საინტერესო ამხანაგური მატჩი გამართა მეორებუნდესლიგელ "კაიზერსლაუტერნთან" "ბაიერნმა". თუ იმას არ ჩავთვლით, რომ დაცვის ხაზი, შარშანდელი მოსამზადებელი პერიოდისა არ იყოს, სუსტად გამოიყურებოდა, "რეკორდმაისტერის" ფანებს სერიოზული სანერვიულო არ მისცემიათ. წინა ხაზში კონკურენციის გაჩენის შემდეგ იუპ ჰაინკესის შეგირდთაგან აშკარად დაეტყო გამოცოცხლება მარიო გომესს, ვინც მატჩის პირველი ორი მომენტი შექმნა. მან პირველად ფლანგიდან ჩაწოდებული შორეული ბურთი დაიმორჩილა და ტობიას ზიპელს მიწიდან ასხლეტილი დაურტყა. მეკარემ ფანტასტიკური რეაქცია შეაგება.
შემდეგ კი 24-25 მეტრიდან გაისროლა, მაგრამ ძელს მოარტყა. ანგარიში გომესის მონაწილეობითვე გაიხსნა. არიენ რობენის გარღვევის შემდეგ ის
ბურთი საბოლოოდ თომას მიულერს მიუვიდა, ვინც ცარიელ კარში გაიტანა. მასპინძლებმა საჯარიმო დარტყმით გაათანაბრეს.
აქ მანუელ ნოიერის შეცდომაზე შეიძლებოდა გვეთქვა ორიოდე სიტყვა... მალე შეცდომა უკვე მსაჯმა დაუშვა, როცა რობენის წაქცევისთვის 100%-იანი პენალტი არ დადო. მეორე ტაიმში ჰოლანდიელს რამდენჯერმე მიეცა თავის გამოჩენის შანსი, მაგრამ ამაოდ.
68-ე წუთზე გოლკიპერთან ერთი-ერთზე დარჩნენ მიულერი და ემრე ჩანი. 18 წლის საყრდენმა "ბაიერნის" ძირითადი გუნდის შემადგენლობაში პირველი გოლი შეაგდო.
მატჩის ბოლოს კიდევ ორჯერ შეირხა ბადე. ლამის პასით ჯერ შერდან შაქირიმ შეაგდო, ბოლოს კი ტონი კროოსის შეცდომის შემდეგ ნოიერთან პირისპირ დარჩენილმა იტალი შეხტერმა გამოიყენა სახიფათო მომენტი.
კაიზერსლაუტერნი-ბაიერნი 2:3
კაიზერსლაუტერნი: ზიპელი (ჰოსი 46), დიკი (ორბანი 71), შიმუნეკი (იაჰია 46), ჰაინტცი (ვუტენი 86), იესენი (ბუგერა 75), ვერმუთი (ფორტუნისი 61), ალუში (ჰაჯრი 71), ბორისიუკი (ლინსმაიერი 57), ცუკი (დერსტროფი 46), ბუნიაკუ (შეხტერი 46), იდრისუ (მიცანსკი 46)
ბაიერნი: ნოიერი, ლამი, ვან ბუიტენი (ბოატენგი 46), ბადშტუბერი (დანტე 73), გუსტავო, ტიმოშჩუკი (ჩანი 59), კროოსი, რობენი (ვაიზერი 81), მიულერი, შაქირი (შიოპფი 87), გომესი (მანჯუკიჩი 59)
გოლები: 0:1 მიულერი (23), 1:1 დიკი (35), 1:2 ჩანი (68), 1:3 შაქირი (86), 2:3 შეხტერი (89)
ყოველდღიური სპორტული გაზეთი "ლელო"
