ლა ლიგა. IV ტური: "რეალის" მოკრძალებული გამარჯვება [VIDEO]

19 სექტემბერს ესპანეთის ლა ლიგის IV ტურის 4 შეხვედრა გაიმართა.

მადრიდის "რეალმა" "გრანადა" მოკრძალებული ანგარიშით დაამარცხა - 1:0. გამარჯვების გოლი ქარიმ ბენზემას ანგარიშზეა, რომელმაც ისკოს პასით გაიტანა.

კეილორ ნავასმა პირველი ოთხი სასტარტო ტური კარი მშრალად შეინახა, მან "რეალის" ძველი მეკარის, მიგელ ანხელის რეკორდი გაიმეორა (1975 წ).

რაფა ბენიტესი (რეალი): "ჩვენ კარგად ვიცოდით, რომ გაგვიჭირდებოდა, ძალიან ორგანიზებული გუნდია "გრანადა", რომელიც კონტრშეტევებზე კარგად თამაშობს. ჩვენ კი ჩვენი შანსები ვერ გამოვიყენეთ".

ხოსე რამონ სანდოვალი (გრანადა): "მე მხოლოდ მოგება მაკმაყოფილებს. არავის სჯეროდა ჩვენი, "რეალიც" ზემოდან გვიყურებდა, მათ ოფიციალურ საიტზე ბჭობდნენ, გაგვიტანდნენ თუ ვერა ცხრა გოლს. ახლა კი, მარცხის მიუხედავად, ჩემი ბიჭებით ამაყი ვარ".

"ბეტისთან" "ღამურებმა" ნახევარი თამაში რიცხობრივ უპირატესობაში ჩაატარეს, მაგრამ ამით ნუნუ ესპირიტო სანტუს გუნდმა ხეირი ვერ ნახა - 0:0.

"ეიბართან" მატჩის გმირები არგენტინელი ანხელ კორეა და ფერნანდო ტორესი გახდნენ, მათ ანგარიშზე თითო გოლი და საგოლე პასია, ორივე მოედანზე შეცვლაზე შევიდა, "ატლეტიკომ" კი სტუმრად ისეთივე ანგარიშით მოიგო, როგორც ეს "გალათასარაისთან" შეძლო სტამბოლში - 2:0.

"ანოეტაზე", თითქოს, ყველაფერი კარგად დაიწყო "რეალ სოსიედადისთვის", როცა იმანოლ აგირეჩემ ახლო მანძილიდან გახსნა ანგარიში, მაგრამ ყველაფერი ცუდად დასრულდა, პარაგვაელმა ერნან პერესმა თავურით ლამის დახვრიტა ოიერ ოლასაბალის კარი - 3:2 სტუმარი "ესპანიოლის" სასარგებლოდ.

ამ შეხვედრაში საკვანძო ეპიზოდი პირველი ტაიმის მიწურულს მოხდა, როცა მეკარე რულიმ სტუმართა ტალანტი მარკო ასენსიო წააქცია, ბასკებმა პენალტიც მიიღეს და კაცნაკლულნიც დარჩნენ.

მოკლედ, დევიდ მოეიესის თავზე შავმა ღრუბლებმა მოიყარეს თავი.

რეალი-გრანადა 1:0
გოლი: 1:0 ბენზემა (55)

ვალენსია-ბეტისი 0:0
გაძევება: სებალიოსი (48. ბეტისი)

ეიბარი-ატლეტიკო 0:2
გოლები: 0:1 ა. კორეა (62), 0:2 ფ. ტორესი (77)

სოსიედადი-ესპანიოლი 2:3
გოლები: 1:0 აგირეჩე (20), 1:1 მორენო (44-პენ), 1:2 როკო (71), 2:2 ჟონათასი (86), 2:3 ე. პერესი (90)

1. რეალი - 10 ქულა; 2. ატლეტიკო - 9; 3. ბარსელონა - 9; 4. სელტა - 7; 5. ვილიარეალი - 7.