უცნაური პერიოდი უდგას ანდალუსიურ კლუბს: ერთი მხრივ, ისტორიაში პირველად "მალაგა" ჩემპიონთა ლიგაზე იასპარეზებს და ახალი სეზონიც ძალიან კარგად დაიწყო; მეორე მხრივ კი, გუნდმა, ფაქტობრივად, ყოფნა-არყოფნის ზღვარზე გაიარა და... გადარჩა. საქმე იმაშია, რომ გასული სეზონის შემდეგ "მალაგას" ყატარელმა მფლობელმა შეიხმა ალ ტანიმ მოულოდნელად განაცხადა, რომ კლუბის გაყიდვა და "ხელების დაბანა" სურდა, რასაც მოჰყვა კრიზისული პერიოდი კლუბში - ის ვარსკვლავებისგან დაიცალა - ის ხალხი, ვისაც შეიხმა კლუბის მეთვალყურეობა ჩააბარა, გამოუვალ სიტუაციაში აღმოჩნდა, უბრალოდ, ხელფასსაც კი ვერ არიგებდნენ.
სწორედ ამან უბიძგა ანდალუსიურ კლუბს,
ესპანეთის ნაკრების ნახევარმცველში ლონდონის "არსენალმა" 19 მილიონი ევრო გადაიხადა, ხოლო სამხრეთამერიკელი ხოსე სალომონ რონდონის სანაცვლოდ რუსულმა "რუბინმა" 9 მილიონ ევრომდე გაიღო.
ამან "მალაგა" ამოასუნთქა და ფეხბურთელებმაც თავიანთი ჯამაგირი მიიღეს. გუნდი მაინც დატოვეს გამოცდილებმა - იტალიელმა ენცო მარესკამ (სამპდორია) და ჰოლანდიელმა იორის მატეისენმა (ფეიენოორდი).
მოკლედ, იმის მაგივრად, რომ გუნდი გაძლიერებულიყო, ის დასუსტდა და ცუდ ფსიქოლოგიურ წნეხში მოყვა.
არადა, ჯერ სათამაშო იყო მთავარი - ჩემპიონთა ლიგის პლეი ოფი, ორრაუნდიანი ბრძოლა ბერძნულ "პანათინაიკოსთან".
შეიხის ოცნება და რეალობა
შეიხი აბდულა ბინ ნასერ ბინ აბდულა ალ აჰმედ ალ ტანი 42 წლის კაცია. ის ყატარის სამეფო ოჯახის წევრია, ქვეყნის ამჟამინდელი მმართველის, შეიხ ჰამადის ახლო ნათესავი.
მან გადაწყვიტა ინვესტიციების ჩადება ფეხბურთში და ანდალუსიური კლუბი 2010 წლის ივნისში ლორენსო სანსისგან 36 მილიონ ევროდ შეიძინა.
ეს თანხა არც არაფერია, თუ გავითვალისწინებთ, რომ კრიშტიანო რონალდო "რეალს" ლამის სამჯერ უფრო ძვირი დაუჯდა.
"მალაგამ" მეორე სეზონშივე მიაღწია მიზანს, როცა მე-4 ადგილი დაიკავა და ჩემპიონთა ლიგის პლეი ოფის საგზური მოიპოვა. მაგრამ რა, ალ ტანი გააცოფა იმ ფაქტმა, რომ კლუბმა სატელევიზიო შემოსავლებისგან ისე მცირე თანხა მიიღო, რომ სასაცილოდაც არ ეყო, "რეალისა" და "ბარსელონას" შემოსავლებთან შედარებისას.
ფიცხმა არაბმა სოციალურ ქსელში გაავრცელა ინფორმაცია, რომ კლუბს გაყიდის და დაიწყო კრიზისიც...
ბეწვის ხიდზე გაიარეს
გუნდმა გაიჭირვა, მაგრამ გამოცდილი ჩილელი სპეციალისტის, მანუელ პელეგრინის წყალობით, მძიმე სიტუაციასთან გამკლავება შეძლო - სიკვდილ-სიცოცხლის დუელი მოიგო "პანათინაიკოსთან" (2:0 შინ და 0:0 სტუმრად) და ჯგუფური ეტაპის საგზურიც მოიპოვა.
"მალაგამ" სეზონიც კარგად დაიწყო - 3 თამაშიდან 7 ქულით მესამე ადგილზეა და ჯერაც დაუმარცხებელია.
როგორც მოსალოდნელი იყო, ამ წარმატებამ შეიხს გული მოულბო.
5 სექტემბერს კლუბის ვიცე-პრეზიდენტმა მოიად შატატმა ისეთები თქვა, ყველაზე პესიმისტებსაც კი პირი დააღებინა გაკვირვებისგან.
შეგახსენებთ, რომ შატატი თანამდებობაზე მხოლოდ ივლისიდანაა. კლუბის ახალი დირექტორატის პრეზენტაციაზე შატატმა ეს თქვა:
- არ ყოფილა მომენტი, როცა ჩვენ ვაპირებდით კლუბის მიტოვებას. ჩვენ დავიწყეთ ეს პროექტი და ჩვენვე მივიყვანთ ბოლომდე. ჩვენ კლუბში უდიდესი ინვესტიცია ჩავდეთ და ამის შეჩერებას არ ვაპირებთ.
მიზანი ასეთია - ყველაფერი საუკეთესო კლუბს. ინვესტიციები განახლდება, ოღონდ საჭირო მომენტში. შეიხი მუდამ ფიქრობს "მალაგაზე" და მისი გაყიდვა არც მოუსურვებია. ვიცი, რომ მფლობელები უკმაყოფილონი არიან სიტუაციით, თუმცა მე არ შემიძლია ამის დაკონკრეტება.
მაგრამ ამის გამო ისინი კლუბის თანადგომაზე უარს არ ამბობენ, ყატარიდან მოვლენებს პრიზმაში აკვირდებიან და ნებისმიერ პრობლემას გადაჭრიან, თუ საჭირო იქნება.
მონრეალი აღარ იყიდება
უკვე აგვისტოს ბოლოს ცხადი იყო, რომ ყველაფერს "ჰეფი ენდი" ჰქონდა. "მალაგამაც" ბოლო წამს არგენტინელი შემტევი ხავიერ სავიოლა და ამერიკელი მცველი ონუჩი ონიევუ შეიმატა. იყო საუბარი მარცხენა მცველის, ნაჩო მონრეალის გაყიდვაზე ბილბაოს "ატლეტიკში", მაგრამ შატატმა ესეც უარყო:
"ჩვენ აღარ გვაქვს ვალები. მონრეალი? არა, გასაყიდად საქმე აღარ გვაქვს, ამ ეტაპმა უკვე ჩაიარა და არავის გაყიდვა აღარ გვსურს. ახლა ჩვენ პირიქით, გაძლიერება გვსურს", - განაცხადა "მალაგას" ვიცე-პრეზიდენტმა.
ყოველდღიური სპორტული გაზეთი "ლელო"
