ლა ლიგა. ტრანსფერები: ექსვალენსიელი და ვალენსიელი ახალწვეულები

1-ელ ივლისს ესპანეთში, ისევე, როგორც დანარჩენ ევროპაში, სატრანსფერო სეზონი ოფიციალურად გაიხსნა, თუმცა მანამდე უკვე ბევრი რამ გადაწყდა. ივნისის თვეში მომხდარ ესპანურ ტრანსფერებს უკვე სამი მასალა ვუძღვენით. ახლა კი ივლისის თვის პირველი დეკადის ჯერია.

წინა მიმოხილვაში აქცენტი "ბილბაოსა" და "სევილიას" სატრანსფერო სიახლეებზე გავაკეთეთ. ანდალუსიელები ისევ აქტიურობენ, ამიტომაც მათ კიდევ მივუბრუნდებით, თუმცა დღეს უფრო დეტალურად ელიტაში დაბრუნებულ "ელჩესა" და "ვილიარეალზე" შევჩერდებით, ვალენსიის მხარის ორ კლუბზე.

ნაჩუქარი ბიჭი
"ელ გუახე" ასტურიულად ბიჭუნას ნიშნავს - ასე შეარქვეს დავიდ ვილიას სამშობლოში და მას მერე შერჩა ეს მეტსახელი. ესპანეთის ნაკრების ყველა დროის საუკეთესო ფეხბურთელი (56 გოლი) ამ კვირას ყურადღების ცენტრში მოექცა - 31 წლის "ელ გუახე" მადრიდის "ატლეტიკოში" გადავიდა. მართალია, ის დიდი ხანია, აღარ არის ბიჭუნა, მაგრამ ვილიას სანაცვლოდ გადასახდელი 5,1 მილიონი ევრო (თანაც სამი წლის განმავლობაში) მეტისმეტად ცოტა გვეჩვენება. ნეიმარით გაძლიერებულმა "ბარსამ", უბრალოდ, მოიშორა ფეხბურთელი.

ვილია მეშახტეთა ქალაქ ლანგრეოს კლუბის აღზრდილია. ის 18 წლის ასაკში მოხვდა ხიხონის "სპორტინგში", ჯერ სარეზერვო გუნდში. და აი, პირველი ტრანსფერიც შედგა - 2003 წელს 21 წლის ფეხბურთელი 3 მილიონ ევროდ გაიყიდა "სარაგოსაში", უკვე ორი წლის მერე "ელ გუახეში" "ვალენსიამ" 12 მილიონი გადაიხადა. გავიდა კიდევ 5 წელიწადი და დავიდ ვილიამ "ბარსელონას" მაისურა 40 მილიონი ევროს სანაცვლოდ მოირგო. ვილიას მხრებზე ლა ლიგის 461 მატჩში 235 გოლია.

აი, ასეთი ფეხბურთელი "ატლეტიკომ" მიიღო 2,1 მილიონ ევროდ მომავალ სეზონში და მერე ვნახოთო...

"ატლეტიკოს" თემა რომ დავასრულოთ, ვიტყვით, რომ 23 წლის მეკარე ხოელ რობლესი, როგორც იქნა, დაშორდა მადრიდულ კლუბს - ის ხან "რაიო ვალეკანოსა" და "უიგანში" იყო განათხოვრებული, ხან სკამს "ხეხავდა". რობლესი საბოლოოდ წავიდა - "ევერტონმა" მას 5-წლიანი კონტრაქტი გაუფორმა და არაოფიციალური ცნობით, "ატლეტიკოს" 5 მილიონი მიუთვალა.

გადარჩენილი ყვითელი ნავი
"ვილიარეალს" ბევრი შესანიშნავი მეტსახელით იცნობს - "ელ სუბმარინო ამარილიო", ანუ "ყვითელი წყალქვეშა ნავი". ვალენსიის მხარის პატარა ქალაქის გუნდმა პრიმერა პირველად 1998 წელს ნახა. მისი "ოქროს ხანა" კი ამ საუკუნეზე მოდის.

შარშანდლამდე "ელ სუბმარინო" ყოველთვის ესპანეთის 8 საუკეთესო გუნდში ასრულებდა პირველობას (2008-ში მე-2 ადგილზე გავიდა). აქ ქუხდნენ გეორგე კრაიოვეანუ, სონი ანდერსონი, დიეგო ფორლანი, ხუან რომან რიკელმე, ნიჰათი, ნილმარი, ჯუზეპე როსი... გუნდი ბრწყინვალედ თამაშობდა ევროთასებზეც. აი, ასეთი კარგი "წყალქვეშა ნავი" გავარდა, მაგრამ ფსკერზე არ ჩარჩა და პირველივე ცდაზე ელიტაში ამოყვინთა.

9 ივლისს, ელიტაში დაბრუნებულმა, აქ გაჩერების სერიოზული განაცხადი გააკეთა - "მალიორკადან" ჯოვანი დოს სანტოსი იყიდა. მექსიკელი ფორვარდი "მალიორკას" ლამის ერთადერთი ნათელი წერტილი იყო. 24 წლის ფეხბურთელი ახლა "ვილიარეალისთვის" გაიტანს. ჯოვანიმ 4-წლიანი ხელშეკრულება გააფორმა, მასში 6 მილიონი ევრო გადაიხადეს.

"ბედნიერი ვარ, რომ კარიერის მორიგი ნაბიჯი გადავდგი და დიდ კლუბში ვითამაშებ, როგორიც "ვილიარეალია". დიდებული სეზონი გველის", - განაცხადა მექსიკელმა.

ჯოვანი კლუბის პრეზიდენტ ფერნანდო როიგის ერთადერთი შენაძენი არ არის. ახლახან ვალენსიელებმა ორი კარგი მცველი და ერთი ნახევარმცველიც დაიმატეს. მცველები სლავები არიან: 27 წლის სლოვენიელი ბოიან იოკიჩი (კიევო) და 21 წლის სერბი ალექსანდარ პანტიჩი (ცრვენა ზვეზდა). მათში "ელ სუბმარინოს" ცენტიც არ გადაუხდია. ნახევარმცველმა ტომას პინამ კი ჯოვანის გზა გამოიარა (ჯოვანიმდე) - 5 ივლისს 25 წლის ფეხბურთელმა 5-წლიანი კონტრაქტი გააფორმა "ვილიარეალთან", "მალიორკამ" კი 4 მილიონი ევრო მიიღო.

ბუნებრივია, გუნდიდანაც წავიდნენ: ვეტერანები მარკოს სენა (ნიუ იორკ კოსმოსი) და ოლოფ მელბერგი (კოპენჰაგენი) და ახალგაზრდებიც ხერარდ მორენო (მალიორკა) და ხოან ორიოლი (ოსასუნა).

პასიური "ელჩე"
"ელჩეც" ვალენსიის მხარის კლუბია. ის 1989 წლის მერე პრიმერადივიზიონში არავის უნახავს. ალიკანტელთა "ოქროს ხანა" უფრო 60-70-იან წლებზე მოდის, როცა გუნდი რეგულარულად ელიტაში იყო - საუკეთესო მიღწევა მე-5 ადგილი 1964 წელს.
სეგუნდას ჩემპიონი "ვილიარეალივით" აქტიური ვერ არის. "ელჩემ" სამი ფეხბურთელი დაიმატა: გამოცდილი მანუ დელ მორალი და მიროსლავ სტევანოვიჩი "სევილიადან" იჯარით.

ასევე იჯარით "ბარსელონას" სარეზერვო გუნდის წევრი დავიდ ლომბანი გაიფორმა. თუ ვალენსიური კლუბი დარჩენილ სატრანსფერო სეზონში არ გააქტიურდება, მას სეგუნდაში დაბრუნების ფავორიტად მივიჩნევთ.

თარ. ფეხბურთელი საიდან სად თანხა
1 ივლ ჩაბი ეჩეიტა ელჩე ბილბაო თ.ა.
1 ივლ ხავი ფუეგო ვალეკანო ვალენსია თ.ა.
1 ივლ კიკე სოლა ოსასუნა ბილბაო 4 მლნ.
1 ივლ ნოლიტო ბენფიკა სელტა 2,6 მლნ.
1 ივლ ხოან ორიოლი ვილიარეალი ოსასუნა თ.ა.
2 ივლ ალეხანდრო პოსუელო ბეტისი სუონსი 0,5 მლნ.
2 ივლ მარკ მუნიესა ბარსელონა სტოკი თ.ა.
2 ივლ ჩორი დომინგესი ვალეკანო ოლიმპიაკოსი თ.ა.
3 ივლ ესეკილ კალვენტე ბეტისი უელვა იჯარა
3 ივლ მანე ხეტაფე მაკაბი თ. თ.ა.
4 ივლ იგორ მარტინესი ბილბაო მირანდესი თ.ა.
4 ივლ ნიკოლას პარეხა სპარტაკი სევილია იჯარა
4 ივლ ხოსე ანხელი რომა სოსიედადი იჯარა
4 ივლ ბობლი ანდერსონი კასაბლანკა მალაგა თ.ა.
4 ივლ ბოიან იოკიჩი კიევო ვილიარეალი თ.ა.
5 ივლ დიეგო გარსია ალმერია პონფერადინა თ.ა.
5 ივლ ტომას პინა მალიორკა ვილიარეალი 4 მლნ.
5 ივლ ხოსელუ მორენო ვილიარეალი უელვა თ.ა.
5 ივლ ტონიო გრანადა ელჩე თ.ა.
5 ივლ მარიო ალვარესი ბეტისი ელჩე თ.ა.
5 ივლ გაი ასულინი რასინგი გრანადა თ.ა.
5 ივლ დიეგო მარინიო ვილიარეალი ვალიადოლიდი თ.ა.
5 ივლ ორიოლ რიერა ალკორკონი ოსასუნა თ.ა.
5 ივლ იოან მოხიკა დეპ. კალი ვალეკანო იჯარა
5 ივლ გილერმო სარა ატლ. რაფაელა ბეტისი 0,8 მლნ.
5 ივლ ფლორიან ლეჟონი ვილიარეალი ბრესტი იჯარა
5 ივლ მანუ დელ მორალი სევილია ელჩე იჯარა
5 ივლ მიროსლავ სტევანოვიჩი სევილია ელჩე იჯარა
6 ივლ ბოიან კრკიჩი ბარსელონა აიაქსი იჯარა
6 ივლ მიგელ პალანკა ელჩე ნუმანსია თ.ა.
6 ივლ ხოსე ბარკერო ლევანტე სარაგოსა თ.ა.
6 ივლ აბდელ ბარადა ხეტაფე ალ ჯაზირა 10 მლნ.
6 ივლ ფერნანდო ტისონე სამპდორია მალაგა თ.ა.
6 ივლ ალვარო გარსია სან ფერნანდო გრანადა თ.ა.
6 ივლ სერჟიო პინტო ჰანოვერი ლევანტე თ.ა.
6 ივლ მიგელ ლინარესი ელჩე უელვა თ.ა.
6 ივლ ხესუს ვასკესი დეპორტივო უელვა თ.ა.
6 ივლ ჟერემი ტულალანი დეპორტივო უელვა 5 მლნ.
7 ივლ ალექსანდარ პანტიჩი ცრვენა ზვეზდა ვილიარეალი თ.ა.
7 ივლ სერხიო როდრიგესი ბეტისი ბარსელონა II იჯარა
7 ივლ კრისტიან ალვარესი ესპანიოლი სან ლორენსო თ.ა.
8 ივლ ერიკ აბიდალი ბარსელონა მონაკო თ.ა.
8 ივლ ხოსე მანუელ კასადო ვალეკანო ლევანტე თ.ა.
8 ივლ ხერარდ მორენო ვილიარეალი მალიორკა იჯარა
8 ივლ დავიდ ვილია ბარსელონა ატლეტიკო 5,1 მლნ.
8 ივლ დავიდ ლომბანი ბარსელონა II ელჩე თ.ა.
8 ივლ დუგლას დოს სანტოსი ნაუტიკო გრანადა თ.ა.
9 ივლ ხოსე კალეხონი რეალი ნაპოლი 10 მლნ.
9 ივლ სილვიო ატლეტიკო ბენფიკა იჯარა
9 ივლ ხოელ რობლესი ატლეტიკო ევერტონი 5 მლნ.
9 ივლ ჯოვანი დოს სანტოსი მალიორკა ვილიარეალი 6 მლნ.
9 ივლ ოლოფ მელბერგი ვილიარეალი კოპენჰაგენი თ.ა.
9 ივლ ხავი ფლანიო ელჩე მირანდესი თ.ა.
9 ივლ კრისტიან ბუსტოსი ელჩე მირანდესი იჯარა
9 ივლ კარლოს ბაკა ბრიუგე სევილია 7 მლნ.

ყოველდღიური სპორტული გაზეთი "ლელო"

ასევე იხილეთ:
დავიდ ვილია: ღმერთმა ქნას, აქაც ისეთივე ბედნიერი ვიყო, როგორც "ბარსელონაში"