გერმანია. ბუნდესლიგა. IX ტური. პარასკევის მატჩის წინ: "ლევერკუზენის" გამოცდა

სანაკრებო პაუზის გამო ბუნდესლიგამ ერთი კვირა შეისვენა, ამ უქმეებზე კი მე-9 ტური გველოდება, რომელსაც 18 ოქტომბერს "ჰოფენჰაიმისა" და "ლევერკუზენის" ძალიან საინტერესო დაპირისპირება გახსნის.

ეს მატჩი საინტერესო, პირველ რიგში, იმის გამოა, რომ "ლევერკუზენი" 8 ტურის შემდეგ მესამე ადგილზეა და "ბაიერნსა" და "დორტმუნდს" ფეხდაფეხ მისდევს, "ჰოფენჰაიმი" კი ინტენსიურ ფეხბურთს თამაშობს და გოლების გატანა ეხერხება ("სოფლელების" ანგარიშზე 8 ტურის შემდეგ 20 გოლია).

თუმცა "ჰოფეს" მეხუთე ტურის შემდეგ (2:1 "გლადბახთან") არ მოუგია და ბოლო სამ თამაშში მხოლოდ ორ ქულას მოუყარა თავი.

"ჩვენი მიზანი ისაა,

რომ "ჰოფენჰაიმი" ბუნდესლიგის შემადგენელი ნაწილი გახდეს და ეტაპობრივი პროგრესი განიცადოს. მომხიბვლელ ფეხბურთს უკვე ვთამაშობთ და ფანებს ვახარებთ, ახლა კი გრანდებიც უნდა გავამწაროთ," - აცხადებს "სოფლელების" დამრიგებელი მარკუს გისდოლი. ამის შანსი "ჰოფეს" სწორედ 18 ოქტომბერს მიეცემა.

თუმცა "ლევერკუზენი" კარგ ფორმაშია და სტაბილურად კარგად თამაშობს. გამარჯვების შემთხვევაში 18 ოქტომბერს სამი ჰიიპიას შეგირდებს მინიმუმ ერთი დღით გალიდერება შეუძლიათ.

გერმანია. ბუნდესლიგა. IX ტური
ჰოფენჰაიმი-ლევერკუზენი 22:30
ტრავმა: ვუკჩევიჩი, ვაისი - ლ. ბენდერი, იოზთუნალი
ბოლო 6 მატჩი
+1=3-2 +4=1-1
ურთიერთშეხვედრები
სულ 10 თამაში: +0=1-9, (7:27)

ბომბარდირები:
6 - იბიშევიჩი (შტუტგარტი), ლევანდოვსკი (დორტმუნდი), მოდესტე (ჰოფენჰაიმი), ნ. მიულერი (მაინცი), სემი (ლევერკუზენი).

ყოველდღიური სპორტული გაზეთი "ლელო"