მიუნხენის "ბაიერნი": ხოსეპ გვარდიოლა აჯამებს

მიუნხენის "ბაიერნი" ყატარის შეკრებიდან მიუნხენში დაბრუნდა, რის შემდეგაც გუნდის მთავარმა მწვრთნელმა პეპ გვარდიოლამ პრესკონფერენციაზე აზიური მოგზაურობა შეაფასა.

- საწვრთნელ შეკრებაზე: "ძალიან კმაყოფილი ვარ ყატარელთა მიერ შემოთავაზებული პირობებით; იმით, თუ როგორ ჩატარდა ვარჯიშები, როგორ მოქმედებდნენ მოთამაშეები. ჩვენ კიდევ ბევრ ასპექტში გვაქვს სამუშაო. მიუნხენში კიდევ ორი კვირა გვექნება მომავალი მატჩებისთვის მოსამზადებლად".

- ჰოლგერ ბადშტუბერზე: "მსოფლიო ფეხბურთში ბევრი მცველი არ არის ისეთი თვისებებით, როგორიც ჰოლგერ ბადშტუბერს გააჩნია, მაგრამ ის დიდი ხანი მკურნალობდა მუხლის ტრავმას. ჩვენ უნდა მოვუფრთხილდეთ მას და ვეცადოთ, გავაკეთოთ ისე, რომ ტრავმა აღარ მიიღოს".

- დავიდ ალაბაზე: "ხვალ რომ ჩემპიონთა ლიგის ფინალი იყოს, ის აუცილებლად გავიდოდა მინდორზე. ჩვენ ყოველდღე ვუსვამთ კითხვას - როგორ გრძნობს თავს. ის ყოველთვის პასუხობს: "შესანიშნავად". მასთან ერთად ძლიერები ვხდებით. დავიდი ძალიან უნივერსალური მოთამაშეა. უბრალოდ, დაუჯერებელია! თუ 10-ბალიანი სისტემით შევაფასებთ, ის ყოველთვის იღებს რვიანს ან ცხრიანს, ხანდახან კი ათიანს. ალაბა ერთ-ერთი ყველაზე მნიშვნელოვანი მოთამაშეა "ბაიერნში".

- ტრავმირებულ მეჰდი ბენატიაზე: "ძალიან ვწუხვარ. ზურგის დაზიანების გამო მან მხოლოდ ერთ ვარჯიშში მიიღო მონაწილეობა, მაგრამ უკვე უკეთესად გრძნობს თავს. წინ კიდევ ორი კვირა გვაქვს".

- ხავი მარტინესზე: "მას ჯერ კიდევ არ შეუძლია ბურთთან მუშაობა. ექიმებმა მითხრეს, რომ რეაბილიტაცია კარგი ტემპებით მიმდინარეობს. ისინი ოპტიმისტურად არიან განწყობილნი და იმედოვნებენ, რომ მარტინესი მალე დაგვიბრუნდება".

- ბასტიან შვაინშტაიგერზე: "ჩემი წინათგრძნობა მეუბნება, რომ სეზონის მეორე ნახევარში ის საუკეთესოდ წარმოაჩენს თავს".

- რობერტ ლევანდოვსკიზე: "ყოველ მატჩში აქვს სამი-ოთხი შანსი. ეს არის მთავარი. მე მას ვეუბნებოდი: "არანაირი ზეწოლა არ არის შენზე! გოლების გატანის უდიდესი შესაძლებლობები გაქვს".

- სეზონის მეორე ნახევრის დასაწყისზე: "პირველი ორი-სამი მატჩი ძალიან მნიშვნელოვანია ჩვენთვის. თუ მოვიგებთ, დიდ ნაბიჯს გადავდგამთ საბოლოო მიზნისკენ".

- უძლიერეს კონკურენტზე მეორე წრეში: "ვოლფსბურგი" და "ლევერკუზენი". ახალი მწვრთნელით დიდი პროგრესი აქვს "შალკეს". კარგად თამაშობს მიონხენგლადბახის "ბორუსია". ადრე თუ გვიან, ჩვეულ დონეზე გავა დორტმუნდის "ბორუსია".

- ჩემპიონთა ლიგის ფავორიტებზე: "ესპანური კლუბები ძალიან ძლიერები არიან. ასევე სერიოზული ანგარიშგასაწევი ძალაა "ჩელსი". ისინი ბოლომდე იბრძოლებენ და ჩვენც გვინდა ამ ბრძოლაში მონაწილეობა".

- საკუთარ დაბადების დღეზე: "არ ვაპირებ ამასთან დაკავშირებით დიდი საღამოს მოწყობას. ამ დღეს მეგობრების წრეში გავატარებ. ერთადერთი, რაც მინდა საკუთარ თავს ვუსურვო - ჯანმრთელობაა".

ყოველდღიური სპორტული გაზეთი "ლელო"