შესანიშნავი რამ არის სტატისტიკა - ნათლად ამბობს ვინ ვის რითი სჯობს. აი, მაგალითად, კითხვაზე, ვინ არის პრემიერლიგის საუკეთესო ბომბარდირი, სტატისტიკა ასე პასუხობს: „არსენალის“ ჰოლანდიელ ფორვარდ, 27 წლის რობინ ვან პერსის გასული სეზონის განმავლობაში, ყოველ 98,2 წუთში თითო გოლი გაჰქონდა, რითაც ყველას სჯობდა - ეს OPTA-ს მონაცემები გახლავთ. OPTA სპორტული მონაცემების დამუშავებისა და ანალიზის კომპანია გახლავთ, რომელიც ლონდონში, მიუნხენში, მილანსა და მადრიდში მოღვაწეობს. მისი კლიენტები არიან ფეხბურთის კლუბები, ტოტალიზატორები, გაზეთები, ტელეარხები - ყველა, ვისაც დამუშავებული მონაცემები სჭირდება.
და რა არის საჭირო
24 წლის პორტუგალიელი ნახევარმცველი ნანი თანაგუნდელებმა „მანჩესტერ იუნაიტედის“ საუკეთესო მოთამაშედ აირჩიეს. მიზეზი? სტატისტიკა მეტყველებს, რომ მან, სეზონის განმავლობაში, ყველაზე მეტი საგოლე პასი შეასრულა. ხაზს ვუსვამთ, აქ არ არის ლაპარაკი მარტო ბურთის ჩაკიდებაზე, გამჭოლ პასზე თუ რბილ დაგორებაზე, ამ შემთხვევაში ყველაფერს ერთად ვგულისხმობთ. ბევრი რომ არ გავაგრძელოთ, ნანის პასით მანჩესტერელებმა 14 გოლი შეაგდეს სხვა გუნდების მოთამაშეებმა კი ამდენი ვერ შეძლეს.
ნანის, მოგეხსენებათ, დრიბლინგიც უვარგა - იხელთებს ხოლმე ბურთს და ჯიქურ მიიწევს მეტოქის მცველებისკენ, მაგრამ ამაში „უიგანში“ მოთამაშეს, 24 წლის ფრანგ გარემარბ შარლ ნ’ზოგბიას ვერ სჯობია. ნ’ზოგბიამ სეზონის მანძილზე 301 გარღვევა შეასრულა. მეორე ადგილზე გასულმა, 27 წლის არგენტინელმა ხონას გუტიერესმა, რომელიც „ნიუკასლ იუნაიტედში“ გამოდის, მეტოქეთა იმავე ხერხით დაწიოკება მხოლოდ 219-ჯერ შეძლი.
ახლა მცველებსაც გადავხედოთ. ლოგიკურია, რომ ყველაზე დაკავებული მცველი სუსტ გუნდებში უნდა ვეძებოთ, რადგან სუსტ გუნდებს უფრო ხშირად უტევენ ვიდრე ისინი თავად უტევენ. შესაბამისად, თუ სუსტი გუნდის რომელიმე მცველმა თავი გამოიჩინა, უნდა ვივარაუდოდ, რომ საუკეთესოც ის იქნებოდა. ჩავხედოთ სტატისტიკას: საკუთარი კარის მიდამოები ყველაზე ხშირად „ბლექპულის“ ფეხბურთელმა, 29 წლის იან ივეტმა „გაწმინდა“. მან საჯარიმოდან ბურთი 430-ჯერ გააგდო.
და „ცუდი ბიჭების“ ამბავი არ გაინტერესებთ? ზოგს ვინ მიაჩნია უხეშ ფეხბურთელად და ზოგს ვინ, თუმცა, ხშირად, ეს შეიძლება მხოლოდ განწყობისმიერი შეხედულება იყოს, სტატიატიკა კი პირუთვნელია: ბოლო რვა სეზონიდან შვიდში ყველაზე მეტჯერ ბოლტინელი კევინ დევისი დაჯარიმდა. გასულ სეზონში 34 წლის თავდამსხმელს (!) 123-ჯერ გააჩერებინეს თამაში, რადგან მან წესი დაარღვია. ცნობისათვის: ეს შედეგი სარეკორდოა. ყოველ შემთხვევაში, რაც OPTA კვლევებს ატარებს, ამდენჯერ მსაჯებს არავის წინააღმდეგ დაუსტვენიათ.
და „კარგი ბიჭი“ ვინღაა? ის „ლივერპულის“ ბრაზილიელი ნახევარმცველი, 24 წლის ლუკას ლეივა გახლავთ. ის 111-ჯერ მივარდა მოწინააღმდეგეს ისე, რომ წესი არ დაურღვევია და ბურთიც მოიპოვა.
კითხვაზე, ვინ წააქციეს გასულ სეზონში ყველაზე ხშირად, სწორი პასუხი ასეთია: „ასტონ ვილას“ 25 წლის გარემარბი ეშლი იანგი. მას 96-ჯერ „ერჩოდნენ“. აი, მის თანაგუნდელ დარენ ბენტს კი ოფსაიდის შეგრძნება არ აქვს - 27 წლის ფორვარდი 67-ჯერ ჩარჩა თამაშს გარეთ. თან, მისი მაჩვენებელი მნიშვნელოვნად აღემატება მეორე ადგილზე გასული პიტერ ოდემვინგეს მაჩვენებელს. 29 წლის ტაშკენტელ (დედა რუსი ჰყავს) ნიგერიელს, რომელიც „ვესტ ბრომვიჩში“ თამაშობს, 47-ჯერ უმტყუნა სივრცის შეგრძნებამ.
აი, „ფულჰემის“ 31 წლის შემტევმა ნახევარმცველმა სტიდ მოლბრანკმა კი სეზონის მანძილზე 44-ჯერ დაარტყა კარში, მაგრამ გოლი ერთხელაც ვერ შეაგდო.
