ჰუუბ სტევენსისა და კიდევ რამდენიმე კანდიდატის შემდეგ, "ჰამბურგის" გაწვრთნა "ბაზელის" თავკაცმა ტორსტენ ფინკმაც იუარა. ჩვენი გერმანელი და შვეიცარიელი კოლეგების ცნობით, ფინკი ჩრდილოგერმანული კლუბის სპორტულ დირექტორ ფრანკ არნესენს შაბათს შეხვდა და მცირეხნიანი მოლაპარაკების შემდეგ უარით გაისტუმრა."ბილდის" ცნობით, არნესენთან შეხვედრამდე ფინკმა "ბაზელის" ვიცე-პრეზიდენტ ბერნჰარდ ჰოისლერთან გამართა მოლაპარაკება და სწორედ მაშინ გადაწყდა, რომ ტორსტენი "ბაზელში" დარჩებოდა. ეს ცნობა მოგვიანებით თავად ჰოისლერმაც დაადასტურა. 43 წლის ფინკს შვეიცარიულ კლუბთან კონტრაქტი 2013 წლამდე აქვს გაფორმებული.
ამრიგად, "ჰამბურგის" ჯოჯოხეთი გრძელდება: არნესენი ახალ დამრიგებელს უკვე ქაოტურად ეძებს.
ყოველდღიური სპორტული გაზეთი "ლელო"
