მიუნხენის "ბაიერნის" ნახევარმცველებს, ფრენკ რიბერის და არიენ რობენს ბოლო დროს საკმაოდ დაძაბული ურთიერთობა ჩამოუყალიბდათ. ისინი მადრიდის "რეალთან" ჩემპიონთა ლიგის ნახევარფინალის მატჩში ერთმანეთს კვლავ წაეკამათნენ.
ერთ-ერთ ეპიზოდში ფრანგ და ჰოლანდიელ ფეხბურთელებს შორის ცხარე კამათი გაიმართა იმასთან დაკავშირებით, თუ ვის უნდა შეესრულებინა საჯარიმო დარტყმა. შემდეგ კი გასახდელისკენ მიმავალ გვირაბში ლამის იჩხუბეს. დაპირისპირება მხოლოდ თანაგუნდელების ჩარევამ აღკვეთა.
მომხდარის შემდეგ ორივე მოთამაშე კლუბის ხელმძღვანელობის ერთ-ერთ წარმომადგენელთან დაიბარეს. ფეხბურთელებს კატეგორიულად მოსთხოვეს, გუნდის ინტერესები საკუთარზე მაღლა დააყენონ.
