ვინ წავა მადრიდის "რეალიდან"? დიდი წმენდის მოლოდინში

მადრიდის "რეალის" პრეზიდენტი ფლორენტინო პერესი ხშირად ისე იქცევა, როგორც ნამდვილი ქომაგი. ის თავისი პირადი შეხედულებებით უშვებს და ყიდულობს ფეხბურთელებს, ცვლის მწვრთნელებს. თუ ასე გაგრძელდა, თუ "სამეფო კლუბმა" თამაში ვერ გამოასწორა, ზაფხულში "რეალს" დიდი წმენდა ელოდება.

ჩვენც მივყვეთ სავარაუდო ტრანსფერთა ჯაჭვს.

"ოქროს ბურთის" მფლობელს ცუდი სეზონი აქვს. მას გაცილებით ნაკლები გოლი გააქვს, ვიდრე ადრე. რონალდო დაშორდა მეგობარ გოგონას. უარყოფითი ენერგიით დატვირთული ეჩხუბა ქომაგებსა და ჟურნალისტებს. პერესს ძალიან გაუჭირდება გუნდის უდავო ლიდერთან შელევა, მაგრამ ფაქტია, უკვე ბევრი იწერება "იუნაიტედის" ინტერესის შესახებ.

ცოტა ხნის წინათ პეპეს მოსალოდნელ წასვლაზე ბევრს საუბრობდნენ. მაშინ ელოდნენ, რომ პორტუგალიელი მცველი ძირითად შემადგენლობაში ადგილს ნიჭიერ ფრანგ რაფაელ ვარანს დაუთმობდა. ვარანის პროგრესი სასურველი ტემპით ვერ წარიმართა და კარლო ანჩელოტის ხელში პეპეც დიდებულია. მან პირველი ყვითელი ბარათი პრიმერას 25-ე ტურში მიიღო.

ბენზემა უკვე ვეღარასოდეს იქნება ის სუპერფორვარდი, რომლის ნახვასაც "რეალის" ქომაგები შეტევის ფორპოსტზე იმედოვნებენ. ის კარგად ასრულებს შეტევას, შესანიშნავია ბურთის გათამაშების დროს და წლიდან წლამდე უფრო და უფრო სასარგებლო ხდება, მაგრამ... ის არ არის მეგაფორვარდი. პერესს კი სწორედ ასეთი შემტევი სურს.

ესპანური გაზეთები ხშირად ვარაუდობენ, რომ მომდევნო მატჩში "რეალის" კარში იკერ კასილიასს კეილორ ნავასი შეცვლის, მაგრამ ეს ასე არ ხდება. ცხადია, ნავასს არ სურს ამდენი დროის გატარება "სამეფო კლუბის" სათადარიგოთა სკამზე.

მიმდინარე სეზონში "სანტიაგო ბერნაბეუზე" მართლაც განსაკუთრებული სიტუაციაა. ნახევარი სტადიონი კასილიასს უსტვენს, ნახევარი კი - ტაშს უკრავს. იკერის თამაშიც ასეთია: ის ხან სასწაულებს ახდენს, ხანაც კეილორ ნავასს აძლევს შანსს. ერთიც ვნახოთ და, კასილიასმა სეზონის ბოლოს თავის პირმშვენიერ მეუღლეს, ჟურნალისტ სარა კარბონეროს დაუჯერა და... ამერიკისკენ გაუტია?!

ინგლისური და ესპანური გაზეთების უმრავლესობა დღემდე მიიჩნევს, რომ ბეილი, უბრალოდ, ზედმეტია "რეალისთვის". უელსელ ვარსკვლავს საყვედურობენ, რომ ის საერთოდ ვერ ჩაეწერა გუნდურ ანსამბლში. მართლაც: საკმარისია, ბეილის ნაცვლად მინდორზე ისკო გამოჩნდეს, რომ "რეალი" უკეთ ათამაშდება ხოლმე.

თუ "რეალი" ჩემპიონთა ლიგას ვერ მოიგებს, ფლორენტინო პერესისგან ნებისმიერ გადაწყვეტილებას უნდა ველოდოთ. პერესი მწვრთნელებს არ ეფერება. სხვა თუ არაფერი, ისტორიულ წიაღსვლებს შევეშვათ და ჟოზე მოურინიოს მაგალითი გავიხსენოთ. ამ ეტაპზე ანჩელოტი ხელშეუხებლად მოჩანს, მაგრამ ვინ იცის, რა იქნება სეზონის ბოლოს.

ამბიციური პორტუგალიელი დროს ტყუილად ფლანგავს მადრიდში. ფაქტია - მას მარსელოსთან კონკურენციის მოგების იოტისოდენა შანსიც კი არა აქვს. პორტუგალიელი ინგლისისკენ იცქირება.

"რეალისთვის" ტრადიციული ისტორია: ახალგაზრდა ტალანტი ვერ უძლებს უდიდეს კონკურენციას. ხესეს, ალბათ, გაანათხოვრებენ. ბევრი გვინახავს ასეთი მოგზაურობიდან "რეალში" დაბრუნებული ფეხბურთელი?

ახალ "რეალში" 32 წლის მცველის ადგილი არ იქნება. ჟოზე მოურინიოს "ერთგული ჯარისკაცი" ვერაა ოპტიმალურ ფორმაში, თან ასაკიც დაეტყო. ყველას ახსოვს არბელოას კონფლიქტი იკერ კასილიასთან.

ილიარამენდიმ ზამთარში "ბილბაოში" წასვლა იუარა. ახლა სადმე გადასვლა მაინც მოუწევს. "რეალში" ის საშუალოდ 20 წუთს თამაშობს. ასე ის ვერაფრით მოხვდება ესპანეთის ნაკრებში. არადა, ბასკს ამის პოტენციალი აქვს.

შეგვიძლია ჩავთვალოთ, რომ გერმანელი საყრდენი უკვე წასულია "რეალიდან". ხედირა ვერასოდეს დაიბრუნებს კარლო ანჩელოტის ნდობას. ის უკვე შეუთანხმდა "შალკეს".

ყოველკვირეული ჟურნალი "ლელო week"