კერჟაკოვი (პავლიუჩენკო 46), ძაგოევი, არშავინი.
A ჯგუფი
ა გ თ მ ფ წ ბ ქ
1. ჩეხეთი 3 2 0 1 4-5 6
2. საბერძნეთი 3 1 1 1 3-3 4
3. რუსეთი 3 1 1 1 5-3 4
4. პოლონეთი 3 0 2 1 2-3 2
ასევე იხილეთ
ჩეხეთი მეოთხედფინალშია, პოლონეთი ევრო 2012-ს დაემშვიდობა
მანდამდე ქვქონდეს საქმე ეგ უკვე მიღწევაა.