ცოტა ხნის წინ, კევინ გროსკროიტცი ჯერ კიდევ „ვესტფალენშტადიონის“ სახმრეთ ტრიბუნაზე იდგა ხოლმე, სხვა ფანებთან ერთად, ფეხბურთს კი ძალიან დაბალი დონის გუნდში, „ალენში“ თამაშობდა. 22 წლის შემტევი ნახევარმცველი „დორტმუნდის“ მწვრთნელმა იურგენ კლოპმა აღმოაჩინა და მას BVB-ს ფორმა მოარგო. ამ სეზონში კევინმა 33 მატჩი ჩაატარა, 6 გოლი გაიტანა და 7 საგოლე გადაცემა გააკეთა. თამამად შეიძლება ითქვას, რომ ის უკვე „ბორუსიას“ ერთერთი ლიდერია. თანაც, გერმანიის ნაკრების ფეხბურთელიც გახდა...- ჰერ გროსკროიტც, დორტმუნდში დაიბადეთ და დორტმუნდში გაიზარდეთ, ბავშვობაში აუტების დროს „ვესტფალენშტადიონზე“ ბურთის მიმწოდებელი იყავით,
- ასეთი რამ გერმანიაში მხოლოდ მაშინ ხდება, როცა ჩემპიონი „ბორუსიაა“ ხოლმე. BVB-ს ყველაზე ერთგული ფანები ჰყავს და ამ მხრივ ვერასდროს ვერავინ გვაჯობებს. ეს ზღაპრული დღეებია.
- ათასობით გულშემატკივარმა ჩემპიონების ახლოს ნახვა ვერ შეძლო, რადგან ქუჩებში 450 000-ზე მეტი ფანი გამოვიდა, თქვენ კი ყველგან ვერ მიხვედით.
- ვფიქრობ, უკმაყოფილო არავინ დარჩენილა. ყველასთან მისვლა მართლა შეუძლებელი იყო, მაგრამ არა უშავს, ავტოგრაფების ჩამორიგებას სხვა დროსაც მოვასწრებთ.
- ორი-სამი წლის წინ წარმოგედინათ, რომ „ბორუსიას“ ფეხბურთელის რანგში გერმანიის ჩემპიონი გახდებოდით?
- ცხადია, ამას ვერ წარმოვიდგენდი. პირველ რიგში იმიტომ, რომ მაშინ ყველასათვის უცნობი ფეხბურთელი ვიყავი და მხოლოდ ოცნების დროს თუ ვიფიქრებდი იმას, რომ ერთხელაც, BVB-ს მოთამაშის რანგში ჩემპიონობას ვიზეიმებდი. ორი წლის წინ მეთვითონ მხოლოდ გულშემატკივარი ვიყავი, ფეხბურთს კი მეორე და მესამე ბუნდესლიგებში, „ალენის“ ფორმით ვთამაშობდი. ხომ გეუბნებით, ჩემს შემთხვევაში მოვლენები მართლა ისე განვითარდა, როგორც ზღაპრებში ხდება ხოლმე.
- გიხარიათ, შვებულება რომ დაიწყო?
- რა თქმა უნდა, რადგან ძალების აღდგენაა საჭირო. მომავალ სეზონში ჩემპიონთა ლიგაში ვითამაშებთ და იქაც ძალიან კარგად უნდა ვიასპარეზოთ. ჩემპიონის ტიტულის შენარჩუნებაც გვინდა.
- ახლა ჩემპიონები ხართ და ცხადია, რომ მომდევნო სეზონში უმძიმესი წნეხის ქვეშ მოექცევით...
- პირადად მე არ მახსოვს სეზონი, როცა „დორტმუნდი“ წნეხის ქვეშ არ იყო. კარგია, რომ ფანები გვენდობიან. მათ იციან, რომ თავს არცერთი ჩვენგანი არ დაზოგავს, ეს კი ყველაზე მთავარი რამაა.
- ჩემპიონთა ლიგაში უდიდესი გამოწვევის წინაშე დადგებით. უკვე იცით, რომელ გუნდებთან ერთად გსურთ ჯგუფში მოხვედრა?
- ყველაზე დიდი სიამოვნებით იქ ვთამაშობ, სადაც სტადიონზე ბევრი ფანი მოდის და იდეალური საფეხბურთო ატმოსფერო იქმნება. აქედან გამომდინარე, მინდა, რომ მაგალითად, „ნაპოლისთან“ ან გლაზგოს „სელტიკთან“ ერთად მოვხვდეთ. სამწუხაროდ, „ლივერპული“ ჩემპიონთა ლიგაში არ იასპარეზებს, თორემ პირველ რიგში ამ გუნდთან თამაშს მოვინდომებდი. არა უშავს, სამაგიეროდ, „მანჩესტერ იუნაიტედის“ წინააღმდეგაც სიამოვნებით ვითამაშებთ.
- ამ სეზონში „ბორუსია“ ევროპის ლიგაზე ასპარეზობდა და ვინც თქვენს მატჩებს უყურა, ფიქრობს, რომ BVB-ს საერთაშორისო ასპარეზზე ბევრის მიღწევა არ შეუძლია. როგორ ფიქრობთ, „რეალთან“ ან „ბარსელონასთან“ დაპირისპირების შემთხვევაში გამარჯვების შანსი არ გექნებათ?
- ჩემი აზრით, ევროპის ლიგაში უბრალოდ არ გაგვიმართლა. გაიხსენეთ, ყველა შეხვედრაში დომინანტის რანგში ვიყავით, „სევილია“ ათი კაცით მივაჯაჭვეთ საჯარიმოს. უბრალოდ, გოლები ვერ გავიტანეთ და 0:1 წავაგეთ. მოკლედ, მე დარწმუნებული ვარ, რომ ჩემპიონთა ლიგაში კარგად ვიასპარეზებთ.
- ნური შაჰინმა გუნდი დატოვა. რამდენად მტკივნეულია ეს „ბორუსიასთვის“?
- მე მისი ძალიან კარგად მესმის – ნურის გაკრიტიკება არ შეიძლება. მას შესანიშნავი პერსპექტივა გაუჩნდა და ამაზე უარის თქმას ვერავინ აიძულებდა. რვა წელია, რაც შაჰინს ვიცნობ და თამამად შემიძლია ვთქვა, რომ ძალიან კარგი ადამიანია. ეს „დორტმუნდის“ ქომაგებმაც იციან. მჯერა, „რეალის“ ლიდერი გახდება და ჩვენს სკოლას ასახელებს.
- არადა, შაჰინი ძალიან ბევრმა ქომაგმა გააკრიტიკა...
- არა მგონია, რომ მასზე ბევრი იყოს გაბრაზებული. ჩემი აზრით, ვინც ახლა შაჰინს ლანძღავს, ის ფეხბურთის აზრზე არაა. ნაღდი ფანები მას ძალიან აფასებენ და ემადლიერებიან.
- გუნდს თქვენი უსაყვარლესი ფეხბურთელი, დედეც დატოვებს...
- დედეზე მე ახალს ვერაფერს ვიტყვი – ყველამ იცის, რამდენად დიდი ადამიანია. ფაქტია, რომ ბრაზილიელი სიკვდილამდე მეყვარება. სხვათა შორის, 9 ივლისს ბრაზილიაში მივყვები. ვამაყობ, რომ მისი მეგობარი ვარ.
- მომდევნო სეზონში, შესაძლოა, ერთმანეთის წინააღმდეგ თამაში მოგიხდეთ. ამბობენ, დედეს გადაბირება ბერლინის „ჰერტას“ და „ბოხუმს“ უნდათო...
- ეს ძალიან სამწუხარო იქნებოდა. არ მინდა, რომ დედემ ბუნდესლიგაში რომელიმე სხვა გუნდის ფორმით ითამაშოს. ასე იქნება, თუ ისე, მის ნებისმიერ გადაწყვეტილებას პატივი უნდა ვცეთ.
