"ბაიერნი" კვლავაც მთავარი ფავორიტია ტიტულის მოგებაზე, მაგრამ, ამჯერად, საყოველთაო ვარაუდით, პეპ გვარდიოლას გუნდს გარანტირებული არაფერი აქვს. ჯერ ერთი, იხსენებენ იმას, რომ რეკორდმაისტერმა ბოლო რვა ოფიციალური მატჩიდან ექვსი წააგო.
მეორე მნიშვნელოვანი ფაქტორია დიდი ამბიციების მქონე "ვოლფსბურგი", რომელმაც თუ კევინ დე ბრუინი შეინარჩუნა, სერიოზულ პრეტენზიას გამოაცხადებს ჩემპიონობაზე.
შეგახსენებთ, რომ გერმანიაში ბოლო ორი ტიტული სწორედ "მგლებმა" მოიგეს - ქვეყნის თასი და სუპერთასი. ეს ბოლო ტიტული მათ სწორედ "ბაიერნთან" მატჩში აიღეს.
თანდათან იკლებს ქულათა სხვაობა, რომლითაც "ბაიერნი" ჩემპიონატში უახლოეს კონკურენტს ამარცხებს. 2012-13 წლების სეზონში,
კი ბატონო, შესაძლოა, უსუსური არგუმენტია, სამაგიეროდ, მნიშვნელოვანია ერთი ისტორიული ფაქტი - ბუნდესლიგაში ზედიზედ ოთხჯერ ტიტული არც ერთ გუნდს არ მოუგია.
ოთხეულის კანდიდატები
ძალიან საინტერესო ბრძოლაა მოსალოდნელი ჩემპიონთა ლიგის საგზურებისთვის. დიდი ალბათობით, უკვე ნახსენებ "ბაიერნსა" და "ვოლფსბურგს" სეზონის ბოლოს პირველ ოთხეულში ვიხილავთ, დარჩენილი ორი საგზურისთვის კი კანდიდატები ბევრნი არიან. პირველ რიგში, ისევ ცნობილი ოთხეული უნდა ვახსენოთ: "დორტმუნდი", "ლევერკუზენი", "გლადბახი" და "შალკე". და არც სხვა გუნდებისგან არის გამორიცხული სიურპრიზები.ძლიერი მეკარეები, მაინც ბევრი გოლი
ბუნდესლიგის ბოლო სეზონებს თუ ავიღებთ, ყველაზე ნაკლები გოლი 2014-15 წლების ჩემპიონატში გავიდა. პირველ რიგში, ეს მეკარეების დამსახურება ყოფილა, - გვამცნობს ბუნდესლიგის ოფიციალური ვებგვერდი. შარშან მათ ზუსტი დარტყმების 70 პროცენტი მოიგერიეს, უხეში შეცდომების რიცხვი კი 38 იყო, რაც 19-ით ნაკლებია წინა სეზონის შედეგზე.მიუხედავად ამისა, ტოპ-ხუთეულის ჩემპიონატებში, საშუალოდ მატჩში ყველაზე მეტი გოლი მაინც ბუნდესლიგაში გავიდა - 2.75. შედარებისთვის, ინგლისში ეს მაჩვენებელი იყო - 2.56, ესპანეთში - 2.65, იტალიაში - 2.69 და საფრანგეთში - 2.49.
დასწრება ისევ გერმანიისაა
ბუნდესლიგა კვლავაც ლიდერად რჩება დასწრების მაჩვენებლით. მსოფლიოში ყველაზე მოდერნიზებული სტადიონებისა და ფანების ერთგულების წყალობით, 2014-15 წლების სეზონში, საშუალოდ ერთ მატჩს 43 500 მაყურებელი ესწრებოდა. ბოლო სეზონებში, უკეთესი დასწრება 2011-12 წლების ჩემპიონატში იყო, როცა საშუალო მაჩვენებელი 45 100 მაყურებელს უდრიდა.
ევროპის სხვა წამყვანი ქვეყნები ახლოსაც ვერ მიდიან გერმანიასთან. ინგლისის პრემიერლიგაში საშუალოდ ერთ მატჩს 36 200 მაყურებელი ესწრებოდა, ესპანეთში - 27 000, იტალიაში - 22 200 და საფრანგეთში - 22 100.
ახალი სახეები
ახალი სეზონის წინ ბუნდესლიგის გუნდებში საინტერესო გადაადგილებები მოხდა. "ბაიერნს" ორი მნიშვნელოვანი შენაძენი აქვს არტურო ვიდალისა და დუგლას კოშტას სახით. ხანგრძლივი პაუზის შემდეგ ბუნდესლიგაში ითამაშებს გერმანიის ნაკრების ყოფილი ფორვარდი კევინ კურანი - ის "ჰოფენჰაიმის" რიგებში ცდის ძალებს. ასევე საინტერესოა გერმანიის ნაკრების ორი ყოფილი ფეხბურთელის - საშა რიტერისა და პიოტრ ტროხოვსკის გამოჩენა, შესაბამისად, "შალკესა" და "აუგსბურგის" შემადგენლობებში.
მორიგი ნიჭიერი იაპონელი გამოჩნდა გერმანიის ჩემპიონატში - "მაინცმა" "ლესტერში" წასული შინჯი ოკაზაკის შემცვლელად, 22 წლის ფორვარდი იოშინორი მუტო შეიძინა, რომელმაც იაპონიის ნაკრებში 11 მატჩის ჩატარება მოასწრო. "აინტრახტის" რიგებშია ნიჭიერი ჰოლანდიელი ლუკ კასტაინოსი, რომელმაც უკვე გაიტანა ერთი გოლი გერმანიის თასის მატჩში...
მოლოდინი დებიუტანტებისგან
ბუნდესლიგა ბოლო წლების ტრადიციას არ ღალატობს და დამდეგ სეზონში, გერმანიის მთავარ ლიგაში მორიგი აბსოლუტური დებიუტანტი ითამაშებს. "ინგოლშტადტი" ისტორიაში 54-ე გუნდია, რომელიც პირველ ბუნდესლიგაში მოსინჯავს ძალებს. საინტერესოა, ეს გუნდი მიბაძავს "აუგსბურგსა" და "ჰოფენჰაიმს" და დიდი ხნით დარჩება პირველ ლიგაში თუ "ფიურტისა" და "პადერბორნის" ბედს გაიზიარებს, რომლებმაც მხოლოდ ერთი წელი გაძლეს ელიტაში?ასევე ინტრიგაა "დარმშტადტის" გამოსვლა, რომელიც 33-წლიანი პაუზის შემდეგ დაბრუნდა ბუნდესლიგაში. დღევანდელი გადმოსახედიდან, ბოლო ორი ადგილის დაკავებას სწორედ ამ გუნდებს უწინასწარმეტყველებენ, მაგრამ ნუ დაგვავიწყდება "ჰამბურგი", რომელიც ბოლო წლებში ღრმა კრიზისში იმყოფება და დიდი გაჭირვებით ინარჩუნებს ადგილს მთავარ ლიგაში.
დამდეგი სეზონის კიდევ ერთი ინტრიგა სწორედ ამ გუნდის გამოსვლა იქნება - საინტერესოა, დაძლია თუ არა კრიზისი ერთ დროს გერმანული ფეხბურთის გრანდმა?
(იბეჭდება მცირე ცვლილებით)
ყოველდღიური სპორტული გაზეთი "ლელო"
