კოპა დელ რეი. 1/8-ფინალი. I მატჩები: "რეალის" შანსი

კოპა დელ რეის პირველი მერვედფინალური მატჩები წუხელ "კამპ ნოუზე" დასრულდა, მანამდე კი ყველაზე დიდი აჟიოტაჟი "ატლეტიკოს" მიერ "რეალის" დამაჯერებელმა დამარცხებამ და "ლოს კოლჩონეროსის" შემადგენლობაში ფერნანდო ტორესის დაბრუნებამ გამოიწვია.

"ატლეტიკომ" თავისი სიძლიერე კიდევ ერთხელ გამოაჩინა სტანდარტული მდგომარეობებიდან - 58-ე წუთზე სერხიო რამოსი სულელურად მოიქცა საკუთარ საჯარიმოში და პენალტით რაულ გარსიამ დააწინაურა გუნდი.

76-ე წუთზე კუთხურს ხოსე მარია ხიმენესის თავური მოჰყვა - 2:0. "ელ ნინიო" მოედანზე 59-ე წუთამდე იყო, თუმცა ბევრი ვერაფერი შეძლო. საპასუხო დერბი 15 იანვარს "სანტიაგო ბერნაბეუზე" გაიმართება. "რეალს" საპასუხო მატჩში მთელი ძალისხმევა დასჭირდება, რათა ტიტული უკვე მერვედფინალურ ეტაპზე არ დაკარგოს.

კარლო ანჩელოტი (რეალი): "დღეს ჩვენ ვერ შევძელით იმ თამაშის ჩვენება, რაც შეგვიძლია. მართალია, საკმარისად მწვავედ ვერ ვთამაშობდით, მაგრამ პენალტამდე მატჩის მიმდინარეობას მაინც ჩვენ ვაკონტროლებდით. ბევრ დიაგონალურ პასს ვაკეთებდით, რომლებიც თამაშის ტემპს ანელებდნენ. ჩვენი მომენტები ვერ გამოვიყენეთ, მაგრამ, უნდა ითქვას, რომ "ატლეტიკო" თავს კარგად იცავდა.

ორი თამაში მიჯრით წავაგეთ, მაგრამ მე არ ვილაპარაკებდი კრიზისზე. ახლა წინ "ესპანიოლთან" მატჩია და საპასუხო შეხვედრა "ატლეტიკოსთან". მეოთხედფინალში გასვლის შანსი გვრჩება, თუმცა ის დიდი არ არის".

ფერნანდო ტორესი (ატლეტიკო): "ბედნიერი ვარ, რომ მშობლიურ გუნდში დავბრუნდი. აქ ყველაფერი ბრწყინვალედაა: სიტუაცია სტადიონზე, ფანები და შედეგიც. ყოველთვის სასიამოვნოა ისეთი მეტოქის დამარცხება, როგორიც "რეალია". "სანტიაგო ბერნაბეუზე" ძალიან გაგვიჭირდება. "რეალს" ბურთი კარგად "უჭირავს" და პირველ ნომრად კარგად თამაშობს. ჩვენ, უბრალოდ, უნდა შევუშალოთ მათ ხელი, შექმნან სახიფათო მომენტები. "ატლეტიკოს" თავისი შანსი მიეცემა და ის უნდა გამოვიყენოთ".

დიეგო სიმეონე (ატლეტიკო): "პირველ ტაიმში იყო მომენტები, როცა "რეალი" გვჯობდა. მეტოქემ აშკარად კარგად დაიწყო, თუმცა თამაშში კორექტივები შევიტანე და ამან კარგად იმუშავა, მატჩის მიმდინარეობა შეიცვალა. დავამტკიცეთ, რომ "რეალთან" კონკურენტუნარიანი გუნდი ვართ. ფერნანდო ტორესს დრო სჭირდება მისთვის ახალ გუნდში ადაპტაციისთვის. დღეს ის კარგი იყო, ენთუზიაზმით თამაშობდა და რამდენიმე ორთაბრძოლაც მოიგო".

ყოველდღიური სპორტული გაზეთი "ლელო"