ჯეკოს ჰელმესი შეცვლის?

"ვოლფსბურგი" იანვრის ბოლომდე მინიმუმ ერთ ახალ ფეხბურთელს იყიდის. `მგლების~ მთავარი მწვრთნელი სტივ მაკლარენი ამბობს, რომ მას რამდენიმე ახალწვეული სჭირდება, მაგრამ კლუბის ხელმძღვანელები სავარაუდოდ მხოლოდ ერთ ან მაქსიმუმ ორ ახალ მოთამაშეს უყიდიან. ფაქტი ერთია: ედინ ჯეკოს `მანჩესტერ სიტიში~ გაყიდვის შემდეგ `ვოლფსბურგს~ საკმაოდ ბევრი ფული აქვს (35 მილიონი ევრო), პირველ რიგში კი ჯეკოს პირდაპირი შემცვლელი, ანუ, ახალი მაღალი კლასის თავდამსხმელი სჭირდება.

`ბილდის~ ინფორმაციით, გერმანიის ექს-ჩემპიონების სასურველ ფეხბურთელთა სიაში პირველ ადგილზე `ლევერკუზენის~ 26 წლის ფორვარდი პატრიკ ჰელმესია, რომელსაც `ბაიერის~ მთავარი მწვრთნელი იუპ ჰაინკესი ძირითად შემადგენლობაში საკმაოდ იშვიათად ათამაშებს. მართალია, `დონ იუპი~ ჰელმესის `ვოლფსბურგში~ შესაძლო გადაბარგებას ჯერჯერობით სპეკულაციას უწოდებს, მაგრამ მეორე მხრივ, ჰაინკესი პატრიკის შეჩერებას ვერ მოახერხებს. `ლევერკუზენის~ სპორტული დირექტორი რუდი ფიოლერი კი არაფერს გამორიცხავს. `ჰელმესის დარი ფეხბურთელის გაყიდვა ჩვენს გეგმებში არ შედის და სხვათა შორის, აქამდე მისი გადაბირების სურვილი არც არავის გამოუთქვამს. თუ ვინმე დამიკავშირდება, ყურმილს ნამდვილად არ დავუკიდებ,~ - აცხადებს `რუხი მგელი~.

ჩვენი გერმანელი კოლეგების აზრით, ვოლფსბურგელები ფიოლერსა და კომპანიას ოფიციალურად ამ კვირაშივე მიმართავენ და ჰელმესის ტრანსფერზე სიტყვას ჩამოუგდებენ. პატრიკს `ლევერკუზენთან~ კონტრაქტი 2013 წლამდე აკავშირებს და მისი სავარაუდო ფასი დაახლოებით 10 მილიონი ევროა. `ფარმაცევტების~ მენეჯერ ვოლფგანგ ჰოლცჰოიზერის თქმით, ჰელმესის გაყიდვა პირველ რიგში ჰაინკესის ნება-სურვილზე იქნება დამოკიდებული. ეს იმას ნიშნავს, რომ თუ ჰაინკესს გადაწყვეტილი აქვს, გუნდი მეორე წრეში 4-2-3-1 ტაქტიკური სქემით ათამაშოს, ჰელმესის გაყიდვა პრობლემა არ იქნება, რადგან `ბაიერს~ შტეფან კისლინგის სახით ერთი მაღალი კლასის ცენტრალური თავდამსხმელი დარჩება და მის შემცვლელებად კიდევ ორი, ერენ დერდიოკი და იორგენსენი ეყოლება.