გრასიას, ამიგო - როგორ გამოეხმაურნენ ვარსკვლავები იკერ კასილიასის ტრანსფერს

მაშ ასე, იკერ კასილიასის 25-წლიანი ეპოპეა (აქედან 16 სეზონი პროფესიულ კარიერაში) მადრიდის "რეალში" დასრულდა.

ვნახოთ, როგორ გამოეხმაურნენ მისი თანაგუნდელები თუ სხვა ვარსკვლავები იკერის ტრანსფერს "პორტუში" სოციალურ ქსელში.

"ფეისბუქზე", "თვითერსა" და "ინსტაგრამზე" ჰაშთეგით, #GraciasIker ბევრი საინტერესო კომენტარი დაიწერა.

"ჩემთვის უდიდესი პატივი იყო ორი წელი იკერ კასილიასის გვერდით თამაში. ფეხბურთის ნამდვილი ლეგენდა. გისურვებ ყველანაირ წარმატებას, მეგობარო", - გარეთ ბეილი.

"10 წელიწადი ერთად და ძალიან, ძალიან ბევრი გასახსენებელი მომენტი ცხოვრებაში. დიდი კაპიტანი, მადლობა", - სერხიო რამოსი.

ანდრეს ინიესტა (ბარსელონა): "იკერ, გისურვებ წარმატებას ახალ კლუბში", - და იკერთან ერთად ხელგადახვეული თავისი ფოტო გამოაქვეყნა.

დევიდ ბექჰემი კასილიასთან ჩახუტებულ ფოტოს აქვეყნებს: "რა შეიძლება ითქვას კიდევ ამ ადამიანზე? გული მწყდება, როცა ვხედავ, როგორ ტოვებს იკერი გუნდს. ის ტოვებს გუნდს, რომელიც ასე უყვარდა და რომლისთვისაც ყველაფერი გაიღო, რაც შეეძლო. ის ჩემი მეგობარია და საოცარი პიროვნება. ის ფეხბურთის ისტორიაში ერთ-ერთი საუკეთესო გოლკიპერია. "რეალ მადრიდის" ნამდვილი ლეგენდა, გრასიას, ამიგო", - გამოაქვეყნა თავის "ინსტაგრამზე" "რეალის" ყოფილმა ინგლისელმა ვარსკვლავმა.

ხამეს როდრიგესი "თვითერზე": "ამაყი ვარ, რომ საერთო გასახდელი მქონდა ფეხბურთის ლეგენდასთან "რეალში". მადლობა ყველაფრისთვის, კაპიტანო".

ასიერ ილიარამენდი: "ვამაყობ, რომ შენი თანაგუნდელი ვიყავი. გისურვებ ყველაფერს საუკეთესოს, შენი კარიერის ახალ ეტაპზე".

დანიელ კარვახალი "ინსტაგრამზე": "მადლობა ყველაფრისთვის, შენ ძალიან ბევრი მასწავლე "რეალში".

მესუთ იოზილი "ინსტაგრამზე": "იკერ კასილიასი 25-წლიანი ერთგულების შემდეგ მიდის "რეალიდან". ის ნამდვილი ცოცხალი ლეგენდაა. იკერი ჩემი მეგობარია. გისურვებ, მეგობარო, მორიგ ტიტულებს ახლა "პორტუს" რიგებში".

ხესე როდრიგესი "თვითერზე": "შენ ხარ და ყოველთვის იქნები ლეგენდა ამ კლუბში. ძალიან მოგვენატრები. მთელი ცხოვრება შენი მადლიერი ვიქნები, შენი რჩევებისთვის, გვერდში დგომისთვის და შენ გვერდით თამაშის შანსის მოცემისთვის. იღბალს და წარმატებას გისურვებ".

ყოველდღიური სპორტული გაზეთი "ლელო"