უკანასკნელი მწვრთნელი, რომელმაც დორტმუნდი გააჩემპიონა, დარწმუნებულია, რომ ბორუსიას ვერცხლის სინს ვერავინ წაართმევს
დორტმუნდის „ბორუსიას“ მწვრთნელებიდან მათიას ზამერი უკანასკნელი იყო, ვინც ვესტფალიურ კლუბს გერმანიის ჩემპიონატი მოაგებინა. BVB-მ „ვერცხლის სინი“ ბოლოს 2002 წლის 4 მაისს მოიპოვა და მას მერე, „შავ ყვითლები“ არასდროს ყოფილან ჩემპიონობასთან ისე ახლოს, როგორც ახლა არიან. მართალია, წინ მთელი მეორე წრეა (17 ტური), მაგრამ თუ იმას გავითვალისწინებთ, რომ „ბორუსიამ“ პირველი წრე ათქულიანი უპირატესობით მოიგო, ცხადი ხდება, რომ ეს გუნდი ჩემპიონობის ნომერ პირველი კანდიდატია.
„ლევერკუზენისა“ და „დორტმუნდის“ მატჩის წინ „ბილდმა“
- ჰერ ზამერთ, გიკვირთ თუ არა ის, რომ თქვენი ყოფილი გუნდი მიმდინარე სეზონში ასე კარგად ასპარეზობს და ჩემპიონობის უმთავრესი კანდიდატია?
- „ბორუსიამ“ ამ სეზონში ყველა გააოცა, მათ შორის მეც. ვფიქრობდი, რომ დორტმუნდელები კარგ სეზონს ჩაატარებდნენ, მაგრამ იმას კი ნაღდად ვერ წარმოვიდგენდი, რომ პირველ წრეში ასეთი დომინანტები იქნებოდნენ. რაც ყველაზე მთავარი და საინტერესოა, „დორტმუნდი“ ამ სეზონში არა მარტო წარმატებულია, არამედ ძალიან კარგ, შემტევ, სანახაობრივ ფეხბურთსაც თამაშობს.
- შეგვიძლია, რომ დორტმუნდელებს უკვე მივულოცოთ გერმანიის ჩემპიონობა? თუ ფიქრობთ, რომ მეორე წრეში „ბორუსიას“ მაინც შეექმნება პრობლემები?
- გაუთვალისწინებელი რამ უნდა მოხდეს, „ბორუსიას“ პრობლემები რომ შეექმნას და გერმანიის ჩემპიონი ვერ გახდეს. ჩემი აზრით, არ შეიძლება შემთხვევითი იყოს ყველაფერი ის, რაც ამ გუნდმა პირველ წრეში გააკეთა. არ გამოვრიცხავ, რომ დორტმუნდელებმა მეორე წრეში რამდენიმე, უფრო სწორად, პირველ წრეზე მეტი თამაში წააგონ, მაგრამ დარწმუნებული ვარ, რომ ამ შანსს ხელიდან არ გაუშვებენ და BVB 2002 წლის მერე ჩემპიონობას პირველად იზეიმებს.
- მიუხედავად ასეთი ვითარებისა, მიუნხენის „ბაიერნში“ მაინც ოცნებობენ „ვერცხლის სინის“ შენარჩუნებაზე. არადა, რეკორდმაისტერი „დორტმუნდს“ 14 ქულით ჩამორჩება...
- მე კი ვფიქრობ, რომ „ბაიერნიცა“ და „ლევერკუზენიც“, ამ სეზონში მხოლოდ მეორე ადგილისთვის იბრძოლებენ, რათა პირდაპირ ჩემპიონთა ლიგის ჯგუფურ ეტაპზე მოხვდნენ და საკვალიფიკაციო რაუნდში თამაში არ მოუხდეთ. არა მგონია, რომ „ბორუსიას“ კონკურენტებმა ამაზე მეტი შეძლონ, რადგან იურგენ კლოპის გუნდი სატურნირო ცხრილს ზედმეტად დიდი უპირატესობით ლიდერობს.
- იურგენ კლოპის მუშაობას როგორ აფასებთ?
- ორი აზრი არ არსებობს, კლოპი იდეალურად მუშაობს. ყველაფერთან ერთად, იურგენი ძალიან ემოციური ადამიანია და ხანდახან, საკუთარ თავს მაგონებს ხოლმე. ხომ გახსოვთ, მწვრთნელობის დროს მეც ძალიან იმპულსური ვიყავი. სხვათა შორის, დორტმუნდის „ბორუსიას“ სწორედ ასეთი სპეციალისტები უხდება.
- ამას წინათ „ბორუსიას“ და უკვე გერმანიის ნაკრების ახალგაზრდა ფეხბურთელი მარიო გიოტცე ქებით ცაში აიყვანეთ. როგორ ფიქრობთ, გიოტცე მართლა შეძლებს ფეხბურთის უმაღლეს დონეზე თამაშს?
- დიდი ხანია, ამ ბიჭს ვაკვირდები და ნებისმიერი სახის ანალიზის მერე ვხვდები, რომ ეს ბიჭი ყველა ლოგიკით უდიდესი ფეხბურთელი უნდა გახდეს. ყოველ შემთხვევაში, მას ყველა პირობა აქვს შექმნილი იმისათვის, რომ დიდი ფეხბურთი ითამაშოს.
დიდი ხანია, გერმანიას ამხელა პოტენციალის მქონე ტალანტი არ ჰყოლია. გიოტცეში ყველაზე მეტად ის მხიბლავს, რომ მომენტებში რაღაც ორიგინალურის გაკეთება და ამით თამაშის ბედის გადაწყვეტა შეუძლია. ამასთან, მარიო ძალიან კარგ ოჯახშია გაზრდილი და უკვე ზუსტად ვიცი, რომ თავში არაფერი აუვარდება. ერთი სიტყვით, ჩვენ ყველას ძალიან უნდა გვიხაროდეს, რომ ასეთი ტალანტი გვყავს. გერმანიისთვის ის ისეთივე ფიგურა უნდა გახდეს, როგორიც უეინ რუნი გახდა ინგლისში, ან სესკ ფაბრეგასი - ესპანეთში.
.
