"შტუტგარტთან" ნათამაშებ ფრეს (1:1) დორტმუნდის "ბორუსიასთვის" წესით ბევრი არაფერი უნდა შეეცვალა, რადგან "შავ-ყვითლები" მაინც დიდი უპირატესობით ლიდერობენ - "ბორუსია" უახლოეს მდევარ "ლევერკუზენს" 11, ხოლო მოქმედ ჩემპიონ "ბაიერნს" კი სულაც 14 ქულით უსწრებს. "შტუტგარტთან" მატჩამდე დორტმუნდელები ამბობდნენ, ნერვებს ვერავინ და ვერაფერი მოგვიშლის, ვიცით, რომ კონკურენტების სურვილი და მიზანი ახლა ჩვენი ანერვიულებაა და ძალიან მაგრად ვდგავართო, მაგრამ მეორე წრის მეორე ტურში დაკარგულმა ორმა ქულამ BVB-ს მაინც დაატყო იარა.თავდამსხმელი ლუკას ბარიოსი ძალიან ნაწყენია იმის გამო, რომ მთავარმა მწვრთნელმა იურგენ კლოპმა "შტუტგარტთან" ძირითად
აი, რას ამბობს 26 წლის ბარიოსი ABC დიგიტალ-ისთვის მიცემულ ინტერვიუში: "თამაშის შემდეგ გაზეთ "ბილდში" წავიკითხე, თურმე იურგენ კლოპს უთქვამს, ბარიოსი იმიტომ არ ვათამაშე, რომ მოედანზე გასასვლელად 100 პროცენტით მზად არ არისო. მე კი მინდა ყველას გასაგონად ვთქვა, რომ თამაშისთვის 100 პროცენტით მზად ვარ! დიდი ხანია, აღარ მაქვს გრიპი, რომლის გამოც შვებულებიდან გვიან დავბრუნდი. ვარჯიშებზე ყველაფერს ისე ვაკეთებ, როგორც დანარჩენები და შესაბამისად, ძალიან მიკვირს, როცა ჩემზე ამბობენ, ფორმაში არააო. მეტსაც ვიტყვი: ახლა თავს ისე კარგად ვგრძნობ, როგორც არასდროს, ვფიქრობ, ასეთ ფიზიკურ კონდიციაში არასდროს ვყოფილვარ."
ბარიოსს მიმდინარე სეზონში დორტმუნდისთვის 8 გოლი აქვს გატანილი და გუნდის საუკეთესო ბომბარდირია. "შტუტგარტთან" კლოპმა მის ნაცვლად პოლონელი რობერტ ლევანდოვსკი ათამაშა, რომელიც ადრე საკმაოდ კარგად ცვლიდა ხოლმე ბარიოსს, "შტუტგარტთან" კი იმდენი მომენტი გაანიავა, რომ ლამისაა, დორტმუნდელებმა ორი ქულის დაკარგვა მხოლოდ მას დააბრალონ.
ბარიოსის შემოტევას კლოპი გახარებული დახვდა. 43 წლის მწვრთნელი, რომელიც იდეალური ფსიქოლოგია, ამბობს: "ძალიან მიხარია, რომ ლუკასი მოუთმენლად ელის იმ დღეს, როცა ძირითად შემადგენლობაში დავაბრუნებ და რომ იბრძვის სასტარტოში დასაბრუნებლად. ცხადია, ბარიოსი ძალიან გვჭირდება."
ბარიოსის უკმაყოფილება არაფერია იმასთან შედარებით, რაც "ბორუსიას" აზიიდან დაატყდა თავს. საქმე იმაშია, რომ იაპონიის ნაკრებთან ერთად აზიის თასზე მოასპარეზე შინჯი კაგავა, რომელიც დორტმუნდელთა ერთ-ერთი უმთავრესი ფიგურაა, დაშავდა და დიდი შანსია, რომ ფეხბურთი სეზონის ბოლომდე ვეღარ ითამაშოს. ახალგაზრდა გამთამაშებელს, რომელმაც პირველი წრე ბრწყინვალედ ჩაატარა, მოტეხილობა აქვს. 21 წლის ნახევარმცველი აზიის თასის ნახევარფინალში, სამხრეთ კორეასთან მატჩში დაიმტვრა და უკვე დორტმუნდშია, მაგრამ ყავარჯნებით დადის. ფაქტია, რომ შინჯი დორტმუნდელებს მინიმუმ ორი თვის მანძილზე ვერ დაეხმარება, მაგრამ დიდი შანსია, რომ მისთვის მიმდინარე სეზონი უკვე დასრულებული იყოს.
"მოხდა ის, რისიც ყველაზე მეტად მეშინოდა. კაგავას ტრავმა ჩვენთვის სერიოზული პრობლემაა, რადგან პირველ წრეში მასზე მქონდა თამაში აგებული. თუმცა მომავალს მაინც ოპტიმისტურად ვუყურებ. ჩვენ გვყავს რამდენიმე ფეხბურთელი, ვისაც შინჯის ღირსეულად შეცვლა შეუძლია. ერთ-ერთი მათგანი მოჰამედ ზიდანია, რომელსაც ამ სეზონში თავისი პოტენციალის სრულფასოვნად გამოვლენის საშუალება ჯერ არ მისცემია," - ეს კლოპის სიტყვებია.
შეგახსენებთ, რომ ბუნდესლიგის მე-20 ტურში, შაბათს, დორტმუნდელები "ვოლფსბურგს" სტუმრობენ.
.
