გახსოვთ, როგორ აპროტესტებდნენ „ბაიერნის“ გულშემატკივრები მანუელ ნოიერის მოსალოდნელ ტრანსფერს? გასული სეზონის ბოლო მატჩებში მათ არაერთხელ გადმოფინეს ტრანსფარანტები, სადაც წერდნენ, მანუელ, მიუნხენი შენი სახლი არასდროს იქნებაო. ვერ ვიტყვით, რომ მიზეზი არ ჰქონდათ, თუმცა თითიდან იყო გამოწოვილი: ორი წლის წინ, ნოიერმა „ალიანს არენაზე“ ნებისმიერი ბავარიელისთვის დიდად პატივსაცემი პიროვნება, თვით ოლივერ კანი გააჯავრა და მიუნხენური პუბლიკა ნოიერს მას მერე ვერ იტანდა.
არ გასულა ორ თვეზე მეტი, „ბაიერნის“ ხელმძღვანელებმა მანუელ ნოიერი მაინც იყიდეს და ახლა უკვე რადიკალურად განსხვავებული სიტუაციაა. მართალია, ჯერ კიდევ იარსებებენ „ბაიერნის“
„ამ სეზონში ჩვენი მთავარი მიზანი გერმანიის ჩემპიონობის დაბრუნება იქნება. წინა სეზონში თავი შევირცხვინეთ, ახლა კი, პირველივე ტურში უნდა დავამტკიცოთ, რომ „ბაიერნი“ საუკეთესო გერმანული კლუბია,“ - ასე მიმართა 30 000-იან პუბლიკას რეკორდმაისტერის ვიცე-პრეზიდენტმა კარლ-ჰაინც რუმენიგემ.
მიუნხენელები ფიქრობენ, რომ ნოიერის, რაფინიას (ჯენოადან) და ნილს პეტერსენის ტრანსფერებით გუნდი ჯეროვნად გააძლიერეს, ხელმძღვანელები კი ყველაზე კმაყოფილები იმით ჩანან, რომ მთავარ მწვრთნელად იუპ ჰაინკესი დანიშნეს. რუმენიგე: „იუპი არის იდეალური კაცი, იდეალურ დროს, იდეალურ ადგილზე. დარწმუნებული ვარ, რომ „ბაიერნი“ მასთან ერთად დიდ წარმატებებს მიაღწევს.“
ისაუბრა ჰაინკესმაც და კიდევ ერთხელ, ვინ მოთვლის, უკვე მერამდენედ გაიმეორა, რომ „ბაიერნში“ მესამედ დაბრუნება მისთვის დიდი გამოწვევაა, რომ მიუნხენური კლუბი მას ყოველთვის „გულში ჰყავდა“ და რომ თვითონაც დარწმუნებულია, რომ რეკორდმაისტერთან ერთად წარმატებებს მიაღწევს.
მართალია, „ბაიერნს“ ჯერ კიდევ არ უყიდია კიდევ ორი სასურველი მოთამაშე (ჟერომ ბოატენგი და არტურო ვიდალი), მაგრამ რუმენიგე და კომპანია მიიჩნევენ, რომ ამ ტრანსფერების შემთხვევაში საჩქარო არაფერია. „კალე“ ფიქრობს, რომ რეკორდმაისტერის ვიდალისა და ბოატენგის გარეშეც უმაღლესი კლასის გუნდია. სპორტული დირექტორის, კრისტიან ნერლინგერის თქმით, „ბაიერნი“ ბოატენგსა და ვიდალში ასტრონომიული თანხების გადახდას არ აპირებს.
„თუ „მანჩესტერ სიტი“ ბოატენგს იმ თანხის სანაცვლოდ არ მოგვყიდის, რაც ჩვენ შევთავაზეთ, მიზანს ალტერნატივებისკენ მივმართავთ, რადგან ვფიქრობთ, რომ ბოატენგში მეტის გადახდა არ შეიძლება, - ამბობს რუმენიგე და რაც შეეხება ვიდალს, - „ლევერკუზენს“ ვერ გავამდიდრებთ. თუ ახლა არაფერი გამოვა, ვიდალს ხელში გაისად ჩავიდგებთ და სხვათა შორის, უფასოდ!“
გუშინ, რეკორდმაისტერმა გეზი იტალიისკენ, კერძოდ რივა დელ გარდასკენ აიღო, სადაც ჰაინკესი შეგირდებს ახალი სეზონისთვის მოამზადებს. „დინ იუპის“ თქმით, მოსამზადებელი შეკრების მთავარი მიზანი ის არის, რომ დაცვით და შემტევ ფეხბურთს შორის იდეალური ბალანსი დაიჭიროს.
ყოველდღიური სპორტული გაზეთი "ლელო"
