მოსალოდნელი ტრანსფერები: რობერტ ლევანდოვსკის "რეალი" ეპატიჟება?

ესპანური სპორტული გაზეთის, AS-ის ცნობით, მიუნხენის "ბაიერნის" მთავარი მწვრთნელი ხოსეპ გვარდიოლა დორტმუნდის "ბორუსიადან" პოლონელი თავდამსხმელის, რობერტ ლევანდოვსკის გადაბირების იდეით აღფრთოვანებული არაა.

ჩვენი ესპანელი კოლეგები ირწმუნებიან, რომ პეპს ლევანდოვსკი მაინცდამაინც არ მოსწონს, რაც იმას ნიშნავს, რომ მადრიდის "რეალს" პოლონელი გოლეადორის ხელში ჩაგდების რეალური შანსი გაუჩნდა.

შეგახსენებთ, რომ ლევანდოვსკის "დორტმუნდთან" კონტრაქტი სეზონის ბოლოს უმთავრდება და ზაფხულში "ბორუსიადან" წასვლა უფასოდ შეეძლება. თუმცა "რეალი" მზადაა, ზაფხულამდე არ ითმინოს და ზამთარში "დორტმუნდს" 12-13 მილიონი ევრო გადაუხადოს. ცხადია, "ბორუსიასთვის" ეს აბსოლუტურად მისაღები ვარიანტი იქნებოდა...

"დორტმუნდის" 5-მილიონიანი

გაუგებრობა
დორტმუნდის "ბორუსიამ" 24 წლის თავდამსხმელი იულიან შიბერი შარშან "შტუტგარტიდან" 5 მილიონ ევროდ შეიძინა, მაგრამ შიბერმა იმედები ვერ გაამართლა. თუკი წინა სეზონში შეცვლაზე მაინც ათამაშებდნენ, ამ სეზონში იურგენ კლოპი მას თითქმის საერთოდ აღარ ენდობა და მუდმივად სათადარიგოთა "სკამს ახეხინებს".

მეტიც: შიბერი ხანდახან განაცხადშიც ვეღარ ხვდება. ამ სეზონში ბუნდესლიგამ უკვე 8 ტური მოილია და შიბერს მოედანზე ერთი წუთიც კი არ გაუტარებია. თუ შეცვლაა, კლოპს მოედანზე 19 წლის მარვინ დუკში შეჰყავს ხოლმე...

"ბილდის" ინფორმაციით, შიბერით, რომელსაც "ბორუსიასთან" კონტრაქტი 2016 წლამდე აქვს გაფორმებული, "ჰანოვერის" მთავარი მწვრთნელი მირკო სლომკა დაინტერესდა. ამას "წითლების" მენეჯერი დირკ დუფნერიც ადასტურებს და შესაბამისად, დიდი შანსია, რომ შიბერი "ჰანოვერში" ზამთარშივე გადავიდეს.

"დორტმუნდელებმა შარშან შიბერში 5 მილიონი გადაიხადეს და იმედია, ჩვენც ამდენს არ მოგვთხოვენ. მას მერე იულიანს ფასი მნიშვნელოვნად დააკლდა," - ეს დუფნერის სიტყვებია და როგორც ხედავთ, ვაჭრობა უკვე დაიწყო...

ყოველდღიური სპორტული გაზეთი "ლელო"

ასევე იხილეთ:
რობერტ ლევანდოვსკი: იანვარში "ბაიერნთან" კონტრაქტს გავაფორმებ