რაფაელ ბენიტესის ცრემლიანი დებიუტი მადრიდის "რეალში"

3 ივნისს დაუფარავი გაცხადდა - რაფაელ ბენიტესი 2018 წლის ზაფხულამდე მადრიდის "რეალის" თავკაცია. კარლო ანჩელოტის შემცვლელი ფლორენტინო პერესმა მედიას წარუდგინა, მან კი ემოციებს გზა მისცა და ატირდა. დიახ, ზოგჯერ დებიუტშივე ტირიან.

ჩემთვის ძალიან ემოციური და გამორჩეული დღეა. სახლში დაბრუნება ჩემი ყველაზე სასურველი მიზანი იყო და ეს მიზანი მიღწეულია. თუმცა ამისთვის ძალიან დიდხანს ვიშრომე და ბევრგან ვიმუშავე. ძალიან სასიამოვნოა იმ ადამიანებთან შეხვედრა, რომელთაც დიდი ხანია, იცნობ. დღეს ძალიან სასიხარულო დღეა.

ურთულესი საქმე მელის, უდიდესი გამოწვევა და მოტივაციაა "რეალის" მწვრთნელობა. ყველაზე წინ ყოველთვის უნდა დავაყენოთ გუნდის ინტერესები. უნდა ვიმარჯვებდეთ და თითოეული ფეხბურთელისგან მაქსიმუმი მივიღოთ.

სწორება გუნდურობაზე უნდა გვქონდეს და არა ცალკეულ ფეხბურთელებზე. "რეალს" ბრწყინვალე შემადგენლობა ჰყავს, კონკურენტუნარიანი და მაღალპროფესიული. ფეხბურთელების შერჩევა ისეთია, თვალს უხარია.

თითოეულ რეალელს შეუძლია უმაღლესი ხარისხის ფეხბურთის ჩვენება. ვინ ითამაშებს კონკრეტულ შეხვედრაში, ყოველთვის კონკრეტული მატჩიდან იქნება გამომდინარე.

"რეალი" ყოველთვის ფავორიტია კარგი ფეხბურთელების ბაზარზე, მაგრამ, როგორც უკვე აღვნიშნე, გუნდში ისედაც ძალიან კარგი შემადგენლობაა თავმოყრილი. ვინ თქვა, რომ დაცვითი ფეხბურთის მეხოტბე ვარ? "ნაპოლისთან" ერთად იტალიაში შედეგიანობის რეკორდებს ვამხობდი. ბოლო ორი სეზონია, ყველაზე მეტი გაგვქონდა.

სათამაშო სქემების ნაცვლად, ვისურვებდი სათამაშო იდეებზე ლაპარაკს. ფეხბურთელი მოედანზე რომ გადის, მან უნდა იცოდეს, ვინ არის მისი მოწინააღმდეგე, რა უნდა აკეთოს და როგორ უნდა მიაღწიოს მიზანს.

"რეალში" ყველაზე ძლიერი კოლექტივია, ვისთანაც მიმუშავია. აქ დიდი კალიბრის ფეხბურთელები თამაშობენ. მათი თამაში სხვისას არ ჰგავს. უნდა შევინარჩუნოთ "რეალის" შეტევაზე ორიენტირებული ფსიქოლოგია. ჩემი სურვილია, გუნდმა გაართოს პუბლიკა, მოიგოს თამაშები და ტიტულები.

პრეზიდენტმა ჩვენსავით კარგად იცის, რომ ჩვენი ამოცანა მაქსიმუმის გაღება და შეძლებისდაგვარად, ყველაფრის მოგებაა. "ნაპოლიში" ცოტა სხვა დონის შემადგენლობით, სამ ტურნირზე ვიბრძოდი და ასე უნდა იყოს აქაც.

ჩვენი მიზანი ასეთია: ლა ლიგის მოგება, ჩემპიონთა ლიგის მოგება და სამეფო თასის მოგება.
ახლა ჩემი შტაბი აანალიზებს ყველაფერს, კარგსაც და არც ისე კარგსაც. ეს კეთდება იმისთვის, რომ მომავალში ცვლილებები დავიწყოთ. ჩვენ მოვდივართ იდეებით, მაგრამ ძალიან ბევრია დამოკიდებული ფეხბურთელებზე.

როცა "ლივერპულში" მივედი, მითხრეს, რომ სერიოზულ შედეგებს ელიან, ოღონდ სამ სეზონს მაცლიან. არადა, ჩემპიონთა ლიგა პირველივე სეზონში მოვიგეთ. აქ ასე არაა - რა თქმა უნდა, წარმატებისთვის დრო საჭიროა, მაგრამ აქ ამ დროს არავინ მოგცემს, მოგება ახლავეა საჭირო. "რეალის" მიზნები სხვაა, სხვების - სულ სხვა.

ეჭვიც არ მეპარება, ფეხბურთელებს მხოლოდ კარგი მოგონებები დარჩებოდათ კარლოსთან მუშაობით, ის ხომ ბრწყინვალე ადამიანია. მინდა, რომ რამდენიმე წლის მერე ფეხბურთელებმა მეც ასე თბილად გამიხსენონ. ჩვენ კარგი ურთიერთობა გვაქვს და ჩემ დანიშვნამდე მასთან საუბარიც მქონდა.

დოსიე
რაფაელ "რაფა" ბენიტეს მაუდესი
დაიბადა: 1960 წ. მადრიდი (ესს)
საფეხბურთო კარიერა: რეალ კასტილია, გუარდამარი, პარლა, ლინარესი
სამწვრთნელო კარიერა: 1993-95 - რეალ კასტილია, 1995/96 - ვალიადოლიდი; 1996 - ოსასუნა; 1997-99 - ექსტრემადურა; 2000/01 - ტენერიფე; 2001-04 - ვალენსია; 2004-10 - ლივერპული; 2010/11 - ინტერი; 2012/13 - ჩელსი; 2013-15 - ნაპოლი; 2015-დან - რეალი.

ყოველდღიური სპორტული გაზეთი "ლელო"