მიხაელ ბალაკმა კიდევ ერთხელ გააკრიტიკა ფილიპ ლამი და გერმანიის ნაკრების კაპიტნის სამკლავურისთვის გაჩაღებული არაოფიციალური ბრძოლის შესახებ დისკუსია განაახლა. შეგახსენებთ, რომ ბალაკსა და ლამს შორის დაპირისპირების მიზეზი ბუნდესნაკრების კაპიტნის პოსტია, რომელიც ბალაკისთვის მსოფლიოს ჩემპიონატის შემდეგ გახდა ვაკანტური. გეხსომებათ, მიხაელმა მუნდიალზე ტრავმის გამო ვერ ითამაშა და სამხრეთ აფრიკაში გერმანიას სწორედ ლამმა უკაპიტნა, რომელიც სამკლავურის დათმობას აღარ აპირებს. მუნდიალის შემდეგ ბალაკი გამოჯანმრთელდა, მაგრამ მალე ისევ დაშავდა და შეიძლება ითქვას, რომ ფეხბურთი ხეირიანად აღარც უთამაშია. შესაბამისად, გერმანიის ნაკრებს მსოფლიოს ჩემპიონატის შემდგომ მატჩებშიც ლამმა უკაპიტნა.
„ჩემს აზრზე ვრჩები: როგორც ფილიპ ლამი მსოფლიოს ჩემპიონატის შემდეგ მოიქცა, ასე ფეხბურთელები არასდროს იქცევიან და მით
უმეტეს არ იქცევიან ისეთი მოთამაშეები, რომლებსაც კაპიტნობა სურთ და ამის ღირსები არიან. გერმანიის ნაკრების კაპიტანი მე ვარ და ფილიპი პატივს უნდა მცემდეს. მსოფლიოს ჩემპიონატის დასრულებიდან მხოლოდ რამდენიმე დღის შემდეგ ამ თემის წამოწევა და ხმამაღლა საუბარი ყოვლად უადგილო იყო. ლამმა ცუდი დრო შეარჩია,“ - უთხრა 34 წლის ბალაკმა „კიოლნერს ექსპრესს“.
იმასაც გაგახსენებთ, რომ სექტემბერში ბუნდესმწვრთნელმა ლიოვმა დისკუსიას ბოლო მოუღო და თქვა, რომ გერმანიის ნაკრების გუნდის თავი ბალაკია, ლამი კი ვიცე-კაპიტანი.
„ლამი ლაჩრულად მოიქცა. სამი თვით ადრე რომ ეთქვა სათქმელი, უაზრო დისკუსია არ გაჩაღდებოდა. მან კი იმ დროს გადაწყვიტა ასეთი განცხადებების გაკეთება, როცა მე ტრავმირებული ვიყავი და მუნდიალი გამოტოვებული მქონდა. მიხარია, რომ ლიოვმა სათანადო რეაგირება მოახდინა,“ - ამბობს მიხაელი.
