ახალი სეზონისთვის მოსამზადებელ პერიოდში, შეკრებაზე წასვლა ყველაზე მეტად ახალგაზრდა ფეხბურთელებს უხარიათ ხოლმე - არა მარტო იმიტომ, რომ ძირითად გუნდთან ერთად ვარჯიშის საშუალება ეძლევათ, არამედ პირველ რიგში იმის გამო, რომ მწვრთნელისთვის თავის მოწონებისა და პირველ გუნდში დამკვიდრების შანსი უჩნდებათ. "ბაიერნი" ახლა ტრენტინოში ემზადება, სადაც რეკორდმაისტერის ახალმა თავკაცმა ხოსეპ გვარდიოლამ ათი "პატარა ბიჭი" იახლა.
აი, ისინიც:
პიერ-ემილ ჰოიბერგი (17 წლის): ჰოიბერგი ძალიან პერსპექტიული ცენტრალური ნახევარმცველია. "ბაიერნში" მასზე უდიდეს იმედებს ამყარებენ, რაზეც თუნდაც ის ფაქტი მეტყველებს, რომ მის გვარს პირველად არ ვახსენებთ. ჰოიბერგმა
პატრიკ ვაირაუხი (19): ნიჭიერი თავდამსხმელი, რომელმაც პირველ ორ ტესტ-მატჩში 6 გოლი გაიტანა - ფან-კლუბის ნაკრებთან პოკერი შეასრულა, "რეგენთან" დუბლი.
იულიან გრინი (18): ამერიკული წარმოშობის მქონე გერმანელი თავდამსხმელი, რომელიც გასულ სეზონში ბავშვთა გუნდში წარმატებით ასპარეზობდა. მას მერე, რაც "ბაიერნს" გვარდიოლა ავარჯიშებს, ყველაზე კარგად სწორედ ეს ნიჭიერი ფორვარდი გამოიყურება და როგორც ჩანს, გრინი პეპსაც ძალიან მოსწონს.
მიტჩელ ვაიზერი (19): ნახევარმცველი, რომელიც ბავარიელებმა "კაიზერსლაუტერნიდან" დაიბრუნეს. ვაიზერმა იქ 15 შეხვედრაში 2 გოლის გატანა მოახერხა. ვაიზერი საკმაოდ ტექნიკური ფეხბურთელია და მოედნის კარგი ხედვა აქვს.
ალესანდრო შიოპფი (19): ავსტრიელი ნახევარმცველი, რომელმაც გასულ სეზონში "ბაიერნის" მეორე გუნდის მაისურით რეგიონალლიგაში 29 მატჩი ჩაატარა, 11 გოლი გაიტანა და 8 საგოლე პასი გააკეთა.
დანიელ ვაინი (19): ნიჭიერი ცენტრალური მცველი, რომელიც ტესტ-მატჩებში სოლიდურად გამოიყურებოდა, თუმცა არა იმდენად, რომ პირველ გუნდში სერიოზულ ალტერნატივად იქნას მიჩნეული.
ვლადიმირ რანკოვიჩი (20): სწრაფი და ტექნიკური მარჯვენა მცველი, რომელიც გვარდიოლამ ამხანაგურ მატჩებში მარჯვენა გარემარბის პოზიციაზე გამოსცადა.
ოლივერ მარკუტცი (18): ავსტრიელი თავდამსხმელი ბავშვთა გუნდიდან მიიწვიეს.
რიკო შტრიდერი (20): კლასიკური საყრდენი, ჩამშლელი ნახევარმცველი, რომელიც უკვე ორი წელია, რაც "ბაიერნის" მეორე გუნდში თამაშობს.
ბენო შმიტცი (18): მარჯვენა მცველი, რომელიც ბავშვთა გუნდში ერთ-ერთი ყველაზე გამორჩეული ფეხბურთელი იყო.
რას უპირებს გვარდიოლა გომესს?
თამამად შეიძლება ითქვას, რომ მარიო გომესი დღესდღეობით ერთადერთი ბაიერნელია, რომელიც ცუდ ხასიათზეა. როგორც იცით, 27 წლის თავდამსხმელს მიუნხენიდან წასვლა უნდა, რადგან გვარდიოლა ძირითად შემადგენლობაში თამაშის გარანტიას ვერ აძლევს.
ცნობილია ისიც, რომ გომესი ფლორენციის "ფიორენტინას" 4-წლიან კონტრაქტზე შეუთანხმდა, მაგრამ ტრანსფერი ჯერაც არ განხორციელებულა, რადგან იტალიური კლუბი "ბაიერნის" მიერ მოთხოვნილ 20 მილიონ ევროს ვერ იხდის. შესაბამისად, გომესი ჯერ კიდევ გვარდიოლას ხელმძღვანელობით ვარჯიშობს.
ამრიგად, გომესი დღესდღეობით პეპისთვის მხოლოდ და მხოლოდ ხელის შემშლელი ფაქტორია. ფაქტია, რომ მარიო გვარდიოლას გეგმებში არ მოიაზრება - პირველ ტესტ-მატჩებში გომესს არ უთამაშია. ჩვენი გერმანელი კოლეგები წერენ, მარიო ვარჯიშებზე ძალიან უხასიათოდ ირჯებაო. სპორტულმა დირექტორმა მათიას ზამერმა გომესს პროფესიონალიზმისკენ მოუწოდა, თუმცა იქვე აღნიშნა, გომესი აბსოლუტურად კორექტულად იქცევაო.
გვარდიოლას მიზანი არა მარტო ტაქტიკური და ტექნიკური მომზადება, არამედ გუნდურ სულისკვეთებაზე მუშაობაცაა. პეპმა შეკრებაზე ამიტომაც წაიყვანა ტრავმირებული ფეხბურთელები მარიო გიოტცე, ჰოლგერ ბადშტუბერი და ბასტიან შვაინშტაიგერი. არიენ რობენს, რომელიც გუნდს მოგვიანებით შეუერთდება, შვებულება იმის გამო გაუხანგრძლივდა, რომ ივნისის დასაწყისში ჰოლანდიის ნაკრებში იყო გამოძახებული; დანტე, ლუის გუსტავო და ხავი მარტინესი კი კონფედერაციათა თასზე თამაშობდნენ და ტრენტინოში საერთოდ არ ჩავლენ.
პისარო: ამაზე უკეთესი რა უნდა მომხდარიყო?
კლაუდიო პისარო "ბაიერნში" კიდევ ერთ სეზონს დაჰყოფს - ეს ინფორმაცია 4 ივლისს ოფიციალურად დადასტურდა. შვებულებიდან დაბრუნებულმა 34 წლის თავდამსხმელმა რეკორდმაისტერთან ახალ, ერთწლიან კონტრაქტს მოაწერა ხელი.
"უკვე 34 წლის ვარ და "ბაიერნთან" ახალი კონტრაქტის გაფორმებაზე უკეთესი რა უნდა ყოფილიყო? დარწმუნებული ვარ, რომ მომავალი სეზონიც შესანიშნავი იქნება," - უთხრა პისარომ "ბაიერნის" ოფიციალურ ვებგვერდს. შეგახსენებთ, რომ რეკორდმაისტერი ვეტერან ცენტრფორვარდს ორიოდე კვირის წინ შეუთანხმდა, ახლა კი კონტრაქტი ოფიციალურადაც გაფორმდა.
პისაროსთვის "ბაიერნში" ეს რიგით მერვე სეზონი იქნება. კლაუდიო რეკორდმაისტერის ღირსებას ჯერ 2001-დან 2007 წლამდე იცავდა, რის შემდეგაც მიუნხენი დატოვა, მაგრამ წინა სეზონში "ვერდერიდან" ისევ "ბაიერნში" დაბრუნდა და "ბაიერნთან" ერთად მოიგო როგორც ბუნდესლიგა, ისე ჩემპიონთა ლიგა და გერმანიის თასიც.
გასულ სეზონში პისარომ ბუნდესლიგაში 20 მატჩში მიიღო მონაწილეობა - მის ანგარიშზე 6 გოლი და 7 საგოლე პასია.
კლაუდიო პისაროს "ვერდერისა" და "ბაიერნის" ფორმებით ბუნდესლიგაში 353 მატჩი აქვს ჩატარებული და 166 გოლი აქვს გატანილი. ამ მონაცემებით, ის ბუნდესლიგის ყველა დროის საუკეთესო ლეგიონერია როგორც მატჩების, ისე გოლების რაოდენობითაც.
აღსანიშნავია, რომ პისარო უკვე ესაუბრა გვარდიოლას: "პეპს ძალიან გაუხარდა, ესპანურად რომ დაველაპარაკე. მიუხედავად ასაკისა, ძალიან კარგ ფორმაში ვარ და მინდა, რომ ფეხბურთი რაც შეიძლება დიდხანს ვითამაშო," - აცხადებს პისარო.
ყოველდღიური სპორტული გაზეთი "ლელო"
ასევე იხილეთ:
"ბაიერნი": ხოსეპ გვარდიოლა ახალ ველოსიპედს იგონებს?
