ბოლო დროს არაერთხელ ვწერდით იმის შესახებ, რომ „შალკეს“ მენეჯერმა ჰორსტ ჰელდტმა სეზონის დასრულების შემდეგ „დიდი წმენდა“ დაიწყო. ფელიქს მაგათის მწვრთნელობისა და მენეჯერობის დროს, გელზენკირხენული კლუბის განაცხადში 45 ფეხბურთელი იყო, გუნდის ახალმა თავკაცმა რალფ რანგნიკმა კი თქვა, რომ ამდენი ფეხბურთელი არ სჭირდება. მას მერე, „შალკემ“ 15 ფეხბურთელი უკვე გაუშვა - ზოგს კონტრაქტი გაუწყვიტა, ზოგი გაყიდა, ზოგიც გაანთხოვრა. ჰელდტი ამბობს, განაცხადში 24-25 მოთამაშეზე მეტი არ გვჭირდებაო, დღეს კი რანგნიკის განკარგულებაში 30 ფეხბურთელია, რაც იმას ნიშნავს, რომ „ხუმარებმა“ კიდევ 5 მოთამაშე უნ
ჩვენთვის ყველაზე საინტერესო ის არის, „ბილდის“ ინფორმაციით, იმ ხუთ მოთამაშეს შორის, რომლებიც „შალკემ“ უნდა მოიშოროს, ლევან ყენიას გვარიც ფიგურირებს. ქართველ გამთამაშებელთან ერთად, ჩვენი ბილდელი კოლეგების ცნობით, გელზენკირხენული კლუბი ტრანსფერზე ჯერმეინ ჯონსს, ანტონი ანანს, იან მორავეკს და ხუნმნინ ჰაოს აყენებს.
თუმცა, ეს მხოლოდ „ბილდის“ ინფორმაციაა. ოფიციალურ კომენტარში კი, მენეჯერი ჰელდტი მხოლოდ ანანისა და ჰაოს გაყიდვის სურვილს ადასტურებს. ჰორსტი ამბობს, ამ ფეხბურთელებს უკვე ველაპარაკე და ვუთხარი, რომ ახალი გუნდები უნდა ეძებონო.
„ბილდის“ ცნობით, ჰაოს გადაბირებით რუსული კლუბი, გროზნოს „ტერეკი“ დაინტერესდა და ეს ცნობა გუშინ ჰელდტმაც დაადასტურა. მისი თქმით, „ტერეკის“ ხელმძღვანელებმა „შალკეს“ ოფისში ფაქსი გამოგზავნეს, სადაც იტყობინებოდნენ, რომ მოლაპარაკებების დასაწყებად შეხვედრა სურთ. ჩვენი გერმანელი კოლეგები იმასაც წერენ, რომ „შალკემ“ ჰაოს სანაცვლოდ 2.5 მილიონი ევრო მოითხოვა. აღსანიშნავია, რომ ამ ფეხბურთელის შეძენით გერმანული კლუბები, „კიოლნი“, „შტუტგარტი“ და „ლევერკუზენიც“ არიან დაინტერესებულები. რაც შეეხება ყენიას საკითხს, თუ „ბილდის“ მიერ გავრცელებული ცნობა მართალია, წესით, ამ დღეებში კიდევ უფრო მეტი რამ უნდა გახდეს ცნობილი...
ყოველდღიური სპორტული გაზეთი "ლელო"
