ბუნდესლიგა. XXIII ტურის წინ: ორგაზმის ტოლფასი დერბი

"დერბიში გამარჯვება ჩემთვის ორგაზმის ტოლფასია", - განაცხადა 167-ე რურის დერბის წინ "დორტმუნდის" ფორვარდმა პიერ-ემერიკ ობამეიანგმა. დიახ, ბუნდესლიგის 23-ე ტურში მეორე წრის მთავარი მატჩი იმართება - "სიგნალ იდუნა პარკზე" "დორტმუნდი" "შალკეს" მასპინძლობს.

ცოტა ხნის წინ "ბორუსია" ბოლო ადგილზე იყო გათამაშების ცხრილში, ახლა კი, დერბის მოგების შემთხვევაში, შვიდ ქულამდე მიუახლოვდება გელზენკირხენულ გუნდს.

შუა კვირაში ორივე გუნდმა წააგო ჩემპიონთა ლიგის მატჩი, მაგრამ თუ "შალკეს" მდგომარეობა შინ "რეალთან" მარცხის (0:2) შემდეგ უიმედოა, "დორტმუნდმა" ტურინში 1:2 წაგებით მეოთხედფინალში გასვლის შანსი დაიტოვა.

ბუნდესლიგაში ბოლოდროინდელი გამოსვლითაც გუნდებს სხვადასხვა განწყობა აქვთ: "ბორუსიამ" ზედიზედ სამი მატჩი მოიგო, "შალკე" კი არასტაბილურია. "გლადბახისა" და "ჰანოვერის" დამარცხებისა და "ბაიერნთან" ფრის შემდეგ რობერტო დი მატეოს შეგირდებმა წააგეს "აინტრახტთან" და "რეალთან", ბოლო ტურში კი შინ ვერ მოუგეს "ვერდერს".

საინტერესოა, რომ "დორტმუნდს" თითქმის ოთხი წელია, შინ რურის დერბიში არ მოუგია და დროა, გაახაროს საკუთარი გულშემატკივარი.

ასევე გასათვალისწინებელია ერთი მომენტი: უკვე ნახსენები მოგებათა სერია მოიცავს გამარჯვებებს აუტსაიდერებთან - "მაინცთან", "შტუტგარტთან" და "ფრაიბურგთან" და თუ ამას სეზონის მთავარ მატჩში წაგება მოჰყვება, შესაძლოა, ამან ისევ გამოიწვიოს იმედგაცრუება და ფსიქოლოგიური შოკი, საიდანაც წლევანდელი "დორტმუნდი" გაჭირვებით გამოდის.

გერმანულ პრესაში დარწმუნებულნი არიან, რომ იურგენ კლოპი იმ ტაქტიკას აირჩევს, რომლითაც ბუნდესლიგაში ზედიზედ სამი მატჩი მოიგო: ფორვარდად ობამეიანგი ითამაშებს, მის უკან კი სამი ნახევარმცველი იქნება. საქმე ისაა, რომ "იუვენტუსთან" მატჩში არ გაამართლა ცენტრფორვარდად ჩირო იმობილეს დაყენებამ და ობამეიანგის ფლანგზე გადაყვანამ. თან გაბონელმა 2015 წელი შესანიშნავად დაიწყო - უკვე ოთხი გოლი გაიტანა და ორი საგოლე პასი შეასრულა.

"დორტმუნდმა" ვერც ამჯერად აირიდა თავიდან ტრავმა - "იუვესთან" მატჩში მიღებული დაზიანების გამო დაახლოებით ექვსი კვირა ვერ შეძლებს თამაშს მარჯვენა მცველი ლუკაშ პიშჩეკი და არც მისი შემცვლელი მოჩანს შემადგენლობაში: დურმი მხოლოდ ახლა გამოჯანმრთელდა, გროსკროიტცი კი ტრავმირებულია.

ტურინში პიშჩეკი გინტერმა შეცვალა და ამით მარჯვნივ "დორტმუნდის" შეტევითი პოტენციალი შესუსტდა. ამიტომაც გამორიცხული არ არის, რომ მთელი მარჯვენა ფლანგი იაკუბ ბლაშჩიკოვსკის ჩააბარონ.

ასევე საეჭვოა მოედანზე ცენტრალური მცველის, სოკრატის პაპასტატოპულოსის გასვლა. ასე რომ, ეს შანსი იქნება "შალკესთვის", რომელსაც უბრუნდება დისკვალიფიკაციამოხდილი და გამოჯანმრთელებული კლაას-იან ჰუნტელაარი.

თუ გავიხსენებთ "იუვენტუსთან" მატჩს, კლოპის გუნდმა ორივე გოლი სწორედ დაცვის შეცდომების შემდეგ გაუშვა.

რაც შეეხება "შალკეს" საკადრო პრობლემებს, ეს გუნდი უკვე შეეჩვია ფარფანის, დრაქსლერისა და სხვა ტრავმირებულების გარეშე თამაშს, თუმცა გუნდის ლაზარეთი გაიზარდა, რადგან ძირითადის მცველები - უჩიდა და მატიპი გამოვიდნენ მწყობრიდან.

არ ამართლებს ახალგაზრდა მეკარე ველენროიტერი, რომელმაც თითქოს კარგად დაიწყო, მაგრამ ახლა თითქმის ყველა მატჩში უშვებს შეცდომას. მაგალითად, ასე იყო "ვერდერთან" შეხვედრაში, როცა ბრემენელებმა მსაჯის მიერ კომპენსირებულ დროში მიაღწიეს ფრეს.

სავარაუდო შემადგენლობები
დორტმუნდი: ვაიდენფელერი, პაპასტატოპულოსი, სუბოტიჩი, ჰუმელსი, შმელცერი, გიუნდოგანი, შაჰინი, ბლაშჩიკოვსკი, კაგავა, როისი, ობამეიანგი.
შალკე: ველენროიტერი, ჰიოვედესი, ნოიშტედტერი, ნასტასიჩი, ბარნეტა, ფუხსი, აოგო, ჰიოგერი, ბოატენგი, ჩუპო-მოტინგი, ჰუნტელაარი.

რურის დერბის ფონზე სხვა მატჩები ჩრდილში მოექცა. "ბაიერნმა" უნდა გააგრძელოს მოგებათა სერია შინ "კიოლნთან". უბრალოდ, საკითხავია, "ჰამბურგთან" 8:0 და "პადერბორნთან" 6:0 მოგების შემდეგ რამდენ გოლს აკმარებს რეკორდმაისტერი მომავალ მეტოქეს.

ასე რომ, ეს მატჩი გამოცდა უნდა გახდეს "კიოლნის" ნიჭიერი მეკარისთვის, ტიმო ჰორნისთვის, რომელმაც მეორე წრის ხუთ მატჩში მხოლოდ ორი გოლი გაუშვა. სხვათა შორის, "კიოლნი" სულაც არ არის მოხერხებული მეტოქე "ბაიერნისთვის": ბოლო შვიდ მატჩში მიუნხენელებმა მხოლოდ სამი მოიგეს და ორჯერ დამარცხდნენ.

წესით, უნდა მოიგოს "ლევერკუზენმა", რომელსაც წინა ტურში ჯიბიდან ამოუღო სამი ქულა "აუგსბურგის" მეკარე მარვინ ჰიტცმა. როჯერ შმიდტის გუნდი "ვოლფსბურგთან" მატჩის მეორე ტაიმიდან მოყოლებული აშკარად უმატებს: 0:4-დან 4:4 (და მაინც მარცხი 4:5) "მგლებთან", თითქმის მოგებული მატჩი "აუგსბურგთან" და, რა თქმა უნდა, ჩემპიონთა ლიგაზე "ატლეტიკოსთან" მოგება.

ასე რომ, "ფარმაცევტები" უნდა გაუმკლავდნენ "ფრაიბურგს", მით უმეტეს, რომ უკვე მეექვსე ადგილამდე არიან ჩამოქვეითებულნი.

რომ არა რურის დერბი, ცენტრალური მატჩი იქნებოდა მეორე წრის საუკეთესო გუნდების დაპირისპირება - "ვერდერი" "ვოლფსბურგის" წინააღმდეგ. ორივეს ხუთ მატჩში ოთხი მოგება და ერთი ფრე აქვს.

შეხვედრის მთავარი ინტრიგა "მგლების" ფორვარდი ბას დოსტია, რომლის შეჩერებასაც ვერავინ ახერხებს და ექვს ოფიციალურ მატჩში ჰოლანდიელს 11 გოლი აქვს გატანილი. წესით, ბრემენში უხვგოლიანი მატჩი უნდა გამოვიდეს, რადგან მეორე წრეში ამ გუნდებმა მხოლოდ თითო "მშრალი" თამაში ჩაატარეს. და კიდევ, "ვოლფსბურგს" ბოლო ოთხი მატჩი მოგებული აქვს "ვერდერისთვის".

თუმცა თავისი კოზირი აქვს ვიქტორ სკრიპნიკის გუნდს - მას შემდეგ, რაც უკრაინელი ჩაუდგა სათავეში "ვერდერს", ამ გუნდმა შინ 21 შესაძლებლიდან 19 ქულა დააგროვა.

ბუნდესლიგა. XXIII ტური
პარასკევი. 27 თებერვალი
ბაიერნი-კიოლნი 23:30
დისკვალიფიკაცია: არავინ
ტრავმა: ხავი მარტინესი, ლამი, ტიაგო ალკანტარა, ბენატია - ჰელმესი, გერჰარდტი
ბოლო 6 მატჩი
+4=1-1 +1=3-2
ურთიერთშეხვედრები
სულ 83 მატჩი: +38=22-23 (159-114)

შაბათი. 28 თებერვალი
დორტმუნდი-შალკე 18:30
დისკვალიფიკაცია: არავინ
ტრავმა: დურმი, გროსკროიტცი, პიშჩეკი - ფერმანი, გიფერი, კირხოფი, კოლაშინაცი, მატიპი, უჩიდა, დრაქსლერი, ფარფანი, ობასი, გორეტცკა
ბოლო 6 მატჩი
+3=1-2 +2=3-1
ურთიერთშეხვედრები
სულ 85 მატჩი: +30=25-30 (130-121)

ლევერკუზენი-ფრაიბურგი 18:30
დისკვალიფიკაცია: - ტორეხონი
ტრავმა: იედვაი, კრუსი - მიტროვიჩი, კემპფი, მეჰმედი, პეტერსენი, სტანკო, იულიანი, მიოლერ დელი, ბატცი
ბოლო 6 მატჩი
+1=3-2 +2=2-2
ურთიერთშეხვედრები
სულ 31 მატჩი: +14=9-8 (54-36)

ჰოფენჰაიმი-მაინცი 18:30
დისკვალიფიკაცია: არავინ
ტრავმა: ზიულე - მორიტცი, ნედელევი
ბოლო 6 მატჩი
+2=1-3 +2=1-3
ურთიერთშეხვედრები
სულ 11 მატჩი: +1=4-6 (13-19)

ჰანოვერი-შტუტგარტი 18:30
დისკვალიფიკაცია: ჟოაო პერეირა
ტრავმა: მილერი, ფელიპე, ჰოფმანი, ალმერი - რიუდიგერი, დიდავი, აბდელაუე
ბოლო 6 მატჩი
+0=3-3 +0=2-4
ურთიერთშეხვედრები
სულ 51 მატჩი: +18=9-24 (74-88)

ჰერტა-აუგსბურგი 18:30
დისკვალიფიკაცია: შტოკერი
ტრავმა: ბაუმიოჰანი, ჩიგერჩი, იარსტეინი - ჰონგი, ვერჰაეგი, რაინჰარდტი, მორავეკი, მატავჟი, მიოლდერსი, ესვაინი
ბოლო 6 მატჩი
+1=0-5 +3=2-1
ურთიერთშეხვედრები
სულ 5 მატჩი: +0=3-2 (2-6)

აინტრახტი-ჰამბურგი 21:30
დისკვალიფიკაცია: სამბრანო, სეფეროვიჩი
ტრავმა: ჯაკპა - იანსენი, გრინი, ჰოლტბი, ოლიჩი, დიასი, კლებერი, ბეჰრამი, ლასოგა
ბოლო 6 მატჩი
+1=3-2 +2=2-2
ურთიერთშეხვედრები
სულ 91ღ მატჩი: +28=22-41 (113-159)

კვირა. 1-ლი მარტი
ბორუსია (მ)-პადერბორნი 18:30
დისკვალიფიკაცია: - ჰარტერცი
ტრავმა: - ბერტელსი, რაფა ლოპესი
ბოლო 6 მატჩი
+3=1-2 +1=2-3
ურთიერთშეხვედრები
სულ 1 მატჩი: +1=0-0 (2-1)

ვერდერი-ვოლფსბურგი 20:30
დისკვალიფიკაცია: ბარტელსი
ტრავმა: ბუში, გალვესი, ბარგფრედე, ლორენცენი - ჰანტი, ფელიპე, პერიშიჩი
ბოლო 6 მატჩი
+5=1-0 +5=1-0
ურთიერთშეხვედრები
სულ 35 მატჩი: +13=7-15 (61-58)

ბომბარდირები:
16 - რობენი (ბაიერნი); 14 - მაიერი (აინტრახტი); 11 - დოსტი (ვოლფსბურგი); 10 - ლევანდოვსკი (ბაიერნი), დი სანტო (ვერდერი); 9 - ჩუპო-მოტინგი (შალკე), ბელარაბი (ლევერკუზენი), მიულერი (ბაიერნი), გიოტცე (ბაიერნი), ობამეიანგი (დორტმუნდი).

ყოველდღიური სპორტული გაზეთი "ლელო"