კვიპროსის ფეხბურთის ფედერაციის ფუნქციონერი სპიროს მარანგოსი „ზუდდოიჩესთვის“ მიცემულ ინტერვიუში აცხადებს, რომ ორი წელია, ამაოდ ცდილობს, ხმა მიაწვდინოს უეფას პრეზიდენტ მიშელ პლატინის და მტკიცებულებები წარუდგინოს. მარანგოსის მტკიცებით, მას რამდენიმე მოწმე ჰყავს
მარანგოსის ადვოკატი ნეოკლის ნეოკლეუსი კი „ზუდდოიჩე ცაითუნგისთვის“ მიცემულ ინტერვიუში ამტკიცებს, რომ მოწმეებმა უეფას მაღალჩინოსნების საუბრები ჩაიწერეს და თითოეული ჩანაწერი დათარიღებულია, რითაც კვიპროსელს იმის დამტკიცება შეუძლია, უკვე დიდი ხანია, მტკიცებულებებს ფლობს.
ადვოკატის განცხადებით, მარანგოსმა ჯერ კიდევ ზაფხულში სცადა უეფასთან კონტაქტის დამყარება და პირველ რიგში, რა თქმა უნდა, სადისციპლინო კომისიის შეფს, პეტერ ლიმახერს მიმართა. მოგეხსენებათ, ეს უკანასკნელი ცოტა ხნის წინ თავად გაეხვა სკანდალში (ცდილობდა, დაემტკიცებინა, რომ „ბაიერნი“-„ზენიტის“ მატჩი გაიყიდა) და ახლა ხსენებულ თანამდებობაზე აღარ მუშაობს. როგორც ირკვევა, ლიმახერი კვიპროსელს 24 აგვისტოს, ჟენევაში შეხვედრაზე დათანხმდა, მაგრამ შეხვედრამდე ოთხი დღით ადრე შეატყობინა, რომ ვეღარ მიიღებდა. კვიპროსელის ადვოკატმა „ზუდდოიჩე ცაითუნგს“ წარუდგინა ლიმახერის ელექტრონული წერილი, სადაც ეს უკანასკნელი წერს: „ჩემი ხელმძღვანელების სურვილით, იძულებული ვარ, თქვენთან შეხვედრა უნდა გავაუქმო. თუ თვითმფრინავის ბილეთი დაჯავშნული გაქვთ, ჩვენ მზად ვართ, ბილეთზე უარის თქმით გამოწვეული ხარჯები აგინაზღაუროთ. ისე კი, ცხადია, ყველაფერი გვაინტერესებს და ძალიან გაგვიხარდება, თუ თქვენს დოკუმენტებს გამოგვიგზავნით.“
მარანგოსის თქმით, ამის შემდეგ მან კიდევ სცადა ლიმახერთან კონტაქტის დამყარება, მაგრამ მისი წერილები იბლოკებოდა და უკან მოდიოდა.
გაგახსენებთ, რომ ევროპის 2012 წლის ჩემპიონატის პოლონეთსა და უკრაინაში ჩატარება 2007 წლის 18 აპრილს გადაწყდა. ევრო 2012-ის მასპინძლობის მთავარი ფავორიტი იტალია ყველასათვის მოულოდნელად დამარცხდა. იტალიასთან ერთად, ევრო 2012-ის მასპიძლობა ხორვატია-უნგრეთის წყვილსაც სურდა.
ყოველდღიური სპორტული გაზეთი
"ლელო"
